Java Sea Ship Missing: సముద్రంలో షిప్ మిస్సింగ్.. నౌకలో 240 మంది..

Java Sea Ship Missing: ఇండోనేషియాలోని జావా సముద్రం వేదికగా ఒక్కసారిగా తీవ్ర దిగ్భ్రాంతికర పరిణామం చోటుచేసుకుంది. 240 మందికి పైగా ప్రయాణికులతో ప్రయాణిస్తున్న ఒక భారీ ప్యాసింజర్ నౌక సముద్రం మధ్యలో ఉన్నట్టుండి గల్లంతైంది. తూర్పు జావా ప్రావిన్స్ నుంచి బోర్నియో ద్వీపంలోని సౌత్ కాళీమంతన్ ప్రావిన్స్‌కు వెళ్తుండగా ఆదివారం తెల్లవారుజామున ఈ దుర్ఘటన జరిగింది. నౌకతో కమ్యూనికేషన్ పూర్తిగా తెగిపోవడంతో ఇండోనేషియా సెర్చ్ అండ్ రెస్క్యూ ఏజెన్సీలు తక్షణమే అప్రమత్తమై రంగంలోకి దిగాయి.

రాడార్ల నుంచి అదృశ్యమైన 'వర్గో ట్రాన్స్‌పోర్ట్ 8'

సౌత్ కాళీమంతన్ ప్రావిన్స్‌లోని బంజార్‌మాసిన్ రెస్క్యూ అధికారుల సమాచారం ప్రకారం గల్లంతైన ఆ నౌకను 'వర్గో ట్రాన్స్‌పోర్ట్ 8'గా గుర్తించారు. తూర్పు జావాలోని ప్రముఖ ఓడరేవు నగరం సురబయా నుంచి శనివారం ఉదయం 10:13 గంటలకు బయలుదేరిన ఈ నౌక, ఆదివారం తెల్లవారుజామున సుమారు 2 గంటల ప్రాంతంలో రాడార్ సిగ్నల్స్ నుంచి అకస్మాత్తుగా మాయమైంది. కమ్యూనికేషన్ కట్ అయిన రెండు గంటల వ్యవధిలోనే నౌకా యాజమాన్యం రెస్క్యూ అధికారులకు సమాచారాన్ని అందించింది.

విపరీతమైన గాలులు, రాకాసి అలల దాడి

ప్రయాణ సమయంలో సముద్రంలో వాతావరణం దారుణంగా మారిపోయిందని బంజార్‌మాసిన్ సెర్చ్ అండ్ రెస్క్యూ ఆఫీస్ హెడ్ ఐ పుటు సుదయానా మీడియాకు తెలిపారు. తీవ్రమైన గాలులు, ఎగిసిపడ్డ రాకాసి అలల వల్ల నౌక తీవ్ర ముప్పును ఎదుర్కొన్నట్లు నౌకా ఆపరేటర్ల నుంచి ప్రాథమిక సమాచారం అందింది. నౌక నుంచి చివరిగా అందిన సందేశం ప్రకారం, అది బంజార్‌మాసిన్ రేవుకు దాదాపు 148 కిలోమీటర్ల (92 మైళ్లు) దూరంలో ఉన్నట్లు గుర్తించారు.

ప్రమాదంలో 241 మంది ప్రాణాలు - విస్తృతంగా గాలింపు చర్యలు

షిప్ ప్రయాణికుల జాబితా ప్రకారం అందులో మొత్తం 241 మంది ప్రయాణికులు, నౌకా సిబ్బంది ఉన్నారు. ప్రమాద తీవ్రత దృష్ట్యా ఇండోనేషియా ప్రభుత్వం దీనిని అత్యంత అత్యవసర ఘటనగా పరిగణిస్తోంది. 'పిటి వర్గో యోయెల్ రిహి' యాజమాన్యం ప్రమాదాన్ని ధృవీకరించిన వెంటనే బాసిరిహ్ పీర్ నుంచి ప్రత్యేక రెస్క్యూ బృందాలు బయలుదేరాయి. హెలికాప్టర్లు, ప్రత్యేక బోట్లు, ఆధునిక సాంకేతిక పరిజ్ఞానంతో రెస్క్యూ ఆపరేషన్‌ను వేగవంతం చేశారు. ఇండోనేషియా నేవీ, మేరీటైమ్ అథారిటీలతో కలిసి సహాయక చర్యలు కొనసాగుతున్నాయి. ప్రయాణికుల క్షేమంపై ప్రపంచవ్యాప్తంగా తీవ్ర ఆందోళన వ్యక్తమవుతోంది.