Duvvuru: జెడ్పీటీసీగా ఎన్డీయే అభ్యర్థి బోరెడ్డి ఇందు ఏకగ్రీవ ఎన్నిక!

​దువ్వూరు: వైఎస్సార్ జిల్లా దువ్వూరు మండల పరిషత్ ప్రాదేశిక నియోజకవర్గ (ZPTC) ఉప ఎన్నికలో ఎన్డీయే (టీడీపీ) కూటమి అభ్యర్థినిగా శ్రీమతి బోరెడ్డి ఇందు ఏకగ్రీవంగా ఎన్నికయ్యారు. నామినేషన్ల ఉపసంహరణ గడువు ముగిసే సమయానికి ప్రత్యర్థులెవరూ బరిలో లేకపోవడంతో ఆమె ఎన్నిక లాంఛనమైంది. దువ్వూరు మండల టీడీపీ అధ్యక్షుడు బోరెడ్డి వెంకటరమణారెడ్డి కోడలైన శ్రీమతి ఇందు ఎన్నిక పట్ల నియోజకవర్గ వ్యాప్తంగా హర్షాతిరేకాలు వ్యక్తమవుతున్నాయి.

​మైదుకూరు శాసనసభ్యులు పుట్టా సుధాకర్ యాదవ్ సంపూర్ణ ఆశీస్సులు, సమష్టి కృషి ఫలితంగానే ఈ ఏకగ్రీవం సాధ్యమైందని కూటమి వర్గాలు తెలిపాయి. తమపై నమ్మకంతో ఈ బాధ్యతను అప్పగించిన మైదుకూరు ఎమ్మెల్యే పుట్టా సుధాకర్ యాదవ్ గారికి ఈ సందర్భంగా బోరెడ్డి కుటుంబ సభ్యులు ప్రత్యేక కృతజ్ఞతలు తెలియజేశారు.

​శ్రీమతి ఇందు ఏకగ్రీవంగా ఎన్నికైన సందర్భంగా మండలంలోని టీడీపీ, జనసేన, బీజేపీ నాయకులు, కార్యకర్తలు, గ్రామ ప్రజలు, అభిమానులు ఆమెకు అభినందనలు తెలిపారు. ఈ సందర్భంగా మండల కూటమి నాయకులు మాట్లాడుతూ.. రానున్న రోజుల్లో దువ్వూరు మండలాన్ని అన్ని రంగాల్లో అభివృద్ధి పథంలో నడిపించేందుకు కృషి చేస్తామని పేర్కొన్నారు. ఈ గెలుపునకు సహకరించిన ప్రతి ఒక్క కార్యకర్తకు, నాయకుడికి, ప్రజలకు వారు ధన్యవాదాలు తెలియజేశారు.