Duvvuru: దువ్వూరులో రెండు ఎంపీటీసీ స్థానాలకు నేడే పోలింగ్

​దువ్వూరు: దువ్వూరు మండలంలో గురువారం జరగనున్న రెండు ఎంపీటీసీ స్థానాల ఎన్నికలకు సంబంధించి అన్ని ఏర్పాట్లు పూర్తి చేసినట్లు మండల ఎన్నికల అధికారి రవిచంద్రబాబు, ఎంపీడీవో జవహర్‌బాబు తెలిపారు. మండలంలో మొత్తం 15 ఎంపీటీసీ స్థానాలు ఉండగా, ఇప్పటికే 13 స్థానాలు ఏకగ్రీవమయ్యాయి. మిగిలిన నీలాపురం, చల్లబసాయిపల్లె స్థానాల్లో పోటీ నెలకొనడంతో గురువారం ఉదయం 7:00 గంటల నుంచి పోలింగ్ ప్రారంభం కానుంది.

​ఎన్నికల విధులకు సంబంధించి 8 పోలింగ్ కేంద్రాలకు బుధవారం మధ్యాహ్నమే సిబ్బంది సామగ్రితో సహా చేరుకున్నారు. నీలాపురం ఎంపీటీసీ పరిధిలోని దాసరిపల్లె, రామ్‌సాయినగర్, చిన్నబాకరాపురం, మూడిండ్లపల్లె గ్రామాల్లో 4 కేంద్రాలు, చల్లబసాయిపల్లె పరిధిలోని సంజీవరెడ్డిపల్లె, పుల్లారెడ్డిపేట, మనేరాంపల్లె గ్రామాల్లో 4 కేంద్రాలను ఏర్పాటు చేశారు. ఎన్నికలు పారదర్శకంగా జరిగేందుకు అన్ని పోలింగ్ కేంద్రాల్లో సీసీ కెమెరాలను అమర్చినట్లు అధికారులు వెల్లడించారు. ఇప్పటికే బీఎల్‌వోల ద్వారా ఓటర్లందరికీ స్లిప్పుల పంపిణీ పూర్తయింది.

​మొత్తం 8 కేంద్రాల్లో 40 మంది ఎన్నికల సిబ్బందితో పాటు ఒక మైక్రో అబ్జర్వర్‌ను, పటిష్టమైన పోలీసు బందోబస్తును నియమించారు. ఎన్నికల సరళిని ఎప్పటికప్పుడు పర్యవేక్షించేందుకు ప్రతి రెండు గంటలకోసారి ఏపీఎస్‌ఈసీ (APSEC) యాప్‌లో పోలింగ్ శాతాన్ని నమోదు చేయనున్నారు. ఈ కార్యక్రమంలో తహసీల్దార్ సునీత, డిప్యూటీ ఎంపీడీవోలు హరికృష్ణ యాదవ్, వెంకటరమణారెడ్డి, పంచాయతీ కార్యదర్శులు మరియు మండల పరిషత్ కార్యాలయ సిబ్బంది పాల్గొన్నారు.