Trump Iran War: ఇరాన్‌తో ట్రంప్ మరో యుద్ధానికి సిద్ధమా? అమెరికా రాజకీయాల్లో పెరుగుతున్న ఒత్తిడి!

Trump Iran War: అమెరికా అధ్యక్షుడు డొనాల్డ్ ట్రంప్ ఇరాన్ విషయంలో ఎలాంటి నిర్ణయం తీసుకోబోతున్నారు? ఒకవైపు యుద్ధాన్ని ముగించేందుకు చర్చలు జరుగుతున్నాయని చెబుతూనే.. మరోవైపు ఇరాన్‌పై మరిన్ని దాడులు తప్పవంటూ హెచ్చరిస్తున్నారు. అమెరికా మధ్యంతర ఎన్నికల్లో రిపబ్లికన్ పార్టీకి ఎదురైన భారీ పరాజయం తర్వాత ట్రంప్ వైఖరిలో ఈ మార్పులు కనిపిస్తున్నాయి. ఇరాన్‌తో యుద్ధం పట్ల అమెరికా ప్రజల్లో పెరుగుతున్న వ్యతిరేకత కూడా ఆయనపై ఒత్తిడి పెంచుతోంది. దీంతో మరోసారి సైనిక చర్యకు దిగాలా? లేక దౌత్యపరమైన పరిష్కారానికి ప్రయత్నించాలా? అనే విషయంలో వైట్‌హౌస్ సందిగ్ధంలో పడింది. మధ్యంతర ఎన్నికల్లో ఎదురైన ఎదురుదెబ్బకు ఇరాన్ యుద్ధం కూడా ఒక కారణమని ట్రంప్ అంగీకరించారు. అయితే, గురువారం మీడియాతో మాట్లాడుతూ అవసరమైతే ఇరాన్‌లో మిగిలిన లక్ష్యాలను కూడా ధ్వంసం చేయాల్సి రావచ్చని హెచ్చరించారు. శుక్రవారం అమెరికా బలగాలు ఇరాన్‌లోని ఖేష్మ్ ద్వీపంపై మరోసారి దాడులు నిర్వహించాయి. వీటిని స్వల్పస్థాయి దాడులుగా ట్రంప్ అభివర్ణించారు. ఇరాన్‌కు చెందిన క్షిపణి రక్షణ వ్యవస్థలను లక్ష్యంగా చేసుకున్నట్లు అమెరికా వెల్లడించింది. మరోవైపు, ఖేష్మ్ ద్వీపంలోని సుజా ప్రాంతంలో రెండు క్షిపణులు పడినట్లు ఇరాన్ అధికారిక వార్తా సంస్థ ఐఆర్‌ఎన్‌ఏ పేర్కొంది.

అణు కేంద్రాలపై దాడుల భయం.. ముందస్తు ఏర్పాట్లు

ఇరాన్‌పై అమెరికా మరోసారి దాడులు చేస్తే అణు కేంద్రాలు కూడా లక్ష్యంగా మారవచ్చనే ఆందోళనలు వ్యక్తమవుతున్నాయి. ఈ నేపథ్యంలో అణు కేంద్రాలకు సమీపంలోని ప్రజలకు అయోడిన్ మాత్రలు పంపిణీ చేస్తున్నట్లు అంతర్జాతీయ మీడియా కథనాలు వెల్లడించాయి. అణు ప్రమాదం సంభవించినప్పుడు వెలువడే రేడియేషన్ ప్రభావం నుంచి థైరాయిడ్ గ్రంథిని కొంతవరకు రక్షించేందుకు ఈ మాత్రలు ఉపయోగపడతాయి. ముఖ్యంగా బుషెహర్ నగరంలో ఆరోగ్య అధికారులు ఈ పంపిణీ చేపట్టినట్లు ఇరాన్‌కు చెందిన యంగ్ జర్నలిస్ట్స్ క్లబ్ తెలిపింది. అక్కడే దేశంలోని ఏకైక పనిచేస్తున్న అణు విద్యుత్ కేంద్రం ఉంది. మరోవైపు, భూగర్భంలో భారీ సొరంగాలు, రక్షణ వ్యవస్థలు ఉన్నాయని భావిస్తున్న పికాక్స్ మౌంటైన్ కేంద్రంపై అమెరికా దాడి చేసే అవకాశాన్ని పరిశీలిస్తున్నట్లు బ్రిటన్‌కు చెందిన టైమ్స్ పత్రిక కథనం పేర్కొంది. అయితే, అణు కేంద్రాలపై దాడులకు సంబంధించి అమెరికా నుంచి అధికారిక ప్రకటన వెలువడలేదు.

హోర్ముజ్ జలసంధి దగ్గరే అసలు సమస్య

అమెరికా, ఇరాన్ మధ్య ఉద్రిక్తతలకు ప్రధాన కారణాల్లో హోర్ముజ్ జలసంధి ఒకటి. ప్రపంచ చమురు రవాణాకు అత్యంత కీలకమైన ఈ మార్గాన్ని తిరిగి తెరవాలంటే అమెరికా కొన్ని షరతులను అంగీకరించాలని ఇరాన్ కోరుతోంది. ఆంక్షల ఎత్తివేత, స్తంభింపజేసిన ఆస్తుల విడుదల, ఇరాన్ నౌకాశ్రయాలపై అమెరికా నౌకాదళ దిగ్బంధం తొలగింపు, భవిష్యత్తులో దాడులు జరగవనే హామీ వంటివి ఇందులో ఉన్నాయి. అయితే, ఇరాన్ షరతులకు తలొగ్గేది లేదని ట్రంప్ గతంలో స్పష్టం చేశారు. ఈ పరిస్థితుల్లో యుద్ధాన్ని కొనసాగిస్తే దేశీయంగా రాజకీయ నష్టం, వెనక్కి తగ్గితే అంతర్జాతీయంగా ప్రతిష్ఠ దెబ్బతినే ప్రమాదం ఆయన ముందుంది.

మళ్లీ యుద్ధమా? చర్చలతో పరిష్కారమా?

అమెరికా సెంట్రల్ కమాండ్ మరోసారి భారీ సైనిక చర్యలు ప్రారంభించేందుకు సన్నాహాలు చేస్తున్నట్లు ఆక్సియోస్ కథనం వెల్లడించింది. మరోవైపు, అమెరికా దాడులు పునఃప్రారంభమైతే ఇప్పటివరకు ఇచ్చిన ప్రతిస్పందన కంటే తీవ్రంగా వ్యవహరిస్తామని ఇరాన్ హెచ్చరిస్తోంది. గల్ఫ్ ప్రాంతంలోని డేటా సెంటర్లు, ఏఐ కేంద్రాలు, కీలక మౌలిక సదుపాయాలపైనా దాడులు జరిగే అవకాశం ఉందని గతంలో హెచ్చరించింది. అయితే దౌత్య ప్రయత్నాలు కూడా కొనసాగుతున్నాయి. ఖతార్ మధ్యవర్తిత్వంతో ఇరాన్ కొత్త అణు, శాంతి ప్రతిపాదనను అమెరికాకు పంపినట్లు రాయిటర్స్ నివేదించింది. అమెరికా ఈ ప్రతిపాదనను పరిశీలిస్తున్నట్లు సమాచారం. ఇరు దేశాలు చర్చలకు సిద్ధంగా ఉన్నాయని సంకేతాలు ఇస్తున్నప్పటికీ, పరస్పర షరతులే అడ్డంకిగా మారాయి. ఖతార్ ప్రధాని షేక్ మహమ్మద్ బిన్ అబ్దుల్‌రహ్మాన్ అల్‌థానీ కూడా యుద్ధానికి ముగింపు పలికే ఒప్పందం కోసం సరైన సమయం కోసం ఎదురుచూడకుండా ఇరు దేశాలు ముందుకు రావాలని సూచించారు. మొత్తంగా చూస్తే, ట్రంప్‌కు ఇప్పుడు యుద్ధం కంటే దాని పరిణామాలే పెద్ద సవాలుగా మారాయి. అమెరికాలో రాజకీయ ఒత్తిడి, ఇరాన్ ప్రతిఘటన, అంతర్జాతీయ చమురు రవాణాపై ప్రభావం.. ఈ మూడు అంశాలు ఆయన తదుపరి నిర్ణయాన్ని ప్రభావితం చేయనున్నాయి. మరోసారి దాడులు జరుగుతాయా? లేక చర్చలతో ఉద్రిక్తతలు తగ్గుతాయా? అనేది రానున్న రోజుల్లో తేలనుంది.