Mecca Red Alert: మక్కాలో హైఅలర్ట్‌... డ్రోన్‌ దాడులతో అతలాకుతలం

Mecca Red Alert: మక్కాపై డ్రోన్ దాడికి ప్రయత్నం జరిగిందన్న వార్త సౌదీ అరేబియాలో తీవ్ర కలకలం రేపింది. ఇస్లాం పవిత్ర నగరమైన మక్కాకు దక్షిణంగా హౌతీలు ప్రయోగించిన డ్రోన్‌ను తమ వైమానిక రక్షణ వ్యవస్థ అడ్డుకుందని సౌదీ అరేబియా ప్రకటించింది. డ్రోన్ మక్కా నిషేధిత గగనతలంలోకి ప్రవేశించకముందే దాన్ని కూల్చివేసినట్లు తెలిపింది. ఈ ఘటన తర్వాత మక్కాతో పాటు జెడ్డా, తాయిఫ్ ప్రాంతాల్లో కొద్దిసేపు హైఅలర్ట్‌ ప్రకటించారు. మక్కాలో చరిత్రలో తొలిసారిగా ‘రెడ్ అలర్ట్’ జారీ చేసినట్లు వచ్చిన నివేదికలు ఈ ఘటన తీవ్రతను మరింత పెంచాయి.

మక్కా భద్రతపై సౌదీ కీలక ప్రకటన

మక్కా భద్రత విషయంలో ఎలాంటి రాజీ ఉండదని సౌదీ నేతృత్వంలోని సంకీర్ణ దళాల అధికార ప్రతినిధి తుర్కీ అల్ మాలికీ స్పష్టం చేశారు. ఈ దాడి ప్రయత్నాన్ని తీవ్రంగా ఖండించిన ఆయన.. హౌతీలపై అవసరమైన నిరోధక చర్యలు తీసుకుంటామని హెచ్చరించారు. మక్కా ప్రపంచవ్యాప్తంగా కోట్లాది మంది ముస్లింలకు అత్యంత పవిత్రమైన నగరం. ఇక్కడే గ్రాండ్ మసీదు, కాబా వంటి పవిత్ర స్థలాలు ఉన్నాయి. ప్రతి సంవత్సరం ప్రపంచం నలుమూలల నుంచి లక్షలాది మంది హజ్ యాత్ర కోసం మక్కాకు చేరుకుంటారు. అందుకే ఈ నగరంపై ఎలాంటి దాడి ప్రయత్నమైనా సాధారణ సైనిక ఘటనగా కాకుండా అత్యంత సున్నితమైన అంశంగా పరిగణిస్తారు. సౌదీ అధికారి ప్రకారం.. మక్కాను లక్ష్యంగా చేసుకుని బాలిస్టిక్ క్షిపణి ప్రయోగం 2017 జూలైలోనూ జరిగిందని ఆరోపణలు ఉన్నాయి. తాజా ఘటనతో ఆ పాత ఉదంతం మరోసారి చర్చకు వచ్చింది.

‘మక్కాపై దాడి చేయలేదు’.. హౌతీల ఖండన

అయితే సౌదీ చేసిన ఆరోపణలను హౌతీలు పూర్తిగా తిరస్కరించారు. తమకు మక్కాను లక్ష్యంగా చేసుకునే ఉద్దేశం లేదని హౌతీ ప్రతినిధి హజెమ్ అల్ అసద్ తెలిపారు. మక్కాపై దాడి చేశారన్న ప్రచారం అవాస్తవమని, గతంలోనూ ఇలాంటి ఆరోపణలు వచ్చాయని పేర్కొన్నారు. అంటే ప్రస్తుతం ఈ ఘటనకు సంబంధించి రెండు విభిన్న వాదనలు ఉన్నాయి. సౌదీ మాత్రం తమ వైమానిక రక్షణ వ్యవస్థ హౌతీ డ్రోన్‌ను అడ్డుకుందని చెబుతుండగా.. హౌతీలు ఆ ఆరోపణనే ఖండిస్తున్నారు.

57 దేశాల సంస్థ నుంచి ఖండన

ఈ ఘటనపై 57 ముస్లిం మెజారిటీ దేశాలకు ప్రాతినిధ్యం వహించే ఇస్లామిక్ కోఆపరేషన్ ఆర్గనైజేషన్ స్పందించింది. సౌదీ అరేబియాపై కొనసాగుతున్న దాడులను ఖండించిన OIC.. పవిత్ర ప్రార్థనా స్థలాల భద్రతకు ముప్పు కలిగించే చర్యలను తీవ్రంగా వ్యతిరేకించింది. ఇటువంటి దాడులు సాధారణ ప్రజల్లో భయాన్ని పెంచుతాయని పేర్కొంది. మరోవైపు అమెరికా రాయబార కార్యాలయం సౌదీ అరేబియాకు వెళ్లే విషయంలో ప్రయాణికులు జాగ్రత్తగా వ్యవహరించాలని సూచించింది. ముఖ్యంగా యెమెన్ సరిహద్దు ప్రాంతానికి ఉగ్రవాద ముప్పు ఉన్నందున అక్కడికి వెళ్లవద్దని హెచ్చరించింది. డ్రోన్లు, క్షిపణి దాడులు, సాయుధ ఘర్షణలు వంటి ప్రమాదాలను కూడా తన సూచనల్లో ప్రస్తావించింది.

సౌదీ...హౌతీ మధ్య పోరు ముదరడానికి కారణం ఇదే?

సౌదీ అరేబియా, హౌతీల మధ్య ఘర్షణ కొత్తది కాదు. 2022లో ఐక్యరాజ్యసమితి మధ్యవర్తిత్వంతో ఏర్పడిన కాల్పుల విరమణ తర్వాత దాదాపు నాలుగేళ్ల పాటు పరిస్థితి కొంత ప్రశాంతంగా ఉంది. అయితే ఇటీవల సనా అంతర్జాతీయ విమానాశ్రయం రన్‌వేపై సౌదీ మద్దతు ఉన్న దళాల దాడి తర్వాత పరిస్థితులు మళ్లీ వేడెక్కాయి. హౌతీలు దీనిని 2022 అవగాహన ఒప్పందానికి విరుద్ధమైన చర్యగా అభివర్ణించారు. అనంతరం సౌదీ నౌకలను లక్ష్యంగా చేసుకుంటామని ప్రకటించడంతో ఉద్రిక్తతలు వేగంగా పెరిగాయి. బాబ్ అల్-మందబ్ జలసంధి చుట్టుపక్కల ప్రాంతాలపై హౌతీల ప్రభావం కూడా ఈ ఘర్షణకు కీలక అంశంగా మారింది. ఎర్ర సముద్రాన్ని గల్ఫ్ ఆఫ్ అడెన్‌తో కలిపే ఈ సముద్ర మార్గం ప్రపంచ వాణిజ్యానికి అత్యంత ముఖ్యమైనది. ఇక్కడ పరిస్థితులు అస్థిరంగా మారితే నౌకాయానం, చమురు రవాణా, అంతర్జాతీయ వాణిజ్యంపై ప్రభావం పడే అవకాశం ఉంటుంది.

ఇటీవల ఖమీస్ ముషైత్, అబ్హా, తాయిఫ్ వంటి సౌదీ నగరాలపై డ్రోన్ దాడులు జరిగినట్లు నివేదికలు వచ్చాయి. ఈ ఘటనల్లో 13 మంది పౌరులు గాయపడినట్లు సమాచారం. ఈ నేపథ్యంలో మక్కా సమీపంలో చోటుచేసుకున్న తాజా ఘటన సౌదీ భద్రతా వ్యవస్థకు మరో సవాలుగా మారింది. మొత్తంగా చూస్తే.. మక్కా విషయంలో సౌదీ అరేబియా అత్యంత అప్రమత్తంగా వ్యవహరిస్తోంది. హౌతీలు ఆరోపణలను ఖండిస్తున్నప్పటికీ, పవిత్ర నగరానికి సమీపంలో డ్రోన్ ముప్పు ఉందన్న వార్త అంతర్జాతీయంగా ఆందోళన కలిగించింది. సౌదీ-హౌతీ ఘర్షణ మళ్లీ విస్తరిస్తే దాని ప్రభావం యెమెన్‌కే పరిమితం కాకుండా ఎర్ర సముద్రం, గల్ఫ్ ప్రాంతం, అంతర్జాతీయ నౌకాయానంపైనా పడే అవకాశం ఉంది.