US-Canada trade war: కొత్త సుంకాలతో అమెరికా కెనడా మధ్య ముదిరిన వాణిజ్య ఉద్రిక్తత

US-Canada trade war: అమెరికా-కెనడా మధ్య వాణిజ్య వివాదం మరింత ముదిరింది. చివరి నిమిషంలో జరిగిన చర్చలు విఫలం కావడంతో.. కెనడియన్ వస్తువులపై అమెరికా కొత్తగా 50 శాతం సుంకాలు విధించేందుకు సిద్ధమైంది. దీనికి ప్రతిగా అమెరికా విధించే సుంకాలకు డాలర్‌కు డాలర్ చొప్పున సమాధానం ఇస్తామని కెనడా హెచ్చరించింది. తాజా పరిణామం ఇప్పటికే ఉద్రిక్తంగా ఉన్న ఇరు దేశాల సంబంధాలపై మరింత ఒత్తిడిని పెంచింది.

కెనడా ప్రధానమంత్రి మార్క్ కార్నీ చర్చలను నిలిపివేసి.. వాషింగ్టన్‌లో ఉన్న తమ ప్రతినిధి బృందాన్ని వెనక్కి రావాలని ఆదేశించారు. అమెరికా చివరి నిమిషంలో తన ప్రతిపాదిత నిబంధనల్లో మార్పులు చేసిందని ఆయన ఆరోపించారు. కొత్త నిబంధనలు అన్యాయంగా, ఆర్థికపరంగా అసంబద్ధంగా ఉన్నాయని.. ఇలాంటి పరిస్థితుల్లో ఏదైనా ఒప్పందం విశ్వసనీయతపై ప్రశ్నలు తలెత్తుతాయని కార్నీ పేర్కొన్నారు.

సుమారు 28 బిలియన్ డాలర్ల విలువైన కెనడియన్ వస్తువులపై 50 శాతం సుంకాలు విధించనున్నట్లు అమెరికా ప్రకటించింది. కెనడియన్ కార్మికులు, వ్యాపారాల ప్రయోజనాలను కాపాడేందుకు తమ ప్రభుత్వం కూడా సమాన స్థాయిలో ప్రతీకార సుంకాలు విధిస్తుందని కార్నీ స్పష్టం చేశారు.

అయితే చర్చలు విఫలం కావడానికి కెనడానే కారణమని అమెరికా వాణిజ్య ప్రతినిధి కార్యాలయం ఆరోపించింది. వారంలో ప్రారంభంలో అంగీకరించిన నిబంధనల ప్రకారం ఒప్పందాన్ని ఖరారు చేసేందుకు ఒట్టావా నిరాకరించిందని పేర్కొంది. అమెరికా మార్కెట్‌కు ఎగుమతి చేసే ప్రధాన దేశాలకు అందించే అత్యుత్తమ వాణిజ్య ప్రాధాన్యతను కెనడాకు ఇవ్వడానికి సిద్ధంగా ఉన్నప్పటికీ.. కెనడా కొత్త డిమాండ్లు చేయడం, గతంలో చేసిన కొన్ని కట్టుబాట్ల నుంచి వెనక్కి తగ్గడం చర్చలపై ప్రభావం చూపాయని అమెరికా తెలిపింది.

అమెరికా ప్రతిపాదించిన ప్యాకేజీలో ఉక్కు, అల్యూమినియం, ఆటోమొబైల్స్, కలపపై సుంకాలను గణనీయంగా తగ్గించే అంశాలు ఉన్నాయని అమెరికా వాణిజ్య ప్రతినిధి కార్యాలయం వెల్లడించింది. ఎగుమతి నియంత్రణలు, ట్రాన్స్‌షిప్‌మెంట్, డిజిటల్ వాణిజ్యం, కీలక ఖనిజాలు, బలవంతపు కార్మికులతో తయారైన వస్తువుల దిగుమతులపై ఇరు దేశాల మధ్య సహకారం కూడా ప్రతిపాదనలో ఉన్నట్లు తెలిపింది.

అదే విధంగా ఏరోస్పేస్ రంగంలో సరఫరా గొలుసు సమన్వయం, యునైటెడ్ స్టేట్స్-మెక్సికో-కెనడా ఒప్పందం (USMCA)పై అధికారిక చర్చలకు సంబంధించిన ప్రకటన కూడా ఈ ప్యాకేజీలో భాగంగా ఉండేదని అమెరికా పేర్కొంది. అమెరికాతో భాగస్వామ్యం చేసుకునే అవకాశాన్ని కెనడా కోల్పోయిందని అమెరికా వాణిజ్య ప్రతినిధి విమర్శించారు.

మరోవైపు కెనడా ప్రధానమంత్రి కార్నీ.. తమ దేశం చాలా కెనడియన్ వ్యాపారాలకు సుంకాల రహిత అమెరికా మార్కెట్ ప్రవేశం, ద్వైపాక్షిక వాణిజ్యంలో స్థిరత్వం, వ్యూహాత్మక పరిశ్రమలపై సుంకాల తగ్గింపును కోరిందని తెలిపారు. అదే సమయంలో కెనడా తన ఆర్థిక స్వాతంత్ర్యం, విధానపరమైన సౌలభ్యాన్ని కొనసాగిస్తూ చిన్న, మధ్య తరహా వ్యాపారాలను రక్షించుకోవాలని భావించిందని చెప్పారు.

అమెరికాతో గతంలో ఉన్న సంబంధాలు ఇకపై యథాతథంగా ఉండవని కెనడా గుర్తించిందని కార్నీ అన్నారు. ఏదైనా గడువులోపు ఒప్పందం కుదుర్చుకోవడం కంటే.. కెనడియన్ల ప్రయోజనాలను కాపాడే ఉత్తమ ఒప్పందాన్ని సాధించడమే తమ లక్ష్యమని స్పష్టం చేశారు. రాబోయే రోజుల్లో కెనడియన్ కార్మికులు, వ్యాపారాలకు అదనపు ఆర్థిక సహాయాన్ని ప్రకటిస్తామని తెలిపారు. గత 18 నెలల్లో అందించిన దాదాపు 25 బిలియన్ డాలర్ల మద్దతుకు ఇది అదనంగా ఉంటుందని చెప్పారు.

తాజా సుంకాలపై అమెరికాలోనూ వ్యతిరేకత వ్యక్తమవుతోంది. వెర్మాంట్‌కు చెందిన డెమొక్రటిక్ సెనేటర్, సెనేట్ ఫైనాన్స్ కమిటీ సభ్యుడు పీటర్ వెల్చ్.. కెనడియన్ వస్తువులపై కొత్తగా విధించనున్న 50 శాతం సుంకాలను ఉపసంహరించుకోవాలని అధ్యక్షుడు డొనాల్డ్ ట్రంప్‌ను కోరారు. ఈ సుంకాలు అమెరికా వ్యాపారాలు, రైతులు, కుటుంబాలపై ప్రతికూల ప్రభావం చూపుతాయని ఆయన అన్నారు.

అమెరికా-కెనడా మధ్య వాణిజ్య విధానంపై కాంగ్రెస్ పాత్రను పెంచే ప్రతిపాదనలకు కూడా వెల్చ్ మద్దతు ఇస్తున్నారు. కెనడాపై విధించే సుంకాల నుంచి అమెరికా యాజమాన్యంలోని చిన్న వ్యాపారాలకు మినహాయింపు కల్పించే చట్టానికి ఆయన ప్రధాన స్పాన్సర్‌గా ఉన్నారు.

ఇప్పటికే ఆటోమొబైల్స్, లోహాలు, అటవీ ఉత్పత్తులపై అమెరికా విధించిన సుంకాలు కెనడా ప్రతీకార చర్యలకు దారితీశాయి. కెనడా 51వ అమెరికా రాష్ట్రంగా మారుతుందంటూ ట్రంప్ చేసిన వ్యాఖ్యలు కూడా ఇరు దేశాల మధ్య రాజకీయ ఉద్రిక్తతలను పెంచాయి. తాజా సుంకాల నేపథ్యంలో అమెరికాపై ఆర్థిక ఆధారపడటాన్ని తగ్గించుకోవాలన్న డిమాండ్లు కెనడాలో మరింత బలపడే అవకాశం కనిపిస్తోంది.