Donald Trump: మరో షాకిచ్చేందుకు ట్రంప్ రెడీ.. రష్యా చమురు కొంటే భారీ సుంకాలు

Donald Trump: అమెరికా హౌస్ ఆఫ్ రిప్రజెంటేటివ్స్ రష్యా, ఇరాన్‌లపై కఠిన ఆంక్షలు విధించే శాంక్షనింగ్ రష్యా అండ్ ఇరాన్ యాక్ట్ 2026 బిల్లును భారీ మెజారిటీతో ఆమోదించింది. ఈ బిల్లు ప్రకారం అమెరికా అధ్యక్షుడు డొనాల్డ్ ట్రంప్‌కు అపారమైన అధికారాలు లభించాయి. రష్యా నుంచి ముడి చమురు, సహజ వాయువును కొనుగోలు చేసే అగ్రగామి దేశాలపై ఏకంగా 100 శాతం వరకు దిగుమతి సుంకం విధించే అధికారం ఇప్పుడు ట్రంప్‌కు దక్కింది. ఈ జాబితాలో భారతదేశంతో పాటు చైనా, స్లొవేకియా, హంగేరి, అజర్‌బైజాన్ వంటి దేశాలు కూడా ఉండే అవకాశం ఉంది.

భారత్‌కు పెరగనున్న టెన్షన్

ఈ బిల్లు సెనేట్‌లో ఇప్పటికే ఆమోదం పొందగా, ఇప్పుడు కేవలం అధ్యక్షుడు డొనాల్డ్ ట్రంప్ సంతకం మాత్రమే మిగిలి ఉంది. ఇది చట్టరూపం దాల్చితే రష్యా నుంచి చమురు దిగుమతి చేసుకునే దేశాలపై ఒత్తిడి మరింత పెరిగే అవకాశం ఉంది. అయితే ఈ బిల్లు ట్రంప్‌ను కచ్చితంగా టారీఫ్ లు విధించాలని ఎక్కడా బలవంతం చేయడం లేదు. కేవలం ఆయనకు ఆ విచక్షణాధికారాన్ని మాత్రమే కల్పిస్తోంది. అంతేకాకుండా రష్యాతో ఇంధన దిగుమతులను ఇప్పటికే తగ్గించుకున్న యూరప్ దేశాలకు ఈ నిబంధనల నుంచి కొన్ని మినహాయింపులు కూడా లభించే అవకాశం ఉంది.

రాజకీయ నాటకం మధ్య ఊహించని మలుపు

మొదట్లో ఈ బిల్లు పాస్ కావడం కష్టంగానే కనిపిచింది. ఎన్నికల ముందస్తు రాజకీయాల కారణంగా రిపబ్లికన్, డెమోక్రాటిక్ పార్టీల మధ్య దీనిపై తీవ్ర వాగ్వాదాలు నడిచాయి. కానీ, అనూహ్యంగా సోమవారం జరిగిన పరిణామాల్లో సభా నిబంధనల అడ్డంకులు తొలగిపోవడంతో ఈ బిల్లు ముందుకు కదిలింది. హౌస్‌లో జరిగిన ఓటింగ్‌లో కొద్దిమంది డెమోక్రాటిక్ సభ్యులు కూడా రిపబ్లికన్లకు మద్దతుగా ఓటు వేయడంతో ఈ బిల్లు సులభంగా నెగ్గింది. పుతిన్ ప్రభుత్వానికి ఇది అమెరికా నుంచి గట్టి హెచ్చరిక అని సెనేటర్ జీన్ షాహీన్ పేర్కొన్నారు.