లాస్ట్ మినిట్ దుబాయ్ ట్రిప్ ప్లాన్? ఈ ఫాస్ట్ ట్రాక్ వీసా విధానం మీ కోసమే!

Dubai: లాస్ట్ మినిట్ ప్లాన్స్‌తో దుబాయ్ వెళ్లాలని ఉందా? కానీ వీసా రావడానికి లేట్ అవుతుందేమోనని టెన్షన్ పడుతున్నారా? అయితే మీకో గుడ్ న్యూస్! సాధారణంగా చాలామంది విదేశీ ప్రయాణాలను నెలల ముందే ప్లాన్ చేసుకుంటారు. ఎందుకంటే అక్కడి వీసాలు సకాలంలో వస్తాయో లేదో అన్న భయం ఒక వైపు, ప్రయాణ ఏర్పాట్లు మరో వైపు ఉంటాయి. ముఖ్యంగా దుబాయ్ లాంటి గ్లోబల్ టూరిస్ట్ డెస్టినేషన్‌కు అప్పటికప్పుడు వెళ్లాలంటే వీసా అప్రూవల్ అనేది ఒక పెద్ద టాస్క్‌గా మారేది. కానీ, ఇప్పుడు ఆ చింతే అక్కర్లేదు!

టూరిస్టుల ప్రయాణాలను మరింత సులభతరం చేసేందుకు దుబాయ్ ప్రభుత్వం ఒక సరికొత్త, అత్యంత వేగవంతమైన వీసా విధానాన్ని అందుబాటులోకి తెచ్చింది. మీరు పత్రాలన్నీ పక్కాగా సబ్మిట్ చేస్తే, కేవలం 48 గంటల్లోనే అంటే కేవలం రెండు రోజుల్లోనే మీ చేతికి వీసా వచ్చేస్తుంది. ఒకవేళ మీ డాక్యుమెంట్స్ అన్నీ పక్కాగా ఉంటే కొన్ని గంటల్లోనే అప్రూవల్ వచ్చే అవకాశాలు కూడా ఉన్నాయి. దీనివల్ల ఎలాంటి ఒత్తిడి లేకుండా, ఆఖరి నిమిషంలోనైనా సరే మీ దుబాయ్ ఫ్లైట్ టికెట్లను బుక్ చేసుకోవచ్చు. మరి ఇండియన్ టూరిస్టులకు ఎంతగానో ఉపయోగపడే ఈ ఫాస్ట్ ట్రాక్ వీసాకు ఎలా అప్లై చేయాలి? వంటి పూర్తి వివరాలు ఇప్పుడు చూద్దాం..

దుబాయ్ జనరల్ డైరెక్టరేట్ ఆఫ్ రెసిడెన్సీ అండ్ ఫారినర్స్ అఫైర్స్ (GDRFA) పర్యాటక వీసాల కొరకు ‘ఫాస్ట్ ట్రాక్’ సేవలను అందుబాటులోకి తెచ్చింది. దీని ద్వారా దరఖాస్తు చేసుకున్న కేవలం 48 గంటల్లోనే సింగిల్ ఎంట్రీ వీసా అప్రూవల్ లభిస్తుండటం విశేషం.

పర్యాటకులకు వేగవంతమైన వీసా సేవలు

దుబాయ్ నగరాన్ని సందర్శించాలనుకునే అంతర్జాతీయ ప్రయాణికుల కోసం యూఏఈ ప్రభుత్వం నిరంతరం నిబంధనలను సరళతరం చేస్తోంది. ఇందులో భాగంగానే పాత పద్ధతుల్లో ఉండే కాలయాపనకు స్వస్తి పలుకుతూ కేవలం రెండు రోజుల్లోనే వీసా మంజూరు చేసేలా ప్రక్రియను వేగవంతం చేశారు. 30 రోజులు లేదా 60 రోజుల కాలపరిమితితో లభించే ఈ సింగిల్ ఎంట్రీ పర్యాటక వీసాల కోసం ఆన్‌లైన్ ద్వారా అవసరమైన పత్రాలను సమర్పిస్తే, అధికారులు వాటిని పరిశీలించి 48 వర్కింగ్ అవర్స్ లోనే గ్రీన్ సిగ్నల్ ఇస్తున్నారు.

ఎవరికి ఎక్కువ ప్రయోజనం?

అత్యవసర పనుల మీద అప్పటికప్పుడు దుబాయ్ వెళ్లాల్సిన వారికి, వ్యాపార నిమిత్తం తరచూ ప్రయాణాలు చేసే బిజినెస్ వర్గాలకు, అలాగే సెలవుల్లో కుటుంబ సభ్యులను కలవడానికి వెళ్లేవారికి ఈ ఫాస్ట్ ట్రాక్ వీసా విధానం ఒక పెద్ద ఊరటగా మారింది. ముఖ్యంగా భారతీయ పాస్‌పోర్ట్ హోల్డర్లు ప్రయాణానికి ముందే డిజిటల్ ఛానల్స్ ద్వారా లేదా గుర్తింపు పొందిన ట్రావెల్ ఏజెన్సీల ద్వారా దీనిని సులభంగా పొందవచ్చు. కేవలం వినోదం, పర్యాటకం కోసమే ఈ వీసా ఉపయోగపడుతుంది. దీనిపై అక్కడ చదువుకోవడానికి లేదా ఉద్యోగాలు చేయడానికి వీలుండదు.

కావలసిన పత్రాలు.. అప్లికేషన్ విధానం

ఈ వీసా దరఖాస్తుకు కనీసం ఆరు నెలల వాలిడిటీ ఉన్న పాస్‌పోర్ట్, ఇటీవల దిగిన పాస్‌పోర్ట్ సైజ్ ఫోటోగ్రాఫ్, జాతీయ గుర్తింపు కార్డు (పాన్ కార్డ్ లేదా డ్రైవింగ్ లైసెన్స్ వంటివి) సమర్పించాల్సి ఉంటుంది. ఒకవేళ అధికారులు అదనపు పత్రాలు కోరితే వాటిని కూడా అప్‌లోడ్ చేయాలి. దరఖాస్తుదారులు అధికారిక పోర్టల్ లేదా మొబైల్ యాప్ ద్వారా వీసా రకాన్ని ఎంచుకుని, ఫీజు చెల్లించి, తమ అప్లికేషన్ స్టేటస్‌ను ఆన్‌లైన్‌లోనే ట్రాక్ చేసుకోవచ్చు.

https://gdrfad.gov.ae/en/services/d551ce89-52e8-11ea-0320-0050569629e8#

అయితే వీసా దరఖాస్తుల విషయంలో ఇంటర్నెట్‌లో చాలా నకిలీ వెబ్‌సైట్లు , మోసపూరిత ఆఫర్లు కూడా దర్శనమిస్తున్నాయి. ఇలాంటి వాటి బారిన పడకుండా ఉండటానికి కేవలం అధికారిక ప్రభుత్వ వెబ్‌సైట్లు లేదా దుబాయ్ అప్రూవ్డ్ ట్రావెల్ ఏజెంట్లను మాత్రమే సంప్రదించాలని యూఏఈ అధికారులు గట్టిగా హెచ్చరిస్తున్నారు. తక్కువ సమయంలోనే వీసా చేతికి వస్తుండటంతో పర్యాటకులు ఎలాంటి ఒత్తిడి లేకుండా తమ ప్రయాణ ప్రణాళికలను సిద్ధం చేసుకోవచ్చు.