China: ప్రేమగా కౌగిలించుకున్న భర్త.. విరిగిన భార్య పక్కటెముకలు

China: చైనాలోని జియాంగ్సు ప్రావిన్స్‌లో ఒక వింత మరియు దిగ్భ్రాంతికర ఘటన వెలుగుచూసింది. బరువు తగ్గాలనే తపనతో ఆహారాన్ని నియంత్రిస్తూ (డైటింగ్ చేస్తూ) రాత్రి భోజనం మానేస్తున్న ఒక మహిళ, భర్త ప్రేమగా కౌగిలించుకోవడంతో తీవ్రంగా గాయపడింది. భర్త హగ్ చేసుకోవడం వల్ల సదరు మహిళకు ఏకంగా ఐదు పక్కటెముకలు విరగ్గా, మరొక ఎముకకు పగులు ఏర్పడటం నెట్టింట తీవ్ర చర్చనీయాంశంగా మారింది.

చైనా మీడియా కథనాల ప్రకారం.. జియాంగ్సు ప్రాంతానికి చెందిన వాంగ్ అనే వ్యక్తి, తన భార్య చలిగా ఉందని చెప్పడంతో ఆమెను ప్రేమగా ఆలింగనం చేసుకున్నాడు. అయితే, కౌగిలించుకున్న వెంటనే ఆ మహిళ తీవ్రమైన నొప్పితో కేకలు వేస్తూ కింద కూర్చుండిపోయింది. మొదట సాధారణ నొప్పేనని భావించి రాత్రంతా భరించినప్పటికీ, ఉదయానికి నొప్పి మరింత ఎక్కువ కావడంతో ఆస్పత్రికి వెళ్లింది. ఆమెను పరీక్షించిన వైద్యులు.. ఐదు పక్కటెముకలు విరిగిపోవడంతో పాటు మరొక ఎముకకు పగులు ఏర్పడినట్లు గుర్తించి షాక్‌కు గురయ్యారు.

ఈ ఘటనపై భర్త వాంగ్ స్పందిస్తూ.. తాను ఎప్పటిలాగే సాధారణంగానే కౌగిలించుకున్నానని, అంత తీవ్రంగా గాయాలవుతాయని ఊహించలేదని చెప్పాడు. తన భార్య బరువు సుమారు 50 కిలోలు ఉంటుందని, ఇటీవల బరువు తగ్గాలనే ఉద్దేశంతో రాత్రి భోజనం పూర్తిగా మానేసి కేవలం ఒక కప్పు కాఫీతో సరిపెట్టుకుంటోందని తెలిపాడు. అంతేకాకుండా రోజంతా ఇంట్లోనే ఉండటం వల్ల ఆమెకు ఎండ తగలక విటమిన్-డి లోపం కూడా ఏర్పడిందని వెల్లడించాడు.

బాధితురాలిని పరీక్షించిన వైద్యులు.. ఆమె గాయపడటానికి 'ఆస్టియోపోరోసిస్' (Osteoporosis - ఎముకలు తీవ్రంగా బలహీనపడటం) ప్రధాన కారణమై ఉండవచ్చని ప్రాథమికంగా నిర్ధారించారు. పోషకాహార లోపం, కఠినమైన డైటింగ్ మరియు విటమిన్ డి లోపం వల్ల ఎముకలు బోలుబారి అతి స్వల్ప ఒత్తిడికే విరిగిపోయే ప్రమాదం ఉందని హెచ్చరించారు.