‘10 నిమిషాల్లో మీ అణుశక్తిని అంతం చేస్తాం’.... ఇరాన్‌కు డొనాల్డ్ ట్రంప్ హెచ్చరిక!
ఇరాన్‌లో మిగిలిన ఒకటి, రెండు అణు లక్ష్యాలను 10 నిమిషాల్లో ధ్వంసం చేయగలమని ట్రంప్ హెచ్చరించారు. పికాక్స్‌ మౌంటెన్‌పై ఫోకస్.
‘10 నిమిషాల్లో మీ అణుశక్తిని అంతం చేస్తాం’.... ఇరాన్‌కు డొనాల్డ్ ట్రంప్ హెచ్చరిక!
ఇరాన్‌పై అమెరికా, ఇజ్రాయెల్‌ మధ్య ఉద్రిక్తతలు మరోసారి తీవ్రతరమవుతున్నాయి. తమపై ఎలాంటి దాడి జరిగినా వెంటనే, గట్టిగా స్పందించాలని ఇరాన్‌ సుప్రీం లీడర్‌ మొజ్తబా ఖమేనీ సైన్యాన్ని హెచ్చరించిన నేపథ్యంలో అమెరికా అధ్యక్షుడు డొనాల్డ్ ట్రంప్ కీలక వ్యాఖ్యలు చేశారు. ఇరాన్‌లో ఇంకా ఒకటి లేదా రెండు లక్ష్యాలు మాత్రమే మిగిలి ఉన్నాయని, వాటిని 10 నిమిషాల్లోనే లక్ష్యంగా చేసుకోగలమని ట్రంప్ పేర్కొన్నారు.
‘ఇంకా ఒకటి, రెండు లక్ష్యాలు మాత్రమే’
ఫ్లోరిడాలోని తన నివాసంలో మీడియాతో మాట్లాడిన ట్రంప్.. అమెరికా ఇప్పటికే ఇరాన్‌ అణు సామర్థ్యాన్ని చాలా వరకు దెబ్బతీసిందని చెప్పారు. ఇంకా ఒకటి లేదా రెండు ప్రాంతాలను ‘టేక్‌ కేర్‌’ చేయాల్సి ఉందని, వాటిని చాలా తక్కువ సమయంలోనే ధ్వంసం చేయగలమని వ్యాఖ్యానించారు.
ఇరాన్‌లోని అణు కార్యక్రమంతో సంబంధం ఉన్నట్లు అమెరికా భావిస్తున్న పికాక్స్‌ మౌంటెన్‌‌ను కూడా ట్రంప్ సంభావ్య లక్ష్యంగా ప్రస్తావించారు. అయితే ఇరాన్‌పై కొత్త దాడులకు అమెరికా తుది నిర్ణయం తీసుకుందని ఇప్పటివరకు ప్రకటించలేదు. అమెరికా విదేశాంగ మంత్రి మార్కో రూబియో కూడా దౌత్యపరమైన చర్చలకు అవకాశం ఉందని వెల్లడించారు.
పికాక్స్‌ మౌంటెన్‌ ఎందుకు కీలకం?
పికాక్స్‌ మౌంటెన్‌ అనేది ఇరాన్‌లోని నతాంజ్‌ అణు కేంద్రానికి సమీపంలో ఉన్న భారీగా రక్షణ కల్పించిన భూగర్భ సదుపాయంగా పాశ్చాత్య వర్గాలు పేర్కొంటున్నాయి. అక్కడ ఇరాన్‌ సున్నితమైన అణు మౌలిక వసతులను తరలించి ఉండొచ్చని అమెరికా, పాశ్చాత్య నిఘా వర్గాలు అనుమానిస్తున్నాయి.
అయితే పికాక్స్‌ మౌంటెన్‌లో ప్రస్తుతం అణు కార్యకలాపాలు జరుగుతున్నాయా? అక్కడ అణు పదార్థం ఉందా? అనే అంశాలపై స్వతంత్రంగా నిర్ధారణ లేదు. ఇరాన్‌ మాత్రం ఆ ప్రాంతంలో అణు కార్యకలాపాలు జరుగుతున్నాయన్న ఆరోపణలను ఖండిస్తోంది.
చర్చలు కొనసాగుతున్నా.. తగ్గని ఉద్రిక్తతలు
ఒకవైపు అమెరికా, ఇరాన్‌ మధ్య దౌత్యపరమైన చర్చలు కొనసాగుతున్నాయని ట్రంప్ చెబుతుండగా.. మరోవైపు ఇరాన్‌ నాయకత్వం అమెరికా, ఇజ్రాయెల్‌ నుంచి ఎలాంటి కొత్త దాడి జరిగినా ప్రతిస్పందిస్తామని హెచ్చరిస్తోంది. దీంతో పశ్చిమాసియాలో మరోసారి సైనిక ఉద్రిక్తతలు పెరిగే అవకాశాలపై ఆందోళనలు వ్యక్తమవుతున్నాయి.
ఇరాన్‌పై తదుపరి సైనిక చర్యకు సంబంధించి ట్రంప్ ప్రభుత్వం ఇంకా అధికారిక నిర్ణయం ప్రకటించలేదు. దౌత్య చర్చలు ఒకవైపు కొనసాగుతున్న సమయంలోనే అమెరికా అధ్యక్షుడి తాజా వ్యాఖ్యలు పరిస్థితిని మరింత ఉత్కంఠభరితంగా మార్చాయి.
