Lufthansa: ఎయిర్‌పోర్టులో షాకింగ్ ఘటన.. రన్‌వేపై బోర్లా పడిన లుఫ్తాన్సా బోయింగ్ విమానం!

Lufthansa: ఫ్రాంక్‌ఫర్ట్‌ అంతర్జాతీయ విమానాశ్రయంలో (Frankfurt Airport) గురువారం ఒక ఊహించని విమాన ప్రమాదం చోటుచేసుకుంది. రన్‌వే పక్కన గేటు వద్ద పార్కింగ్‌లో నిలిపి ఉంచిన ప్రముఖ లుఫ్తాన్సా (Lufthansa) ఎయిర్‌లైన్స్‌కు చెందిన ఓ బోయింగ్ విమానం ఉన్నట్టుండి నేలపైకి ఒరిగింది. విమానం ముందుభాగం రన్‌వేను బలంగా ఢీకొట్టిన ఈ భయానక ఘటనకు సంబంధించిన దృశ్యాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.

లుఫ్తాన్సా ఎయిర్‌లైన్స్‌కు చెందిన బోయింగ్‌ 787-9 (Boeing 787-9 Dreamliner) విమానం ఫ్రాంక్‌ఫర్ట్‌ నుంచి అమెరికాలోని లాస్‌ ఏంజెలెస్‌కు బయలుదేరాల్సి ఉంది. ఈ క్రమంలో ప్రయాణికులను ఎక్కించుకోవడానికి ముందు ఫ్రాంక్‌ఫర్ట్‌ ఎయిర్‌పోర్ట్ గేటు వద్ద విమానాన్ని పార్క్‌ చేసి ఉంచారు. అయితే సాంకేతిక లోపం కారణంగా విమానం ముందు వైపు ఉండే ల్యాండింగ్‌ గేర్ (Nose Gear) ఉన్నట్టుండి ఒక్కసారిగా విరిగిపోయింది. దీంతో భారీ విమానం ముందుభాగం నియంత్రణ కోల్పోయి నేరుగా నేలపైకి ఒరిగిపోయింది.

"ప్రమాదం జరిగిన సమయంలో అదృష్టవశాత్తూ విమానంలో ప్రయాణికులు (Passengers) ఎవరూ లేరు. అయితే, విమానంలో తనిఖీలు నిర్వహిస్తున్న పలువురు విమానయాన సిబ్బంది (Cabin Crew)తో పాటు రన్‌వేపై విధులు వర్తిస్తున్న గ్రౌండ్‌ స్టాఫ్‌ లోపల ఉన్నారు. ల్యాండింగ్ గేర్ విరిగిపడిన షాక్‌కు వీరంతా కిందపడిపోవడంతో గాయాలయ్యాయి." గాయపడిన సిబ్బందిని ఎయిర్‌పోర్ట్ రెస్క్యూ టీమ్ వెంటనే సమీపంలోని ఆసుపత్రికి తరలించి అత్యవసర చికిత్స అందిస్తున్నారు.

ఈ ప్రమాదం ధాటికి బోయింగ్ 787-9 విమానం ముందుభాగం మరియు దాని కింది భాగాలు తీవ్రంగా దెబ్బతిన్నట్లు విమానయాన అధికారులు పేర్కొన్నారు. ఎంతో సురక్షితమైనదిగా భావించే బోయింగ్ డ్రీమ్‌లైనర్ విమానానికి పార్కింగ్‌లో ఉండగానే ల్యాండింగ్ గేర్ ఎలా విరిగిపోయిందనే అంశంపై విమానయాన రంగ నిపుణులు ఆశ్చర్యం వ్యక్తం చేస్తున్నారు. ఈ ప్రమాదానికి గల ఖచ్చితమైన కారణాలు ఇంకా తెలియరాలేదని, దీనిపై ఉన్నత స్థాయి దర్యాప్తును ప్రారంభించినట్లు జర్మనీ విమానయాన భద్రతా అధికారులు వెల్లడించారు.