Saudi Arabia :సౌదీ అరేబియా విమానాశ్రయంపై క్షిపణి దాడి, 12 మంది మృతి

Saudi Arabia : ప్రశాంతంగా సాగిపోతున్న రాజధాని నగరంలో ఒక్కసారిగా పెను విషాదం అలుముకుంది. విమానాల రాకపోకలతో ఎప్పుడూ రద్దీగా ఉండే అంతర్జాతీయ విమానాశ్రయం క్షణాల వ్యవధిలో భయానక యుద్ధ వాతావరణాన్ని తలపించింది. సౌదీ అరేబియా రాజధాని రియాద్‌లోని కింగ్ ఖలీద్ అంతర్జాతీయ విమానాశ్రయంపై హూతీ తిరుగుబాటుదారులు జరిపిన అత్యంత హేయమైన క్షిపణి దాడి ప్రపంచాన్ని దిగ్భ్రాంతికి గురిచేసింది.

సౌదీ అరేబియా జనరల్ అథారిటీ ఆఫ్ సివిల్ ఏవియేషన్ వెల్లడించిన వివరాల ప్రకారం.. ఈ భీకర దాడిలో ప్రాణనష్టం భారీగానే సంభవించింది. ఈ దుర్ఘటనలో కనీసం 12 మంది ప్రాణాలు కోల్పోయారు. మృతులలో నలుగురు సౌదీ పౌరులు కాగా, మిగతావారు వివిధ దేశాలకు చెందిన విదేశీ నివాసితులు ఉన్నారు. ఇందులో బంగ్లాదేశ్ (2), అమెరికా, ఈజిప్ట్, జోర్డాన్, సిరియా, పాలస్తీనా, సూడాన్ దేశస్థులు ఉన్నారు.ఈ దాడిలో 309 మందికి పైగా తీవ్రంగా గాయపడ్డారు. వీరిలో కొందరి పరిస్థితి విషమంగా ఉండటంతో మృతుల సంఖ్య మరింత పెరిగే అవకాశం ఉందని వైద్య వర్గాలు ఆందోళన వ్యక్తం చేస్తున్నాయి. క్షతగాత్రులందరినీ సమీప ఆసుపత్రులకు తరలించి అత్యవసర చికిత్స అందిస్తున్నారు.

యెమెన్‌లోని ఇరాన్ మద్దతుగల హూతీ రెబెల్స్‌పై సౌదీ నేతృత్వంలోని కూటమి బలగాలు పెద్దఎత్తున సైనిక చర్యకు దిగడంతో ఈ ఉద్రిక్తతలు తారాస్థాయికి చేరాయి. గత వారం రోజులుగా రియాద్ విమానాశ్రయాన్నే లక్ష్యంగా చేసుకుని వరుస దాడులకు ప్రయత్నిస్తున్న హూతీలు, తాజాగా ఈ భారీ నష్టాన్ని సృష్టించారు.

భద్రతా కారణాల దృష్ట్యా అధికారులు తక్షణమే అప్రమత్తమై విమానాశ్రయ కార్యకలాపాలను తాత్కాలికంగా నిలిపివేశారు. టెర్మినల్స్‌లోని ప్రయాణికులను సురక్షిత ప్రాంతాలకు ఖాళీ చేయించారు. ఈ ఘటనతో వందలాది విమానాలు రద్దు కాగా, మరికొన్నింటిని ఇతర ప్రాంతాలకు దారి మళ్లించారు. దీంతో విమానాశ్రయ పరిసర ప్రాంతాల్లో ఎక్కడ చూసినా ప్రయాణికుల ఆందోళనలు, గందరగోళ పరిస్థితులు నెలకొన్నాయి.

ఈ తీవ్ర పరిణామంపై రియాద్‌లోని అమెరికా , యూకే రాయబార కార్యాలయాలు తీవ్రంగా స్పందించాయి. ఈ ప్రాంతంలో భద్రతా పరిస్థితి పూర్తిగా దిగజారినందున, తమ దేశ పౌరులు ఎవరూ విమానాశ్రయ పరిసర ప్రాంతాలకు వెళ్లవద్దని, సురక్షిత ప్రాంతాల్లోనే తలదాచుకోవాలని అత్యవసర భద్రతా హెచ్చరికలు జారీ చేశాయి. మధ్యప్రాచ్యంలో రాజుకుంటున్న ఈ సరికొత్త యుద్ధ మేఘాలు రాబోయే రోజుల్లో ఎలాంటి పరిణామాలకు దారితీస్తాయోనని అంతర్జాతీయ సమాజం తీవ్ర ఆందోళన వ్యక్తం చేస్తోంది.