US Iran War : అమెరికా సైనికుల మృతి.. ప్రతీకారంతో ఇరాన్‌పై విరుచుకుపడ్డ ట్రంప్ సేనలు

US Iran War : మిడిల్ ఈస్ట్‎లో యుద్ధ జ్వాలలు ఒక్కసారిగా భీకర రూపాన్ని దాల్చాయి. జొర్డాన్‌లోని అమెరికా మిలిటరీ బేస్‌పై ఇరాన్ మద్దతుదారులు జరిపిన డ్రోన్, క్షిపణి దాడుల్లో ఇద్దరు యూఎస్ సైనికులు ప్రాణాలు కోల్పోవడంతో అమెరికా అధ్యక్షుడు డోనాల్డ్ ట్రంప్ తీవ్ర ఆగ్రహం వ్యక్తం చేశారు. తమ సైనికుల మరణానికి ప్రతీకారంగా అమెరికా సైన్యం ఇరాన్ భూభాగమే లక్ష్యంగా సరికొత్త వైమానిక దాడులను ముమ్మరం చేసింది. ఇరాన్ రెవల్యూషనరీ గార్డ్స్‎ను దెబ్బతీయడమే ధ్యేయంగా అమెరికా సెంట్రల్ కమాండ్ ఈ విధ్వంసకర దాడులకు ఆదేశాలు ఇచ్చింది. ఈ సరికొత్త దాడులతో ఇరాన్ రాజధాని తేహ్రాన్‌తో పాటు పలు సరిహద్దు ప్రాంతాలు క్షిపణుల మోతతో అట్టుడుకుతున్నాయి.

జొర్డాన్ సైనిక స్థావరంపై దాడికి ప్రతీకారం

అమెరికా సైనిక వర్గాల సమాచారం ప్రకారం.. అంతర్జాతీయంగా అత్యంత కీలకమైన హోర్ముజ్ జలసంధి గుండా వెళ్లే చమురు ట్యాంకర్లను అడ్డుకునే ఇరాన్ సైనిక సామర్థ్యాన్ని పూర్తిగా అణచివేయడమే ఈ దాడుల ప్రధాన ఉద్దేశం. ప్రపంచవ్యాప్తంగా సరఫరా అయ్యే మొత్తం కమర్షియల్ చమురులో దాదాపు 20 శాతం భాగం ఈ సముద్ర మార్గం గుండానే రవాణా అవుతుంది. ఇరాన్ అధికారిక వార్తా సంస్థ ఐఆర్ఎన్ఏ వెల్లడించిన వివరాల ప్రకారం.. సౌత్ హోర్మోజ్గన్ ప్రావిన్స్‌ పరిధిలోని సిరిక్ నగర పరిసర ప్రాంతాలపై అమెరికా యుద్ధ విమానాలు స్థానిక కాలమానం ప్రకారం తెల్లవారుజామున 1:30 గంటలకు బాంబుల వర్షం కురిపించాయి.

మహా సైతాన్‌‎కు గుణపాఠం తప్పదు

మరోవైపు అమెరికా అధికారికంగా తన సైనికుల మరణవార్తను ప్రకటించడానికి కొన్ని నిమిషాల ముందే, ఇరాన్ అత్యున్నత ఆధ్యాత్మిక నాయకుడు మొజ్తబా ఖమేనీ వాషింగ్టన్‌కు గట్టి వార్నింగ్ ఇచ్చారు. అమెరికా గనుక ఇరాన్ ఇస్లామిక్ రిపబ్లిక్‌పై దాడులను ఆపకపోతే వైట్ హౌస్ జీవితంలో ఎప్పటికీ మర్చిపోలేని గుణపాఠాన్ని నేర్పుతామని ఆయన హెచ్చరించారు. అంతేకాకుండా ఇరాన్‌తో పాటు ఆ ప్రాంతంలోని ఇరాన్ అనుకూల సాయుధ కూటమి అయిన యాక్సిస్ ఆఫ్ రెసిస్టెన్స్ రంగంలోకి దిగుతుందని ఖమేనీ స్పష్టం చేశారు. ఒక నెల క్రితం కుదిరిన తాత్కాలిక శాంతి ఒప్పందంలోని నిబంధనలను అమెరికా ఉల్లంఘించిందని, అందుకే తాము కూడా ఆ ఒప్పంద కట్టుబాట్లను పక్కన పెడుతున్నట్లు ఇరాన్ విదేశాంగ శాఖ ప్రకటించింది.

ఇరాక్‌లోనూ డ్రోన్ల కలకలం

ఈ యుద్ధ ప్రభావం పక్కనే ఉన్న ఇరాక్ దేశంపై కూడా తీవ్రంగా పడింది. ఇరాక్‌లోని సెమీ-అటానమస్ కుర్దిష్ ప్రాంత రాజధాని ఇర్బిల్ సమీపంలో ఉన్న కుర్దిస్తాన్ ఫ్రీడమ్ పార్టీ (ఇరాన్ వ్యతిరేక కుర్దిష్ తిరుగుబాటు గ్రూపు) బేస్‌పై ఆదివారం తెల్లవారుజామున భీకర డ్రోన్ దాడి జరిగింది. ఈ దాడిలో ఆ సంస్థకు చెందిన ఎనిమిది మంది సభ్యులు తీవ్రంగా గాయపడినట్లు సైనిక అధికారులు ధృవీకరించారు. ఇర్బిల్ నగర ప్రజలు తెల్లవారుజామున ఎయిర్ డిఫెన్స్ సిస్టమ్స్ నుంచి వచ్చిన పెద్ద పెద్ద పేలుడు శబ్దాలతో భయాందోళనలకు గురయ్యారు. ఇరాక్ కొత్త ప్రధానమంత్రి అలీ అల్-జైదీ అమెరికా పర్యటన ముగించుకుని వచ్చిన కొద్దిరోజుల్లోనే ఈ ఉద్రిక్తతలు పెరగడం గమనార్హం.

కువైట్‌లో తీవ్ర ఇంధన, తాగునీటి సంక్షోభం

ఈ రణరంగంలో శనివారం జరిగిన ఇరాన్ ప్రతీకార దాడుల వల్ల పొరుగు దేశమైన కువైట్ తీవ్రంగా నష్టపోయింది. కువైట్ పెట్రోలియం కార్పొరేషన్ నివేదికల ప్రకారం.. ఇరాన్ క్షిపణులు కువైట్‌లోని ఒక ప్రధాన చమురు కేంద్రంతో పాటు, సముద్రపు ఉప్పు నీటిని తాగునీరుగా మార్చే అతిపెద్ద డిసాలినేషన్ ప్లాంట్‎ను టార్గెట్ చేశాయి. ఎడారి దేశమైన కువైట్ తన తాగునీటి అవసరాల కోసం 90 శాతం ఈ ప్లాంట్ల పైనే ఆధారపడుతుంది. ఈ దాడి కారణంగా ప్లాంట్‌లో భారీగా మంటలు చెలరేగి, పలు విద్యుత్ ఉత్పాదన కేంద్రాలు నిలిచిపోయాయి. ప్రమాదాన్ని పసిగట్టిన కువైట్ ప్రభుత్వం భద్రతా కారణాల దృష్ట్యా తన వైమానిక రంగాన్ని తాత్కాలికంగా మూసివేసింది.

ప్రపంచ ఆర్థిక వ్యవస్థకు హోర్ముజ్ గండం

యుద్ధం మొదలైనప్పటి నుంచి ఇప్పటివరకు 16 మంది అమెరికా సైనికులు మరణించగా, 430 మందికి పైగా గాయపడ్డారు. ప్రస్తుత పరిస్థితుల్లో ఇరు దేశాల మధ్య మధ్యవర్తిత్వం వహించే ప్రయత్నాలేవీ ఫలించడం లేదు. జొర్డాన్, బహ్రెయిన్, సౌదీ అరేబియా వంటి గల్ఫ్ దేశాలలో కూడా వైమానిక దాడుల సైరన్లు మోగుతుండటంతో గల్ఫ్ కోఆపరేషన్ కౌన్సిల్ (GCC) సెక్రటరీ జనరల్ జాసెమ్ మహ్మద్ అల్-బుదైవి, ఇరాన్ చర్యలను తీవ్రంగా ఖండించారు. సామాన్య ప్రజల మౌలిక వసతులపై దాడులు చేయడం యుద్ధ నేరాల కిందికి వస్తుందని ఆయన మండిపడ్డారు. హోర్ముజ్ జలసంధి వేదికగా జరుగుతున్న ఈ యుద్ధం వల్ల అంతర్జాతీయ చమురు సరఫరా నిలిచిపోయి, ప్రపంచ ఆర్థిక వ్యవస్థ మరోసారి తీవ్ర సంక్షోభంలోకి వెళ్లే సూచనలు కనిపిస్తున్నాయి.