US Army 18 Drone Swarm: అమెరికా సైన్యం కొత్త యుద్ధ యంత్రం.. షిప్పింగ్ కంటైనర్ నుంచి డ్రోన్ల ప్రయోగం
అమెరికా సైన్యం సరికొత్త డ్రోన్ యుద్ధ సాంకేతికతను ప్రదర్శించింది. 20 అడుగుల షిప్పింగ్ కంటైనర్లోని మానవరహిత వాహనం నుంచి 18 డ్రోన్లను ఒకేసారి ప్రయోగించి లక్ష్యంపై దాడి చేసింది.
US Army 18 Drone Swarm: యుద్ధ రంగంలో సాంకేతికత కీలక పాత్ర పోషిస్తున్న వేళ అమెరికా సైన్యం మరో వినూత్న ప్రయోగాన్ని విజయవంతంగా ప్రదర్శించింది. బయటకు సాధారణ సరుకు రవాణా పెట్టెలా కనిపించే ఓ షిప్పింగ్ కంటైనర్ నుంచి ఏకంగా 18 డ్రోన్లను ఒకేసారి ప్రయోగించే వ్యవస్థను పరీక్షించింది. ఈ డ్రోన్లు సమన్వయంతో కదులుతూ నిర్దేశించిన లక్ష్యంపై దాడి చేయగలవు. సైనికులు నేరుగా ప్రమాదకర ప్రాంతాల్లోకి వెళ్లాల్సిన అవసరాన్ని తగ్గించడంతో పాటు, దూరం నుంచే దాడులు నిర్వహించే అవకాశాలను ఈ సాంకేతికత పెంచనుంది. జర్మనీలోని గ్రాఫెన్వోర్ శిక్షణా కేంద్రంలో నిర్వహించిన లైవ్-ఫైర్ సాంకేతిక ప్రదర్శనలో అమెరికా సైన్యం ఈ ప్రయోగాన్ని చేపట్టింది. అమెరికా ఆర్మీ కంబాట్ క్యాపబిలిటీస్ డెవలప్మెంట్ కమాండ్ (DEVCOM), యూఎస్ ఆర్మీ యూరప్ అండ్ ఆఫ్రికా, 7వ ఆర్మీ ట్రైనింగ్ కమాండ్ సంయుక్తంగా ఈ కార్యక్రమంలో పాల్గొన్నాయి. రిమోట్ ర్యాపిడ్ రెస్పాన్స్ అటానమస్ కంటింజెన్సీ టీమ్ (R3ACT) కార్యక్రమంలో భాగంగా ఈ పరీక్షలు నిర్వహించారు.
కంటైనర్ నుంచి బయటకు వచ్చిన డ్రోన్ వ్యవస్థ
ఈ ప్రదర్శనలో R3NEGADE పేరుతో రూపొందించిన మానవరహిత భూతల వాహనం (UGV) ప్రధాన ఆకర్షణగా నిలిచింది. 20 అడుగుల సాధారణ షిప్పింగ్ కంటైనర్లో ఉంచిన ఈ వాహనం బయటకు వచ్చి, HIV3 స్వార్మ్ లాంచర్ సాయంతో 18 డ్రోన్లను గాల్లోకి పంపించింది. ఆ తర్వాత ఆ డ్రోన్లు ఒకదానితో మరొకటి సమన్వయం చేసుకుంటూ నిర్దేశించిన లక్ష్యంపై దాడి చేశాయి. ఇక్కడ గమనించాల్సిన విషయం ఏమిటంటే.. డ్రోన్లను ప్రయోగించడానికి ప్రత్యేకంగా పెద్ద సైనిక వాహనాలు లేదా బహిరంగ వేదికలు అవసరం లేకుండా, సాధారణ సరుకు రవాణా కంటైనర్లోనే ఈ వ్యవస్థను ఏర్పాటు చేయడం. అవసరమైన ప్రాంతానికి తరలించిన తర్వాత అక్కడి నుంచి డ్రోన్లను ప్రయోగించవచ్చు. దీనివల్ల సైనిక కార్యకలాపాలకు కొత్త మార్గాలు అందుబాటులోకి రావచ్చని అమెరికా భావిస్తోంది.
క్షిపణులు, ఇతర ఆయుధాలతోనూ ప్రయోగాలు
ఈ కార్యక్రమంలో R3NEGADE వాహనానికి సంబంధించిన మరో సామర్థ్యాన్ని కూడా ప్రదర్శించారు. జావెలిన్ క్షిపణితో కూడిన రిమోట్ కంట్రోల్ ఆయుధ వ్యవస్థను మోసుకెళ్లే మరో వాహనాన్ని పరీక్షించారు. అంటే ఒకే రకమైన వాహనాన్ని వేర్వేరు సైనిక అవసరాలకు అనుగుణంగా మార్చుకునే అవకాశం ఉందని ఈ ప్రదర్శన సూచించింది. మొదట TRV-150 డ్రోన్ లక్ష్య ప్రాంతంపై పొగను విడుదల చేసింది. అనంతరం భూతల వాహనం నుంచి ప్రయోగించిన స్వయంప్రతిపత్తి డ్రోన్లు దాడి నిర్వహించాయి. సైనికులు FPV డ్రోన్ ద్వారా చేపట్టిన కార్యకలాపాలను కూడా ప్రదర్శించారు. అలాగే అభివృద్ధి దశలో ఉన్న FIR3FLY యాంటీ ఆర్మర్ సామర్థ్యంతో కూడిన TRV-400 విమాన నమూనాను ప్రదర్శనలో ఉంచారు.
సైనికుల ప్రాణాలకు రక్షణ.. తక్కువ ఖర్చుతో ఎక్కువ సామర్థ్యం
ఈ ప్రయోగాల వెనుక అమెరికా సైన్యం ప్రధాన లక్ష్యం సైనికులపై ప్రత్యక్ష ప్రమాదాన్ని తగ్గించడం. శత్రు ప్రాంతాల్లోకి సైనికులు వెళ్లే బదులు మానవరహిత వాహనాలు, డ్రోన్లను ముందుగా పంపించి నిఘా, దాడి వంటి కార్యకలాపాలు నిర్వహించవచ్చు. అంతేకాకుండా ఖరీదైన ప్రత్యేక యుద్ధ విమానాలు, ఆయుధ వ్యవస్థలపైనే ఆధారపడకుండా ప్రత్యామ్నాయ మార్గాలను అభివృద్ధి చేయవచ్చు. R3ACT ప్రోగ్రామ్ మేనేజర్ అలెక్స్ టోమోసియెస్కీ ఈ తరహా కంటైనర్ ఆధారిత వ్యవస్థలు సైనిక కమాండర్లకు మరిన్ని కార్యాచరణ అవకాశాలను అందించగలవని వివరించారు. DEVCOM ఆర్మమెంట్స్ సెంటర్ వ్యూహాత్మక సలహాదారు ట్రాయ్ బ్రానన్ మాట్లాడుతూ.. విస్తరించగల సామర్థ్యం, దాడి శక్తి, పరిధి, స్వయంప్రతిపత్తి ఈ వ్యవస్థల ముఖ్య లక్ష్యాలని పేర్కొన్నారు.




