Nepal Flash Floods: నేపాల్‌లో భీకర మెరుపు వరదలు.. భోటెకోశీ నది ఉప్పొంగడంతో వందల మంది గల్లంతు!

Nepal Flash Floods: ఉత్తర నేపాల్‌లో బుధవారం ఉదయం సంభవించిన మెరుపు వరదలు తీవ్ర విషాదాన్ని నింపాయి. ఎలాంటి ముందస్తు హెచ్చరికలు లేకుండా ఒక్కసారిగా ముంచెత్తిన ఈ వరదల కారణంగా సరిహద్దుల్లోని పలు గ్రామాలు పూర్తిగా కొట్టుకుపోయాయి. ఇళ్లు, వంతెనలు, జలవిద్యుత్ ప్రాజెక్టులు, మార్కెట్ ప్రాంతాలు నీటమునిగి తీవ్ర నష్టం వాటిల్లింది.

ఈ విపత్తులో ఇప్పటివరకు ఏడుగురు ప్రాణాలు కోల్పోగా, వందల సంఖ్యలో ప్రజలు గల్లంతైనట్లు అధికారిక వర్గాలు మరియు మీడియా కథనాలు వెల్లడించాయి.

టిబెట్ వైపు నుంచి ఉద్భవించే భోటెకోశీ నది బుధవారం ఉదయం ఒక్కసారిగా ఉద్ధృతంగా ప్రవహించడంతో రసువా జిల్లా తీవ్రంగా ప్రభావితమైంది.

ఈ వరదలకు వర్షపాతం కారణం కాకపోవడం గమనార్హం. వాతావరణ శాఖ అధికారుల అంచనా ప్రకారం హిమానీనద సరస్సు విస్ఫోటం దీనికి కారణం కావచ్చని భావిస్తున్నారు.

ప్రభావిత ప్రాంతం అంతా పర్వతాలతో నిండి ఉండటంతో సహాయక చర్యలకు తీవ్ర అంతరాయం కలుగుతోంది. నేపాల్ ఆర్మీ రంగంలోకి దిగి హెలికాప్టర్ల ద్వారా సహాయక చర్యలు చేపట్టింది.

పరిస్థితి తీవ్రతను దృష్టిలో ఉంచుకుని ప్రధాని బాలెన్‌ షా అత్యవసర సమావేశాన్ని నిర్వహించి, అధికారులను అప్రమత్తం చేశారు. లోతట్టు జిల్లాల ప్రజలను సురక్షిత ప్రాంతాలకు తరలిస్తున్నారు.

గతేడాది కూడా ఇదే రసువా జిల్లాలో భోటెకోశీ నది ఉప్పొంగి 10 మంది ప్రాణాలు కోల్పోవడం గమనార్హం. ప్రస్తుతం అధికారుల బృందం వరదలకు అసలు కారణాలను విశ్లేషిస్తోంది.