PoJK Violence: PoJKలో హింసాకాండ.. ఇంటర్నెట్ బంద్

PoJK Violence: పాకిస్తాన్ ఆక్రమిత జమ్మూ కాశ్మీర్‌లో పరిస్థితులు రోజురోజుకూ దిగజారుతున్నాయి. జాయింట్ అవామీ యాక్షన్ కమిటీ (JAAC) కార్యకర్తలకు , భద్రతా దళాలకు మధ్య ముజఫరాబాద్‌లో జరిగిన తాజా ఘర్షణలతో ఈ ప్రాంతం యుద్ధభూమిని తలపిస్తోంది. నగరం అంతటా మార్కెట్లు మూతపడ్డాయి.

ఘర్షణలు - ప్రాణనష్టం

నిరసనకారులకు, భద్రతా దళాలకు మధ్య జరుగుతున్న ఈ ఘర్షణల్లో ఇప్పటివరకు 30 మందికి పైగా ప్రాణాలు కోల్పోగా, సుమారు 200 మంది తీవ్రంగా గాయపడ్డారు. ఆదివారం రాత్రి జరిగిన హింసాకాండలోనే ఏడుగురు పౌరులు మరణించినట్లు సమాచారం. ఆర్థిక , రాజకీయ సమస్యలపై పోరాడుతున్న పౌర సమాజ కూటమి 'జాయింట్ అవామీ యాక్షన్ కమిటీ' (JAAC)పై అధికారులు నిషేధం విధించడంతో ఉద్రిక్తతలు ఒక్కసారిగా పెరిగాయి.

స్తంభించిన జనజీవనం - కమ్యూనికేషన్ బ్లాక్అవుట్

రావలకోట్ , ముజఫరాబాద్‌లలో జరిగిన ఘర్షణల నేపథ్యంలో ప్రభుత్వం కమ్యూనికేషన్ బ్లాక్అవుట్ విధించింది. ఇంటర్నెట్ , మొబైల్ సేవలు నిలిచిపోవడంతో బాహ్య ప్రపంచంతో సంబంధాలు తెగిపోయాయి. భీంబర్, కోట్లీ వంటి నగరాల్లో కూడా భారీ నిరసనలు, బంద్‌లు కొనసాగుతున్నాయి. వందలాది మంది ప్రజలు వీధుల్లోకి వచ్చి పాకిస్తాన్ ప్రభుత్వ తీరుకు వ్యతిరేకంగా నిరసన తెలుపుతున్నారు.

అంతర్జాతీయ స్థాయిలో నిరసన - బ్రిటీష్ ఎంపీల లేఖ

పాకిస్తాన్ అధికారుల అణచివేత చర్యలపై అంతర్జాతీయంగా విమర్శలు వెల్లువెత్తుతున్నాయి. ఈ క్రమంలో బ్రిటన్ పార్లమెంటుకు చెందిన 50 మందికి పైగా సభ్యులు బ్రిటీష్ విదేశాంగ కార్యదర్శి వైవెట్ కూపర్‌కు ఘాటైన లేఖ రాశారు.

లేఖలోని ముఖ్యాంశాలు..

PoJK ప్రాంతంలో కమ్యూనికేషన్ బ్లాక్అవుట్, అక్రమ అరెస్టులు , పెరుగుతున్న ఉద్రిక్తతలపై వారు ఆందోళన వ్యక్తం చేశారు. బ్రిటన్‌లో నివసిస్తున్న అనేకమంది కాశ్మీరీ కుటుంబాలు అక్కడ ఉన్న తమ బంధువులతో మాట్లాడలేకపోతున్నారని ఎంపీలు పేర్కొన్నారు. ఇప్పటికే సున్నితంగా ఉన్న రాజకీయ వాతావరణంలో ఇలాంటి ఆంక్షలు విధించడం వల్ల మరింత అనిశ్చితి నెలకొంటుందని వారు హెచ్చరించారు. ప్రస్తుతానికి PoJK ప్రాంతం అంతటా ఒక విధమైన భయానక వాతావరణం నెలకొని ఉంది. అంతర్జాతీయ సమాజం జోక్యం చేసుకుని పౌరుల హక్కులను కాపాడాలని మానవ హక్కుల సంఘాలు కోరుతున్నాయి.

#WATCH | The situation remains grim in parts of Pakistan-occupied Jammu and Kashmir following fresh clashes between workers of the Joint Awami Action Committee and security forces in Muzaffarabad. Markets have been shut down across the city. pic.twitter.com/s75tU2zzxE

— ANI (@ANI) June 9, 2026