SpaceX: అంతరిక్షంలో స్పేస్‌ఎక్స్ సరికొత్త చరిత్ర.. విజయవంతంగా 'స్టార్‌షిప్ ఫ్లైట్-13' ప్రయోగం!

SpaceX: అంతరిక్ష పరిశోధనా రంగంలో ప్రముఖ ప్రైవేట్ దిగ్గజ సంస్థ 'స్పేస్‌ఎక్స్' మరొక చారిత్రక మైలురాయిని చేరుకుంది. టెక్సాస్‌లోని బోకా చిగా వద్ద ఉన్న స్టార్‌బేస్ లాంచ్ ప్యాడ్ నుంచి ప్రయోగించిన అత్యంత శక్తిమంతమైన “స్టార్‌షిప్ ఫ్లైట్-13” రోదసిలోకి విజయవంతంగా దూసుకెళ్లింది. భవిష్యత్తులో మానవులను చంద్రుడు, అంగారక (Mars) గ్రహాలపైకి తీసుకెళ్లేందుకు పూర్తిస్థాయి పునర్వినియోగ రాకెట్ వ్యవస్థను సిద్ధం చేసే క్రమంలో ఈ ప్రయోగం అత్యంత కీలకమైనదిగా నిలిచింది.

శనివారం ఉదయం నింగిలోకి లేచిన ఈ భారీ రాకెట్, నిర్ణీత సమయానికి అంతరిక్షంలోకి చేరుకుంది. ప్రయోగం ప్రారంభమైన రెండు నిమిషాల వ్యవధిలోనే ప్రధాన రాకెట్ నుండి బూస్టర్ విభాగం విజయవంతంగా వేరుపడింది.

సముద్రంలో సాఫ్ట్ ల్యాండింగ్ - 20 స్టార్‌లింక్ ఉపగ్రహాల విడుదల

ఈ ప్రయోగంలో ప్రధాన వ్యోమనౌక 'స్టార్‌షిప్-40' అంతరిక్షంలో ప్రయాణిస్తూ దాదాపు 20 నెక్స్ట్ జనరేషన్ ‘స్టార్‌లింక్ వెర్షన్-3’ ఇంటర్నెట్ ఉపగ్రహాలను కక్ష్యలోకి విజయవంతంగా విడుదల చేసింది. అనంతరం ప్లాన్ చేసినట్లే గంటన్నర ప్రయాణం తర్వాత భూ వాతావరణంలోకి పునఃప్రవేశించి.. హిందూ మహాసముద్రంలో అత్యంత సురక్షితంగా నీటిపై తేలియాడింది.

స్టార్‌షిప్ వ్యోమనౌక సముద్రంలో సురక్షితంగా ల్యాండ్ కావడం ఇదే తొలిసారి కావడం విశేషం. అయితే, తిరోగమన దిశలో గల్ఫ్ ఆఫ్ మెక్సికో సముద్రంలో ల్యాండ్ కావాల్సిన ‘బూస్టర్-20’ రాకెట్, ఇంజిన్ స్టార్టింగ్ సమస్యల వల్ల నియంత్రణ కోల్పోయి పాక్షికంగా దెబ్బతిన్నట్లు తెలుస్తోంది.

“ఇది ఎంతో సంతోషకరమైన దృశ్యం”

స్టార్‌షిప్ వ్యోమనౌక మొదటిసారి సముద్రంలో క్షేమంగా ల్యాండ్ కావడంపై స్పేస్‌ఎక్స్ బృందం కొనియాడింది. సంస్థ అధినేత ఎలాన్ మస్క్ సామాజిక మాధ్యమాల వేదికగా ఈ చారిత్రక విజయం పట్ల తీవ్ర హర్షం వ్యక్తం చేశారు.