Imran Khan: ఇమ్రాన్‌ ఖాన్‌కు బిగ్ రిలీఫ్.. వెంటనే ఆస్పత్రికి తరలించాలని కోర్టు ఆదేశం!

Imran Khan: జైలులో ఉన్న పాకిస్థాన్‌ మాజీ ప్రధాని, పాకిస్థాన్‌ తెహ్రీక్‌ ఏ ఇన్సాఫ్‌ (PTI) అధినేత ఇమ్రాన్‌ ఖాన్‌కు అక్కడి అత్యున్నత న్యాయస్థానంలో భారీ ఊరట లభించింది. ఆయన ఆరోగ్యం రోజురోజుకూ క్షీణిస్తుండటంతో, వెంటనే తగిన వైద్య సహాయం కోసం ఆస్పత్రికి తరలించాలని న్యాయస్థానం ప్రభుత్వ అధికారులను ఆదేశించింది. ఆయన వైద్య నివేదికలను ఆధారంగా చేసుకుని కుటుంబ సభ్యులు, పీటీఐ నాయకులు తీవ్ర ఆందోళన వ్యక్తం చేస్తున్న నేపథ్యంలో కోర్టు ఈ కీలక నిర్ణయం తీసుకుంది.

న్యాయస్థానం ఆదేశాలను పీటీఐ అధికార ప్రతినిధి జుల్ఫికర్ బుఖారీ స్వాగతించారు. ఈ చర్యలు ముందే తీసుకుని ఉంటే ఆయన ఆరోగ్యం ఇంతగా క్షీణించి ఉండేది కాదని అభిప్రాయపడ్డారు. ఇమ్రాన్‌ పూర్తిగా కోలుకునే వరకు ప్రైవేట్ వైద్యుల సంరక్షణలోనే ఉంచాలని కోర్టును కోరారు.

పాకిస్థాన్ మాజీ అధ్యక్షుడు ఆరిఫ్‌ అల్వీ స్పందిస్తూ, ఇమ్రాన్ వైద్య నివేదికలను నిపుణులతో కలిసి పరిశీలించినట్లు తెలిపారు. మూడేళ్ల జైలు జీవితం, ఏకాంతం వల్ల ఆయన తీవ్ర ఒత్తిడి, మానసిక, శారీరక సమస్యలను ఎదుర్కొంటున్నారని పేర్కొన్నారు. గత ఏడు నెలలుగా బయటి ప్రపంచంతో ఎలాంటి సంబంధం లేకపోవడం వల్లే ఆయన కుంగిపోతున్నారని ఆవేదన వ్యక్తం చేశారు.

ఇమ్రాన్‌ ఖాన్‌ను వెంటనే విడుదల చేయాలని డిమాండ్‌ చేస్తూ పీటీఐ కార్యకర్తలు, మద్దతుదారులు పాకిస్థాన్‌ వ్యాప్తంగా ఆందోళనలు చేపట్టారు.

తోషాఖానా, అల్-ఖాదిర్ ట్రస్ట్ కేసులతో పాటు పలు ఇతర కేసుల్లో శిక్షపడిన ఇమ్రాన్‌ ఖాన్‌ ప్రస్తుతం రావల్పిండిలోని ప్రసిద్ధ ఆడియాలా జైలులో శిక్ష అనుభవిస్తున్నారు.