Donald Trump : భారత్ సహా 6 సంస్థలపై ట్రంప్ సర్కార్ ఆంక్షల అస్త్రం

Donald Trump : అమెరికా ప్రభుత్వం ఇరాన్ ఆర్థిక, సైనిక నెట్‌వర్క్‌లను తుంగలో తొక్కేందుకు తమ వ్యూహాన్ని మరింత తీవ్రతరం చేసింది. ఇరాన్‌కు చెందిన ఇస్లామిక్ రివాల్యూషనరీ గార్డ్ కార్ప్స్ (IRGC), దానికి చెందిన ప్రముఖ విమానయాన సంస్థ మహాన్ ఎయిర్‎కు సహాయం అందిస్తున్నారనే ఆరోపణలతో భారత్, చైనా, రష్యా, ఇరాన్‌లకు చెందిన ఆరు సంస్థలు, వ్యక్తులపై కఠినమైన ఆర్థిక ఆంక్షలు విధించినట్లు వాషింగ్టన్ గురువారం అధికారికంగా ప్రకటించింది. ఈ ఆంక్షలతో ప్రపంచ వ్యాప్తంగా దౌత్యపరమైన వేడి ఒక్కసారిగా పెరిగింది.

ఆంక్షలకు అసలు కారణమేంటి?

అమెరికా ఆరోపణల ప్రకారం.. మహాన్ ఎయిర్‌లైన్స్ గత కొంతకాలంగా ఆయుధాలు, మిలిటరీ పరికరాలు, ఐఆర్‌జిసి-కుద్స్ ఫోర్స్ సిబ్బందిని వివిధ ప్రాంతాలకు తరలించడంలో కీలక పాత్ర పోషిస్తోంది. ఈ తీవ్రవాద అనుబంధ సంస్థకు వాణిజ్యపరమైన, లాజిస్టికల్, లేదా ఆర్థిక సాయం అందించడం అంటే తీవ్రవాద సంస్థలకు మద్దతు ఇవ్వడమేనని యుఎస్ ట్రెజరీ సెక్రటరీ స్కాట్ బెస్సెంట్ స్పష్టం చేశారు. ఐఆర్‌జిసికి చెందిన ఒక సంస్థ అమెరికా, ఇజ్రాయెల్ డిఫెన్స్ హార్డ్‌వేర్ లొకేషన్ల సమాచారాన్ని సేకరించి, దాడులకు టార్గెట్‌లను నిర్ణయించడంలో ఇరాన్ సైన్యానికి సాయం చేసిందని యుఎస్ బలంగా విశ్వసిస్తోంది.

హోర్ముజ్ సేఫ్ ప్రోగ్రామ్ పేరిట దోపిడీ?

ఆఫీస్ ఆఫ్ ఫారిన్ అసెట్స్ కంట్రోల్ విడుదల చేసిన అధికారిక ప్రకటన ప్రకారం.. జనవరి నుంచి ఇప్పటివరకు అమెరికా ట్రెజరీ విభాగం 100 కి పైగా సముద్ర నౌకలపై ఆంక్షలు విధిస్తూ జాబితా విడుదల చేసింది. తాజాగా ఆంక్షలకు గురైన అనేక కంపెనీలు ఇరాన్ నడుపుతున్న హోర్ముజ్ సేఫ్ ప్రోగ్రామ్ అనే నిర్బంధ సముద్ర బీమా దోపిడీ వ్యవస్థలో భాగస్వాములుగా ఉన్నాయని తేలింది. స్ట్రెయిట్ ఆఫ్ హోర్ముజ్ ద్వారా వెళ్లే వాణిజ్య నౌకలు కచ్చితంగా ఈ ఇన్సూరెన్స్ కొనాలని ఇరాన్ ఒత్తిడి తెస్తోందని, ఈ ప్రోగ్రామ్ ద్వారా వచ్చే ఆదాయాన్ని ఇరాన్ ప్రభుత్వం తమ మిలిటరీ అవసరాలకు ఉపయోగిస్తోందని ట్రెజరీ విభాగం ఆరోపించింది.

తెహ్రాన్‌పై నిరంతర ఒత్తిడి

గత కొద్ది రోజులుగా ఇరాన్‌ను దారికి తెచ్చేందుకు అమెరికా ఆర్థిక ఒత్తిడిని క్రమంగా పెంచుతోంది. ఇందులో భాగంగానే ఇటీవలే ఎనిమిది ఆయిల్ ట్యాంకర్లు, 10 కార్పొరేట్ సంస్థలపై ఆంక్షలు విధించగా.. మరుసటి రోజే చైనాలోని ప్రధాన కార్యాలయాలు కలిగి ఉన్న ఆరు వాణిజ్య కంపెనీలను ఈ నల్ల జాబితాలో చేర్చారు. ఇరాన్‌తో ఎలాంటి వ్యాపార సంబంధాలు పెట్టుకున్నా, లేదా వారికి లాజిస్టికల్ మద్దతు ఇచ్చినా తీవ్ర పరిణామాలు ఉంటాయని, ఈ ఆర్థిక ఆంక్షల పరంపర మున్ముందు కూడా కొనసాగుతుందని అమెరికా హెచ్చరించింది.