US Iran War: ఇరాన్ పై మళ్లీ దండయాత్రకు సిద్ధమైన అమెరికా.. మిడిల్ ఈస్ట్ కు 10 వేల మంది కొత్త సైనికులు

US Iran War: అమెరికా రక్షణ శాఖ పెంటగాన్ మిడిల్ ఈస్ట్ ప్రాంతంలో తన బలగాలను విపరీతంగా పెంచుతోంది. ఈ ప్రాంతానికి మూడో విమాన వాహక నౌకతో పాటు మెరైన్ సైనికులతో కూడిన అదనపు యుద్ధనౌకలను పంపుతోంది. దీనివల్ల ఇక్కడ అదనంగా 9 వేల నుంచి 10 వేల మంది అమెరికన్ సైనికులు మోహరించనున్నారు. అమెరికా అధ్యక్షుడు డొనాల్డ్ ట్రంప్ ఇరాన్‌పై మరోసారి దాడులు చేసేందుకు ప్రణాళికలు రచిస్తున్న తరుణంలో ఈ పరిణామం చోటుచేసుకుంది. నవంబర్ చివరి నాటికి ఈ యుద్ధనౌకలు, ఫైటర్ జెట్లు, మెరైన్ సైనికులు మిడిల్ ఈస్ట్ చేరుకుంటారని అమెరికా అధికారులు స్పష్టం చేశారు.

ట్రంప్ హెచ్చరికలు

డొనాల్డ్ ట్రంప్ ఇటీవల ఇరాన్ సమర్పించిన ఏడు రోజుల కాల్పుల విరమణ ప్రతిపాదనను స్పష్టంగా తిరస్కరించారు. ఒకవేళ ఒప్పందం కుదరకపోతే మిడ్‌టర్మ్ ఎన్నికల తర్వాత ఇరాన్‌‌పై దాడులు ప్రారంభిస్తామని ఆయన ఇంటర్వ్యూలలో హెచ్చరించారు. ఇరాన్ తన ప్రతిపాదనలో హార్ముజ్ జలసంధిని తిరిగి తెరవడం, అణు కార్యక్రమంపై చర్చలు జరపడం వంటి అంశాలను ప్రస్తావించింది. బదులుగా అమెరికా తన ఓడరేవుల దిగ్బంధాన్ని ఎత్తివేయాలని కోరింది. అయితే ట్రంప్ ఈ ప్రతిపాదనను పక్కనపెట్టి సైనిక శక్తిని పెంచేందుకే మొగ్గు చూపారు.

మూడో విమాన వాహక నౌకతో పెరిగిన యుద్ధ భయం

ప్రస్తుతం మిడిల్ ఈస్ట్‌లో అమెరికాకు చెందిన యూఎస్‌ఎస్ జార్జ్ హెచ్‌డబ్ల్యు బుష్, యూఎస్‌ఎస్ జార్జ్ వాషింగ్టన్ యుద్ధనౌకలు అందుబాటులో ఉన్నాయి. ఇప్పుడు మరో నౌక తోడవ్వడంతో ఏప్రిల్ తర్వాత తొలిసారిగా ఈ ప్రాంతంలో మూడు విమాన వాహక నౌకల సమూహం మోహరించినట్లవుతుంది. ఇప్పటికే ఈ ప్రాంతంలో 50 వేలకు పైగా అమెరికన్ సైనికులు ఉన్నారు. ఈ కొత్త బలగాల రాకతో ఉద్రిక్తతలు మరింత తారాస్థాయికి చేరే అవకాశం ఉంది. వైట్‌హౌస్, పెంటగాన్ ఈ తాజా పరిణామాలపై అధికారికంగా ఎలాంటి ప్రకటన చేయలేదు.

ఎయిర్‌బోర్న్ డివిజన్, అధునాతన రక్షణ వలయం

ఈ సైనిక సర్దుబాటులో భాగంగా అమెరికా రక్షణ మంత్రి పెట్ హెగ్సెత్ గగనతల రక్షణ దళాలను, సైన్యానికి చెందిన 82వ ఎయిర్‌బోర్న్ డివిజన్‌ను రంగంలోకి దించారు. ఈ గగనతల రక్షణ యూనిట్లు ఇరాన్ ప్రయోగించే క్షిపణులను, డ్రోన్లను అడ్డుకోవడంలో కీలక పాత్ర పోషిస్తాయి. మరోవైపు గత కొన్ని నెలలుగా అమెరికా నావికాదళం దాదాపు 20 యుద్ధనౌకలతో ఇరాన్ ఓడరేవులను దిగ్బంధించింది. హార్ముజ్ గుండా వెళ్లే వాణిజ్య నౌకలకు రక్షణ కల్పిస్తూ ఈ ప్రాంతంలో పట్టు బిగించింది.