Terrorist Attack: ఉగ్రవాదుల నరమేధం.. రాత్రికి రాత్రే గ్రామంపై పడి ఏకంగా 33 మంది హత్య

Terrorist Attack: మధ్య ఆఫ్రికా దేశమైన కాంగోలో ఇస్లామిక్ స్టేట్ ఉగ్రవాదులు మరోసారి తమ రాక్షసత్వాన్ని ప్రదర్శించారు. కాంగో దేశపు తూర్పు ప్రాంతంలో ఉన్న ఒక మారుమూల గ్రామంపై గురువారం రాత్రి ఉగ్రవాదులు అకస్మాత్తుగా విరుచుకుపడ్డారు. ఎలాంటి ముందస్తు హెచ్చరికలు లేకుండా గ్రామంలోకి ప్రవేశించి ఇళ్లపై విచక్షణారహితంగా కాల్పులు జరిపారు. ఈ హేయమైన చర్యలో చిన్న పిల్లలు, మహిళలు సహా కనీసం 33 మంది సామాన్య ప్రజలు ప్రాణాలు కోల్పోయారు. కాల్పుల మోతతో ఆ ప్రాంతమంతా ఒక్కసారిగా భీతావహ వాతావరణం సంతరించుకుంది.

50కి పైగా ఇళ్లను దహనం చేసిన మూకలు

కేవలం కాల్పులు జరపడంతోనే ఆగిపోకుండా ఉగ్రవాదులు గ్రామంలోని ఇళ్లను టార్గెట్ చేసుకున్నారు. ఏకంగా 50కి పైగా నివాస గృహాలను పెట్రోల్ పోసి పూర్తిగా దహనం చేశారు. ఇళ్లలోని విలువైన వస్తువులను, ఆహార పదార్థాలను దోచుకెళ్లారు. స్థానిక పౌర సమాచార సంఘం నాయకుడు అందించిన వివరాల ప్రకారం, ఈ దారుణకాండకు పాల్పడింది అలీడ్ డెమోక్రటిక్ ఫోర్సెస్(ADF) ఉగ్రవాద సంస్థే. ఈ సంస్థ గత కొన్ని సంవత్సరాలుగా ఐఎస్ ఉగ్రవాదులతో సంబంధాలు కలిగి ఉంటూ సరిహద్దు ప్రాంతాలలో శాంతిభద్రతలకు తీవ్ర విఘాతం కలిగిస్తోంది.

భద్రతా బలగాల వైఫల్యమే కారణమంటూ విమర్శలు

ఉగ్రవాదులు ఇంత భారీ స్థాయిలో దాడికి పాల్పడటం ప్రభుత్వ యంత్రాంగం, భద్రతా బలగాల పెద్ద వైఫల్యమేనని స్థానికులు తీవ్రంగా మండిపడుతున్నారు. ఆ ప్రాంతంలో సైన్యం పెద్ద సంఖ్యలో మోహరించినప్పటికీ, ఉగ్రమూకలు సులభంగా లోపలికి ఎలా ప్రవేశించగలిగాయనే ప్రశ్నలు వ్యక్తమవుతున్నాయి. రక్షణ వ్యవస్థలోని లోపాలను ఆసరాగా చేసుకుని ఉగ్రవాదులు అమాయక పౌరులను బలిగొంటున్నారని, అధికారులు వెంటనే కఠిన చర్యలు తీసుకోవాలని పౌర సంఘాలు డిమాండ్ చేస్తున్నాయి.

నిరాశ్రయులైన ప్రజలపై ఇబోలా మహమ్మారి భయం

ఈ హింసాకాండ కారణంగా వేలాది మంది గ్రామీణులు సర్వస్వం కోల్పోయి సురక్షిత ప్రాంతాలకు వలస వెళ్లాల్సి వస్తోంది. అయితే వారు ఆశ్రయం పొందుతున్న ప్రాంతాలలో కూడా మరో పెద్ద ప్రమాదం పొంచి ఉంది. నార్త్ కీవూ ప్రావిన్స్ ఇప్పటికే అత్యంత ప్రమాదకరమైన ఇబోలా వైరస్ బారిన పడి విలవిలలాడుతోంది. హింస కారణంగా నిరాశ్రయులైన ప్రజలకు వైద్య సాయం అందించడం కూడా కష్టతరంగా మారింది. వైరస్ తీవ్రంగా ఉన్న ప్రాంతాలకు ప్రజలు వలస వెళ్లడం వల్ల ఆరోగ్య సంక్షోభం మరింత ముదిరే అవకాశం ఉంది.

అంతర్జాతీయ సమాజం జోక్యం చేసుకోవాలని విజ్ఞప్తి

కాంగో దేశంలో ఇప్పటికే వందకు పైగా విద్రోహ గ్రూపులు సంచరిస్తూ అంతర్గత కలహాలకు కారణమవుతున్నాయి. రువాండా మద్దతు ఉన్న ఎం23 వంటి వేర్పాటువాద సంస్థలు కొన్ని ప్రాంతాలను తమ ఆధీనంలో ఉంచుకున్నాయి. నిత్యం జరుగుతున్న ఈ అంతర్యుద్ధాలు, ఉగ్రదాడిల వల్ల దేశ ఆర్థిక వ్యవస్థతో పాటు సాధారణ ప్రజల జీవితాలు అంధకారంలోకి నెట్టబడుతున్నాయి. ఈ క్లిష్ట పరిస్థితిని చక్కదిద్దడానికి ఐక్యరాజ్యసమితితో పాటు అంతర్జాతీయ సమాజం తక్షణమే స్పందించి శాంతిభద్రతలను కాపాడాలని మానవ హక్కుల సంఘాలు కోరుతున్నాయి.