మళ్లీ వైట్ హౌస్ బయట కాల్పులు.. పరుగులు పెట్టిన జర్నలిస్టులు.. వీడియో వైరల్..

అమెరికా అధ్యక్షుడి అధికారిక నివాసమైన ‘వైట్ హౌస్’ (White House) వెలుపల శనివారం సాయంత్రం కలకలం రేగింది. అత్యంత కట్టుదిట్టమైన భద్రత ఉండే సెక్యూరిటీ చెక్‌పాయింట్ సమీపంలో అకస్మాత్తుగా తుపాకీ కాల్పుల శబ్దం వినిపించడంతో ఒక్కసారిగా అక్కడ తీవ్ర భయాందోళనలు నెలకొన్నాయి. ఆ సమయంలో వైట్ హౌస్ నార్త్ లాన్ (North Lawn) నుండి లైవ్ రిపోర్టింగ్ ఇస్తున్న అంతర్జాతీయ మీడియా జర్నలిస్టులు, రిపోర్టర్లు బుల్లెట్ల శబ్దానికి భయపడి ప్రాణాలు చేతపట్టుకుని సురక్షిత ప్రాంతాలకు పరుగులు తీశారు.

ఈ భీతిగొలిపే సంఘటనకు సంబంధించిన పలు నాటకీయ వీడియోలు ప్రస్తుతం సామాజిక మాధ్యమాలలో విపరీతంగా వైరల్ అవుతున్నాయి. అత్యంత సురక్షితమైన ప్రదేశంగా భావించే వైట్ హౌస్ ముందే ఇలాంటి ఘటన జరగడం అంతర్జాతీయంగా పెద్ద సంచలనంగా మారింది.

లైవ్ వీడియోలు.. జర్నలిస్టుల హాహాకారాలు..

కాల్పులు జరిగిన ఆ కొన్ని సెకన్లలో అక్కడ ఏం జరుగుతుందో ఎవరికీ అర్థం కాలేదు. సోషల్ మీడియాలో వైరల్ అవుతున్న ఒక వీడియోలో.. ప్రముఖ అంతర్జాతీయ వార్తా సంస్థ 'ఏబీసీ న్యూస్' (ABC News) ప్రతినిధి సెలీనా వాంగ్ , ఇతర జర్నలిస్టులు వరుసగా కాల్పుల శబ్దాలు వినబడగానే భయంతో పరుగులు పెట్టడం కనిపించింది. ఆ సమయంలో అక్కడ దాదాపు 15 నుండి 30 రౌండ్ల పాటు వేగంగా కాల్పులు జరిగినట్లు ప్రత్యక్ష సాక్షులు తెలిపారు.

ఈ ఘటనపై సెలీనా వాంగ్ స్పందిస్తూ.. తాను వైట్ హౌస్ నార్త్ లాన్ నుండి ఒక సోషల్ మీడియా సెగ్మెంట్ కోసం షూటింగ్ చేస్తున్న సమయంలో ఈ కాల్పులు ప్రారంభమయ్యాయని చెప్పారు. "అవి డజన్ల కొద్దీ తుపాకీ కాల్పుల శబ్దాల్లా వినిపించాయి. వెంటనే మమ్మల్ని ప్రెస్ బ్రీఫింగ్ రూమ్‌లోకి వేగంగా పరిగెత్తమని అక్కడి భద్రతా సిబ్బంది ఆదేశించారు" అని ఆమె తన ఎక్స్ (ట్విట్టర్) ఖాతాలో భయానక అనుభవాన్ని పంచుకున్నారు. మరో వైరల్ వీడియోలో, మీడియా ఏరియాలో నిలబడిన ఒక రిపోర్టర్.. ఆ శబ్దాలు వినగానే "అసలు ఏంటది?" అని భయంతో అడుగుతుండటం, మిగిలిన వారు అక్కడున్న బారికేడ్లు, ఎక్విప్‌మెంట్‌ల వెనుక దాక్కోవడం స్పష్టంగా రికార్డైంది.

అసలేం జరిగింది..? నిందితుడు ఎవరు..?

యూఎస్ సీక్రెట్ సర్వీస్ (US Secret Service) తెలిపిన వివరాల ప్రకారం.. ఒక గుర్తుతెలియని వ్యక్తి వైట్ హౌస్ వెలుపల ఉన్న సెక్యూరిటీ చెక్‌పాయింట్ వద్దకు చేరుకుని, అక్కడ ఉన్న అధికారులపైకి అకస్మాత్తుగా కాల్పులు జరపడం ప్రారంభించాడు. దీంతో అప్రమత్తమైన సీక్రెట్ సర్వీస్ ఏజెంట్లు వెంటనే ఎదురుకాల్పులు జరిపారు. ఈ కాల్పుల్లో సదరు సాయుధ నిందితుడు అక్కడికక్కడే మరణించాడు. లా ఎన్‌ఫోర్స్‌మెంట్ వర్గాలు నిందితుడిని 21 ఏళ్ల నాసిరే బెస్ట్ (Nasire Best) గా గుర్తించాయి. ఈ ఉభయ పక్షాల కాల్పుల మధ్యలో అక్కడ నిలబడిన ఒక సాధారణ పౌరుడికి (Bystander) కూడా బుల్లెట్ గాయాలయ్యాయి. ప్రస్తుతానికి ఆ గాయపడిన వ్యక్తి ఆరోగ్య పరిస్థితి ఎలా ఉందనేది అధికారులు ఇంకా అధికారికంగా వెల్లడించలేదు.

“నేనే దేవుడి కొడుకును”.. నిందితుడి విచిత్ర నేపథ్యం

అమెరికన్ మీడియా వెల్లడించిన కోర్టు రికార్డుల ప్రకారం.. నిందితుడు నాసిరే బెస్ట్‌కు గతంలోనే క్రిమినల్ రికార్డు ఉంది. అంతేకాకుండా అతనికి మానసిక సమస్యలు ఉన్నట్లు తేలింది. గతంలో ఒకసారి స్థానిక పోలీసులు అతన్ని బలవంతంగా సైకియాట్రిక్ ఆసుపత్రిలో చేర్పించారు. మరో ఘటనలో, తానే స్వయంగా "జీసస్ క్రైస్ట్" అని క్లెయిమ్ చేస్తూ నానా రచ్చ చేయడంతో స్థానిక పోలీసులు అతడిని అరెస్ట్ చేశారు.

ప్రస్తుతం దర్యాప్తు అధికారులు నాసిరే బెస్ట్ సోషల్ మీడియా ఖాతాలను క్షుణ్ణంగా పరిశీలిస్తున్నారు. అందులో అతను అమెరికా అధ్యక్షుడు డొనాల్డ్ ట్రంప్‌ను హింసిస్తానని, చంపేస్తానని బెదిరిస్తూ గతంలో పోస్టులు పెట్టినట్లు గుర్తించారు. అలాగే మరో మెసేజ్‌లో "నిజానికి నేనే దేవుడి కొడుకును" (I'm actually the son of God) అంటూ రాసుకున్నట్లు దర్యాప్తులో తేలింది.

I was in the middle of taping on my iPhone for a social video from the White House North Lawn when we heard the shots. It sounded like dozens of gunshots. We were told to sprint to the press briefing room where we are holding now. pic.twitter.com/iqdQwh4soq

— Selina Wang (@selinawangtv) May 23, 2026

🚨 WHITE HOUSE SHOOTING REACTIONS

Three reporters go live as shots ring out near the White House.

Two duck for cover immediately.

One stands there completely clueless.

Never be the woman in the middle. pic.twitter.com/dVkQ31shsM

— Alec Lace (@AlecLace) May 24, 2026