US Iran Conflict: ఇరాన్‌పై విరుచుకుపడ్డ అమెరికా.. క్విషమ్ దీవిపై క్షిపణుల వర్షం

US Iran Conflict: పశ్చిమాసియా ప్రాంతంలో మరోసారి యుద్ద భయాలు తారాస్థాయికి చేరాయి. అమెరికా సైన్యం ఇరాన్ పై సంచలన రీతిలో మళ్లీ ప్రతిదాడికి దిగింది. ఇరాన్లోని వ్యూహాత్మక ప్రాముఖ్యత కలిగిన క్విషమ్ దీవిని లక్ష్యంగా చేసుకుని యుఎస్ సైనిక బృందాలు క్షిపణుల వర్షం కురిపించాయి. అమెరికాలో మిడ్‌టర్మ్ ఎన్నికల పోలింగ్ ప్రక్రియ సాగుతున్న కీలక సమయంలో అధ్యక్షుడు డొనాల్డ్ ట్రంప్ తీసుకున్న ఈ నిర్ణయం ప్రపంచవ్యాప్తంగా తీవ్ర చర్చనీయాంశంగా మారింది. గత కొద్ది రోజులుగా చిన్నపాటి దాడులతో హెచ్చరికలు జారీ చేసిన యుఎస్, ఈసారి నేరుగా విరుచుకుపడటంతో అంతర్జాతీయంగా ఆందోళన పెరుగుతోంది.

రాడార్లు, మిసైల్ లాంచర్లు ధ్వంసం

వాల్ స్ట్రీట్ జర్నల్ కథనం ప్రకారం.. అమెరికా బలగాలు క్విషమ్ దీవిలో ఉన్న ఇరాన్ సైనిక స్థావరాలపై తీవ్రస్థాయిలో దాడులు నిర్వహించాయి. ఇరాన్ సైన్యానికి చెందిన రాడార్ డిటెక్టర్లు, వ్యూహాత్మక క్షిపణి లాంచర్లను యుఎస్ మిసైళ్లు పూర్తిగా ధ్వంసం చేసినట్లు తెలుస్తోంది. ఈ వైమానిక దాడిలో ఇరాన్ మిలిటరీ స్థావరాలు భారీగా దెబ్బతిన్నట్లు సమాచారం లభించింది. అయితే ఈ ఘటనలో ఎంతమంది ప్రాణాలు కోల్పోయారు, ఎంతమేరకు ఆస్తి నష్టం వాటిల్లిందనే వివరాలు ఇంకా అధికారికంగా వెల్లడికావాల్సి ఉంది. ప్రత్యర్థి నుంచి ఆకస్మిక ప్రతిదాడి రాకుండా చూసేందుకే అమెరికా ఈ తరహా దాడులు చేసిందని నిపుణులు విశ్లేషిస్తున్నారు.

ఆత్మరక్షణ కోసమే దాడి

ఇరాన్పై జరిపిన సైనిక చర్యను అమెరికా రక్షణ శాఖ అధికారులు తీవ్రంగా సమర్థించుకున్నారు. తమ సైనిక స్థావరాలను రక్షించుకోవడానికి మాత్రమే ఈ ఆత్మరక్షణ చర్యలు చేపట్టినట్లు యుఎస్ ప్రతినిధి ఒకరు స్పష్టం చేశారు. అమెరికాకు చెందిన మిలిటరీ స్థావరాలను లక్ష్యంగా చేసుకుని ఇరాన్ నేల నుంచి గాల్లోకి పేల్చే క్షిపణులను ప్రయోగిస్తోందని, ఆ ప్రమాదాన్ని ముందే అడ్డుకోవడానికే క్విషమ్ దీవిలోని లాంచర్లను నాశనం చేశామని వెల్లడించారు. పశ్చిమాసియాలో తమ సైనికుల భద్రతకు ఏమాత్రం ముప్పు వచ్చినా ఉపేక్షించేది లేదని తేల్చి చెప్పారు.

ఇజ్రాయెల్ ఒత్తిడి వల్లే ట్రంప్ ఈ నిర్ణయం తీసుకున్నారా?

ఇజ్రాయెల్ ప్రధానమంత్రి బెంజామిన్ నెతన్యాహు ఇరాన్ అంశంపై అమెరికా అధ్యక్షుడితో నిరంతరం సంప్రదింపులు జరుపుతున్న సంగతి తెలిసిందే. మిడ్‌టర్మ్ ఎన్నికలు ముగిసిన వెంటనే ఇరాన్పై తీవ్రమైన చర్యలు తీసుకోవాలని ఇజ్రాయెల్ అమెరికాపై ఒత్తిడి తెస్తున్నట్లు విశ్లేషణలు వెలువడుతున్నాయి. ఈ దాడికి ముందే ట్రంప్ స్పందిస్తూ ఇరాన్ విషయంలో తమ ముందు అన్ని ఆప్షన్లు తెరిచే ఉన్నాయని సంచలన వ్యాఖ్యలు చేశారు. ఇరు దేశాల మధ్య గత కొంతకాలంగా నెలకొన్న తీవ్ర ఉద్రిక్తతలు ఈ దాడితో మరింత ముదిరే ప్రమాదం కనిపిస్తోంది.

ఎన్నికల వేళ అమెరికా రాజకీయం తీవ్ర వేడి

అమెరికా మిడ్‌టర్మ్ ఎన్నికల పోలింగ్ సమయంలోనే ఈ విధమైన మిలిటరీ చర్య జరగడం వెనుక రాజకీయ ప్రాధాన్యత కూడా ఉందనే చర్చ నడుస్తోంది. డెమోక్రాట్లను నిరోధించడానికి అలాగే స్వదేశంలో తమ బలాన్ని నిరూపించుకోవడానికి ట్రంప్ పరిపాలన తన సైనిక అధికారాన్ని ఉపయోగించినట్లు విశ్లేషకులు భావిస్తున్నారు. అంతర్జాతీయంగా తీవ్ర పరిణామాలు ఎదురవుతున్నప్పటికీ, ట్రంప్ సర్కార్ ఇరానుకు దౌత్యపరమైన అలాగే సైనిక పరమైన సవాళ్లను విసురుతోంది. రాబోయే గంటల్లో ఇరాన్ ఇచ్చే తిరుగు సమాధానంపైనే పశ్చిమాసియా భవిష్యత్తు ఆధారపడి ఉంటుంది.