Melania Trump: ట్రంప్ భార్య మిస్సింగ్.. జులై 19 నుంచి కనిపించకుండా పోయిన అమెరికా ఫస్ట్ లేడీ

Melania Trump: అమెరికా ఫస్ట్ లేడీ మెలానియా ట్రంప్ గత కొంతకాలంగా బహిరంగ కార్యక్రమాలకు పూర్తిగా దూరంగా ఉండటం తీవ్ర చర్చనీయాంశంగా మారింది. జులై 19న జరిగిన ఫిఫా ప్రపంచకప్ ఫైనల్ తర్వాత ఆమె ఎక్కడా కనిపించకపోవడం, ఆమె స్థానంలో ట్రంప్ సలహాదారు నాటాలీ హార్ప్ నిరంతరం ప్రాధాన్యం సంతరించుకోవడం అంతర్జాతీయ మీడియాలో ఆసక్తి రేపుతోంది. బ్రిటిష్ ప్రముఖ పత్రిక ది ఇండిపెండెంట్ కథనం ప్రకారం అమెరికా ఫస్ట్ లేడీ మెలానియా ట్రంప్ పబ్లిక్ ఈవెంట్లకు దూరంగా ఉండటం తీవ్ర సందేహాలకు తావిస్తోంది. జులై 19, 2026న జరిగిన ఫిఫా వరల్డ్ కప్ ఫైనల్ మ్యాచ్‌లోనే ఆమె చివరిసారిగా కెమెరాల ముందుకు వచ్చారు. ఆ తర్వాతి కాలంలో అధ్యక్షుడు డోనాల్డ్ ట్రంప్ హాజరైన అనేక అత్యంత కీలకమైన జాతీయ, అంతర్జాతీయ వేదికలపై ఆమె ముఖం చూపించలేదు. సాధారణంగా దేశ అధ్యక్షుడితో పాటు పర్యటించాల్సిన ఫస్ట్ లేడీ ఇలా అకస్మాత్తుగా కనిపించకుండా పోవడం వెనుక అసలు కారణమేంటనే చర్చలు వైట్ హౌస్ వర్గాల్లో మొదలయ్యాయి.

కుటుంబ బాధ్యతలా? ఉద్దేశపూర్వక దూరమా?

మెలానియా ట్రంప్ ఇలా బహిరంగ వేదికలకు దూరంగా ఉండటం ఇదే మొదటిసారేమీ కాదు. 2026 ప్రారంభం నుంచి ఇప్పటివరకు ఆమె కేవలం 34 ప్రభుత్వ సంబంధిత కార్యక్రమాల్లో మాత్రమే పాల్గొన్నట్లు గణాంకాలు చెబుతున్నాయి. అంటే సగటున ప్రతి ఆరు రోజులకు ఒకసారి మాత్రమే ఆమె పబ్లిక్‌లోకి వచ్చారు. తన సమయాన్నంతటినీ ఫ్లోరిడా, న్యూయార్క్ నగరాల మధ్యే గడుపుతున్నట్లు సమాచారం. ఆమె కుమారుడు బారన్ ట్రంప్ న్యూయార్క్ విశ్వవిద్యాలయంలో చదువుతుండటంతో, తల్లిగా అతడి సంక్షేమం చూసుకోవడానికే ఆమె ఎక్కువ ప్రాధాన్యం ఇస్తున్నారని సన్నిహిత వర్గాలు చెబుతున్నాయి.

వెలుగులోకి వస్తున్న నాటాలీ హార్ప్ పేరు

మెలానియా గైర్హాజరీ ఒక ఎత్తయితే, ట్రంప్ పర్యటనల్లో ఆయన వెంట నీడలా కనిపిస్తున్న 35 ఏళ్ల నాటాలీ హార్ప్ వ్యవహారం మరో ఎత్తు. ట్రంప్‌కు అత్యంత నమ్మకమైన సలహాదారుగా గుర్తింపు పొందిన నాటాలీ, ఆయనతో పాటు అధికారిక చైనా పర్యటనకు కూడా వెళ్లారు. ముఖ్యమైన సమావేశాలు, బహిరంగ సభలు, ప్రయాణాల్లో నాటాలీ నిరంతరం ట్రంప్ సరసన కనిపిస్తున్నారు. ది న్యూయార్క్ టైమ్స్ విలేఖరులు మ్యాగీ హేబర్‌మాన్, జోనాథన్ స్వాన్ అందించిన వివరాల ప్రకారం నాటాలీ హార్ప్‌ను ట్రంప్ ఎంతగానో విశ్వసిస్తారు.

ట్రంప్ సోషల్ మీడియా వెనుక ముఖ్య సూత్రధారి

నాటాలీ హార్ప్ కేవలం పర్యటనలకే పరిమితం కాకుండా డోనాల్డ్ ట్రంప్‌కు చెందిన ట్రూత్ సోషల్ ఖాతాను నిర్వహించడంలోనూ కీలక పాత్ర పోషిస్తున్నారు. ట్రంప్ వ్యూహాలను అమలు చేయడంలో, ఆయన నిర్ణయాలను సమర్థించడంలో నాటాలీ చూపుతున్న చొరవ వల్లనే ఆయనకు ఆమెపై విపరీతమైన నమ్మకం ఏర్పడిందని సమాచారం. మెలానియా స్థానాన్ని అధికారికంగా కాకపోయినా, ప్రాధాన్యం పరంగా నాటాలీ భర్తీ చేస్తున్నారనే ప్రచారం అమెరికా రాజకీయాల్లో వేడి పుట్టిస్తోంది.