Japan: జపాన్ సరికొత్త చరిత్ర.. రికార్డు స్థాయిలో వందేళ్లు దాటిన పౌరులు

Japan Population: ఆయుర్దాయంలో ప్రపంచానికే ఆదర్శంగా నిలుస్తూ జపాన్ సరికొత్త చరిత్ర సృష్టించింది. ఒకవైపు వందేళ్లు దాటిన పౌరుల సంఖ్య రికార్డు స్థాయిలో లక్ష దాటిపోతుంటే.. మరోవైపు పడిపోతున్న జననాల రేటు ఆ దేశాన్ని తీవ్రమైన జనాభా సంక్షోభంలోకి నెడుతోంది. గత కొన్ని దశాబ్దాలుగా ప్రపంచ దృష్టిని ఆకర్షిస్తున్న జపాన్ జనాభా గణాంకాలపై ఆరోగ్యకరమైన, అదే సమయంలో ఆందోళన కలిగించే వాస్తవాలు వెలుగులోకి వచ్చాయి.

సెప్టెంబర్ 1 నాటి అధికారిక గణాంకాల ప్రకారం, జపాన్‌లో 100 ఏళ్లు లేదా అంతకంటే ఎక్కువ వయస్సు ఉన్నవారి సంఖ్య 1,07,677కి చేరింది. గత ఏడాదితో పోలిస్తే వీరి సంఖ్య ఏకంగా 7,914 పెరగడం విశేషం. కాగా, ఈ రికార్డులు ప్రారంభమైన 1963లో అప్పట్లో కేవలం 153 మంది మాత్రమే శతాధికులు ఉండటం గమనార్హం.

ఇక ఈ వృద్ధుల జాబితాలో మహిళలదే సింహభాగం కావడం మరో విశేషం. మొత్తం శతాధికులలో ఏకంగా 87.6 శాతం (94,298 మంది) మహిళలే ఉండగా, పురుషులు 13,379 మంది మాత్రమే ఉన్నారు. క్యోటోకు చెందిన 114 ఏళ్ల ఫుయో కిషిమోటో దేశంలోనే అత్యంత వృద్ధురాలైన మహిళగా నిలవగా, 112 ఏళ్ల హికారు కాటో అత్యంత వృద్ధుడైన పురుషుడిగా రికార్డు సృష్టించారు.

జపాన్ ప్రజలు ఇన్ని వందల సంవత్సరాలు జీవించడానికి వారి జీవనశైలి మరియు ఆరోగ్య విధానాలే కారణం. ప్రపంచ స్థాయి వైద్య సదుపాయాలు పౌరులకు అందుబాటులో ఉండటం.సాంప్రదాయ ఆహారంలో చేపలు, తాజా కూరగాయలకు ఎక్కువ ప్రాధాన్యత ఇవ్వడం. చిన్న వయస్సు నుంచే ఫిట్‌నెస్, క్రమశిక్షణతో కూడిన దైనందిన జీవితాన్ని గడపడం.

ఒకవైపు పౌరుల ఆయుర్దాయం పెరిగి దేశం గర్వపడుతుంటే, మరోవైపు జపాన్ ఒక తీవ్రమైన జనాభా సంక్షోభాన్ని ఎదుర్కొంటోంది. దేశంలో సంతానోత్పత్తి రేటు మరియు జననాల సంఖ్య గణనీయంగా పడిపోవడంతో.. 65 ఏళ్లు పైబడిన వారి సంఖ్య ఇప్పటికే 30 శాతానికి చేరింది. నిపుణుల అంచనాల ప్రకారం.. 2070 నాటికి జపాన్ జనాభా 87 మిలియన్లకు పడిపోవడమే కాకుండా, దేశంలో వృద్ధుల వాటా ఏకంగా 40 శాతానికి చేరుకోనుంది.

వృద్ధుల సంఖ్య విపరీతంగా పెరగడం వల్ల పెన్షన్ల చెల్లింపులు, ఆరోగ్య సంరక్షణ వ్యయం విపరీతంగా పెరుగుతున్నాయి. ఇది సామాజిక భద్రతా వ్యవస్థపై తీవ్ర ఆర్థిక ఒత్తిడిని సృష్టిస్తోంది. పిల్లల పెంపకానికి పెరుగుతున్న ఖర్చులు, మారుతున్న వివాహ పద్ధతుల కారణంగా జపాన్‌లో జననాల రేటు అడుగంటుతోంది. ఈ లోటును పూడ్చేందుకు ప్రభుత్వం విదేశీ నివాసితుల సంఖ్యను క్రమంగా పెంచుతున్నప్పటికీ, జనాభా సమతుల్యతను కాపాడుకోవడం మాత్రం జపాన్‌కు అతిపెద్ద సవాలుగా మారింది.

దీర్ఘాయువును ప్రసాదించిన విజ్ఞానంతో పాటు, పడిపోతున్న జననాల రేటును అడ్డుకునే సరైన విధానాలను రూపొందించకపోతే.. భవిష్యత్తులో ఈ వృద్ధుల దేశం మరిన్ని ఆర్థిక, సామాజిక ఇబ్బందులను ఎదుర్కోవాల్సి వస్తుందని నిపుణులు హెచ్చరిస్తున్నారు.