Flydubai Co-Pilot : ఫ్లైదుబాయ్‌ కో పైలట్‌ భద్రతా నిఘా నుంచి ఎలా తప్పించుకున్నాడో తెలిస్తే షాకవుతారు

Flydubai Co-Pilot : ఫ్లైదుబాయ్‌ విమానం FZ1073లో జరిగిన ఘటన ఇప్పుడు అంతర్జాతీయ విమానయాన భద్రతపై కొత్త ప్రశ్నలను లేవనెత్తుతోంది. దుబాయ్‌ నుంచి ఇజ్రాయెల్‌కు వెళ్తున్న విమానంలో ఒమానీ కో-పైలట్‌ హమామ్‌ అల్‌-హమ్మామీ, భారతీయ పైలట్‌ స్మిత్‌ మచ్చర్‌పై కాక్‌పిట్‌లో దాడి చేసినట్లు ఆరోపణలు ఉన్నాయి. అత్యవసర పరిస్థితుల్లో ఉపయోగించే క్రాష్‌ యాక్స్‌తో పైలట్‌పై దాడి చేసినట్లు సమాచారం. ఈ ఘటనను యూఏఈ ప్రాసిక్యూటర్‌ జనరల్‌ “ఉగ్రవాద దాడి”గా పేర్కొన్నారు. అయితే ఇప్పుడు అసలు చర్చ దాడి జరిగిన తీరుపైనే కాదు. ఒక వ్యక్తి పైలట్‌గా మారేందుకు పలు దేశాల్లో శిక్షణ పొందిన తర్వాత కూడా ఇలాంటి ఘటనకు ఎలా చేరుకున్నాడు? విమానయాన రంగంలో ఉన్న భద్రతా తనిఖీలు, నేపథ్య పరిశీలనలు, శిక్షణ వ్యవస్థలు అతడిని ముందుగానే గుర్తించలేకపోయాయా? అన్న ప్రశ్నలు తెరపైకి వస్తున్నాయి.

బ్రిటన్‌లో ప్రొఫెషనల్‌ పైలట్‌ శిక్షణ

హమామ్‌ అల్‌-హమ్మామీ 2018-19 మధ్య బ్రిటన్‌లో పైలట్‌ శిక్షణ పొందినట్లు ది టెలిగ్రాఫ్‌ నివేదిక పేర్కొంది. ఇంగ్లండ్‌లోని ప్రముఖ L3 Airline Academyలో అతడు శిక్షణ తీసుకున్నట్లు సమాచారం. L3 Airline Academy ప్రస్తుతం Acron Aviationలో భాగంగా ఉంది. అయితే హమామ్‌ అక్కడ శిక్షణ పొందాడా లేదా అనే విషయాన్ని సంస్థ నేరుగా ధృవీకరించలేదు. వ్యక్తిగతంగా ప్రస్తుత లేదా మాజీ విద్యార్థుల వివరాలపై బహిరంగంగా వ్యాఖ్యానించేది లేదని తెలిపింది. అయితే దర్యాప్తు సంస్థలు కోరితే సహకరిస్తామని స్పష్టం చేసింది. L3కు ఇంగ్లండ్‌లో సౌతాంప్టన్‌, బోర్న్‌మౌత్‌ ప్రాంతాల్లో ప్రధాన శిక్షణ కేంద్రాలతో పాటు గాట్విక్‌ సమీపంలో సిమ్యులేటర్‌ కేంద్రం కూడా ఉంది.

న్యూజిలాండ్‌లో ఆరు నెలలు

హమామ్‌ శిక్షణలో మరో ముఖ్యమైన దశ న్యూజిలాండ్‌లో సాగింది. న్యూజిలాండ్‌ పోలీసుల ప్రకారం, అతడు 2018 నవంబర్‌ నుంచి 2019 మే వరకు ఆరు నెలలు విద్యార్థి వీసాపై అక్కడ ఉన్నాడు. అక్కడ బ్రిటన్‌కు చెందిన ఒక సంస్థ కోసం విమాన శిక్షణలోని కొంత భాగాన్ని పూర్తి చేసినట్లు పోలీసులు వెల్లడించారు. అయితే ఆ సంస్థ ప్రస్తుతం న్యూజిలాండ్‌లో కార్యకలాపాలు నిర్వహించడం లేదు. అంటే పైలట్‌ కావడానికి అతడి ప్రయాణం ఒకే దేశానికి పరిమితం కాలేదు. బ్రిటన్‌, న్యూజిలాండ్‌ వంటి దేశాల్లో శిక్షణ పొందిన వ్యక్తిగా అతడు తర్వాత విమానయాన రంగంలోకి ప్రవేశించాడు.

ఆస్ట్రేలియా లింకులపై దర్యాప్తు

ఇక హమామ్‌కు ఆస్ట్రేలియాతో ఉన్న సంబంధాలపైనా అధికారులు దృష్టి పెట్టారు. ఆస్ట్రేలియన్‌ ఫెడరల్‌ పోలీస్‌ (AFP) ప్రకారం, విక్టోరియా జాయింట్‌ కౌంటర్‌ టెర్రరిజం టీమ్‌ ఈ లింకులను పరిశీలిస్తోంది. ఈ బృందంలో AFPతో పాటు విక్టోరియా పోలీస్‌, ASIO కూడా ఉన్నాయి. దర్యాప్తు ప్రస్తుతం అతడి ఆస్ట్రేలియా సంబంధాలు, అక్కడి కార్యకలాపాలు, ప్రయాణ వివరాలు వంటి అంశాలపై సాగుతోంది.

మెల్‌బోర్న్‌ యూనివర్సిటీలోనూ చదువు

హమామ్‌ మెల్‌బోర్న్‌లోని RMIT యూనివర్సిటీలో కూడా చదివినట్లు రాయిటర్స్‌ పేర్కొంది. యూనివర్సిటీ కూడా ఈ ఘటనలో ఆరోపణలు ఎదుర్కొంటున్న మాజీ విద్యార్థి తమ వద్ద నమోదు చేసుకున్నట్లు ధృవీకరించింది. అయితే అతడు ఇంజినీరింగ్‌ కోర్సును పూర్తి చేయలేదని RMIT తెలిపింది. మాజీ విద్యార్థి పేరు మాత్రం యూనివర్సిటీ అధికారికంగా వెల్లడించలేదు.

ఇప్పుడు అసలు ప్రశ్న ఇదే..

ఈ ఘటనతో విమానయాన భద్రతపై కీలకమైన ప్రశ్నలు తలెత్తుతున్నాయి. పైలట్‌ శిక్షణ ఒక దేశంలో, విద్య మరో దేశంలో, మరో దేశంలో వృత్తిపరమైన ప్రయాణం.. ఇలా ఒక వ్యక్తి అనేక అంతర్జాతీయ వ్యవస్థలతో అనుసంధానమైనప్పుడు అతడి నేపథ్యాన్ని పూర్తిగా పరిశీలించడం ఎంతవరకు సాధ్యమన్నది ఇప్పుడు చర్చనీయాంశంగా మారింది. అయితే హమామ్‌ అల్‌-హమ్మామీపై ఉన్న ఆరోపణలు, అతడి గతానికి సంబంధించిన వివరాలపై దర్యాప్తు ఇంకా కొనసాగుతోంది. కాక్‌పిట్‌లో అసలు ఏం జరిగింది? దాడికి కారణం ఏమిటి? ముందుగా ఎలాంటి సంకేతాలు కనిపించాయా? అనే ప్రశ్నలకు దర్యాప్తు పూర్తయిన తర్వాతే స్పష్టమైన సమాధానాలు వచ్చే అవకాశం ఉంది. ఒక విషయం మాత్రం స్పష్టంగా కనిపిస్తోంది. వేల అడుగుల ఎత్తులో ప్రయాణించే విమానంలో భద్రత అనేది కేవలం ప్రయాణికుల తనిఖీలతో ముగిసిపోయే అంశం కాదు. కాక్‌పిట్‌లోకి వెళ్లే ప్రతి వ్యక్తి నేపథ్యం, శిక్షణ, ప్రవర్తనపై నిరంతర పర్యవేక్షణ ఎంత కీలకమో FZ1073 ఘటన మరోసారి గుర్తు చేస్తోంది.