Trump Iran Strategy: ట్రంప్‌ వ్యూహానికి చెక్‌...రష్యా, చైనా మాస్టర్‌ ప్లాన్‌

Trump Iran Strategy: పశ్చిమాసియాలో దౌత్య మరియు మిలిటరీ ఉద్రిక్తతలు పరాకాష్ఠకు చేరిన వేళ, అమెరికా అధ్యక్షుడు డోనాల్డ్ ట్రంప్ ఇరాన్‌పై "ఎకనామిక్ డి డే" పేరిట యుద్ధం ప్రకటించారు. ఇరాన్ ఆర్థిక వ్యవస్థను పూర్తిగా కుప్పకూల్చడమే లక్ష్యంగా, ఆ దేశంతో ఆయిల్ స్మగ్లింగ్, ట్రాన్స్‌ఫర్లు లేదా నౌకా వ్యాపారం చేసే ఏ ఇతర దేశంపైనైనా భారీ ఆర్థిక పరిణామాలు ఉంటాయని హెచ్చరించారు. ముఖ్యంగా యునైటెడ్ అరబ్ ఎమిరేట్స్ వంటి మధ్యప్రాచ్య భాగస్వాములు ఇరాన్‌పై ఆంక్షలు విధించేలా చేయడంలో వాషింగ్టన్ సక్సెస్ అయినా, అసలైన పెద్దన్నలైన రష్యా, చైనా విషయంలో మాత్రం ట్రంప్ వ్యూహం తీవ్ర అవరోధాలను ఎదుర్కొంటోంది.

అమెరికా ఆంక్షలను లెక్కచేయని చైనా-రష్యాలు

అంతర్జాతీయ నిపుణుల విశ్లేషణ ప్రకారం.. ఇరాన్‌ను చుట్టుముట్టాలని అమెరికా భావిస్తున్నప్పటికీ, చైనా, రష్యాలు నిర్మించుకున్న ప్రత్యామ్నాయ ఆర్థిక వ్యవస్థల ముందు ఈ బెదిరింపులు పనిచేయడం లేదు. చైనా కొనుగోలు చేసే ఇరాన్ ఆయిల్ అంతా అమెరికా బ్యాంకింగ్ పరిధికి దూరంగా ఉండే స్వతంత్ర రిఫైనరీల ద్వారా జరుగుతోంది. అంతేకాకుండా అమెరికాతో వ్యాపార సంబంధాలను కాపాడుకుంటూనే, ఇరాన్‌తో ముడిపడిన స్వంత ఆర్థిక ప్రయోజనాలను వదులుకోవడానికి బీజింగ్ అస్సలు సిద్ధంగా లేదు. మరోవైపు రష్యా ఇప్పటికే పాశ్చాత్య దేశాల ఆంక్షల వలయంలో ఉండటంతో, ట్రంప్ ఇచ్చే కొత్త హెచ్చరికల వల్ల దానికి పోయేదేమీ లేదు. ఇటీవల ఇరు దేశాలు కుదుర్చుకున్న 20 ఏళ్ల భాగస్వామ్య ఒప్పందం ద్వారా కాస్పియన్ సముద్ర మార్గం గుండా మిలిటరీ, టెక్నాలజీ ఉత్పత్తులు, చమురు సరఫరాలను విజయవంతంగా కొనసాగిస్తున్నాయి.

డాలర్ ఆధిపత్యానికి 'బ్రిక్స్' చెక్

మరోవైపు ఇరాన్ విదేశాంగ మంత్రి అబ్బాస్ అరాగ్చీ అమెరికా చర్యలను "ఆర్థిక ఉగ్రవాదం"గా కొట్టిపారేశారు. అమెరికా ఆర్థిక ఆధిపత్యాన్ని తట్టుకునేందుకు ఇరాన్ 'బ్రిక్స్' కూటమిని ఒక దివ్యౌషధంగా ఉపయోగిస్తోంది. బ్రిక్స్‌ పోర్టల్‌ ద్వారా దేశాలు తమ సొంత కరెన్సీల్లోనే వ్యాపారం చేసుకోవడానికి వేగంగా అడుగులు వేస్తున్నాయి. దీనికి తోడు బ్రిక్స్ ఆధ్వర్యంలో నడిచే న్యూ డెవలప్‌మెంట్ బ్యాంక్ లో సభ్యత్వం పొంది, పాశ్చాత్య మార్కెట్లతో ప్రమేయం లేకుండా నిధులు సమీకరించాలని ఇరాన్ ప్లాన్ చేస్తోంది. మొత్తానికి, ఇరాన్‌ను ఒంటరిని చేసి దారికి తెచ్చుకోవాలని చూస్తున్న ట్రంప్‌కు చైనా-రష్యాల భాగస్వామ్యం కోలుకోలేని దెబ్బగా మారింది. ఆర్థిక ఆంక్షల కన్నా దౌత్యపరమైన చర్చలే సమస్య పరిష్కారానికి మార్గమని అంతర్జాతీయ విశ్లేషకులు స్పష్టం చేస్తున్నారు.