Pakistan: పాకిస్తాన్‌లో ఆత్మాహుతి దాడి.. 24 మంది మృతి. ఇంత‌కీ దాడి చేసింది ఎవ‌రంటే?

Pakistan: పాకిస్తాన్‌లో మరోసారి తీవ్రవాద దాడి కలకలం రేపింది. బలోచిస్తాన్ ప్రావిన్స్ రాజధాని క్వెట్టాలో రైల్వే ట్రాక్ సమీపంలో జరిగిన భారీ పేలుడులో కనీసం 24 మంది మరణించారు. పలువురు తీవ్రంగా గాయపడినట్లు సమాచారం.

24 మంది మ‌ర‌ణించిన ఈ దాడికి తామే బాధ్యత వహిస్తున్నామని బలోచ్ లిబరేషన్ ఆర్మీ (BLA) ప్రకటించింది. పాకిస్తాన్ సైనిక సిబ్బందిని తీసుకెళ్తున్న రైలును లక్ష్యంగా చేసుకుని ‘ఫిదాయీన్’ (ఆత్మాహుతి) దాడి చేసిన‌ట్లు వెల్లడించింది.

సంఘ‌ట‌న ఎప్పుడు జ‌రిగిందంటే.?

ఆదివారం ఉదయం క్వెట్టాలోని చమన్ ఫాటక్ ప్రాంతం వద్ద రైల్వే ట్రాక్ సమీపంలో ఈ పేలుడు జరిగింది. పేలుడు తీవ్రతతో సమీప ప్రాంతమంతా ఒక్కసారిగా కంపించింది. పేలుడు తర్వాత ట్రాక్ పక్కన మంటలు చెలరేగాయి. సమాచారం అందుకున్న వెంటనే అగ్నిమాపక సిబ్బంది, అత్యవసర సేవల బృందాలు ఘటనాస్థలికి చేరుకుని సహాయక చర్యలు చేపట్టాయి.

స్థానిక మీడియా కథనాల ప్రకారం, జాఫర్ ఎక్స్‌ప్రెస్ రైలులోని ఒక బోగీకి మంటలు అంటుకున్నాయి. ఈ రైలు క్వెట్టా నుంచి పేషావర్‌కు బయలుదేరాల్సి ఉన్నట్లు తెలుస్తోంది. పేలుడు ప్రభావం చుట్టుపక్కల ప్రాంతాలపై తీవ్రంగా పడింది. సమీప భవనాల కిటికీల అద్దాలు ధ్వంసమయ్యాయి. రైల్వే ట్రాక్ పక్కన ఉన్న అనేక ఇళ్లు, పార్క్ చేసిన వాహనాలు కూడా దెబ్బతిన్నాయి. ప్రమాద స్థలాన్ని పోలీసులు, భద్రతా బలగాలు వెంటనే తమ ఆధీనంలోకి తీసుకుని ప్రజలను అక్కడి నుంచి దూరంగా పంపించారు. గాయపడిన వారిని సమీప ఆసుపత్రులకు తరలించారు. పలువురి పరిస్థితి విషమంగా ఉండటంతో మృతుల సంఖ్య మరింత పెరిగే అవకాశం ఉందని అధికారులు భావిస్తున్నారు.

దాడి చేసింది మేమే అంటూ ప్ర‌క‌ట‌న

దాడి జరిగిన కొద్దిసేపటికే బలోచ్ లిబరేషన్ ఆర్మీ ప్రకటన విడుదల చేసింది. తమ మజీద్ బ్రిగేడ్ ఈ ఆపరేషన్ నిర్వహించినట్లు పేర్కొంది. క్వెట్టా కాంటోన్మెంట్ ప్రాంతం నుంచి ప్రయాణిస్తున్న పాకిస్తాన్ సైనిక సిబ్బందిని లక్ష్యంగా చేసుకుని అత్యంత ప్రణాళికాబద్ధంగా ఈ ఆత్మాహుతి దాడి చేసినట్లు తెలిపింది. ఈ దాడికి సంబంధించిన పూర్తి వివరాలు, పాకిస్తాన్ భద్రతా బలగాలకు జరిగిన నష్టం గురించి త్వరలో అధికారిక ప్రకటన విడుదల చేస్తామని BLA పేర్కొంది. బలోచిస్తాన్ ప్రాంతంలో పాకిస్తాన్ ప్రభుత్వానికి వ్యతిరేకంగా కార్యకలాపాలు నిర్వహిస్తున్న ప్రధాన వేర్పాటువాద సంస్థల్లో BLA ఒకటి.

అప్రమత్తమైన భద్రతా వ్యవస్థ

బలోచిస్తాన్ హోం వ్యవహారాల ప్రత్యేక సహాయకుడు బాబర్ యూసఫ్‌జాయ్ ఘటనపై స్పందించారు. ప్రస్తుతం పేలుడుకు సంబంధించిన పూర్తి వివరాలను సేకరిస్తున్నామని చెప్పారు. సమాచారం ధృవీకరణ పూర్తయిన తర్వాత మరిన్ని వివరాలు వెల్లడిస్తామని తెలిపారు. అన్ని సంబంధిత శాఖలను అప్రమత్తం చేసినట్లు వెల్లడించిన ఆయన, సహాయక చర్యలు కొనసాగుతున్నందున ప్రజలు సంఘ‌ట‌న స్థ‌లం వద్ద గుమికూడవద్దని విజ్ఞప్తి చేశారు. భద్రతా బలగాలు ప్రాంతమంతా తనిఖీలు నిర్వహిస్తూ దర్యాప్తును కొనసాగిస్తున్నాయి.