Duvvur: అనుమతి లేకుండా గ్రావెల్ తరలిస్తే కఠిన చర్యలు!

Duvvur: మండల పరిధిలో ప్రభుత్వ అనుమతులు లేకుండా అక్రమంగా గ్రావెల్ తరలిస్తే ఎంతటి వారిపై అయినా కఠిన చర్యలు తీసుకుంటామని తహశీల్దార్ సునీత హెచ్చరించారు. మండలంలో ఎక్కడైనా అక్రమ రవాణా జరుగుతున్నట్లు తెలిస్తే వెంటనే అధికారులకు సమాచారం అందించాలని ప్రజలను కోరారు.

​గురువారం నీలాపురం కొండ ప్రాంతం నుంచి అక్రమంగా గ్రావెల్ తరలిస్తున్నట్లు సమాచారం అందడంతో రెవెన్యూ సిబ్బంది ఆకస్మిక తనిఖీలు చేపట్టారు. ఈ క్రమంలో నిబంధనలకు విరుద్ధంగా తిరుగుతున్న ఐదు టిప్పర్లను అధికారులు అదుపులోకి తీసుకున్నారు. పట్టుబడిన వాటిలో గ్రావెల్ లోడుతో ఉన్న రెండు టిప్పర్లకు ఒక్కో దానికి ₹10,000 చొప్పున, లోడింగ్ కోసం సిద్ధంగా ఉన్న మిగిలిన మూడు ఖాళీ టిప్పర్లకు ఒక్కొక్క దానికి ₹5,000 వంతున మొత్తం ₹35,000 జరిమానా విధించినట్లు తేలిపారు.

​ఎవరైనా ప్రభుత్వ నిబంధనల ప్రకారం ముందస్తు అనుమతులు తీసుకున్న తర్వాతే గ్రావెల్ తరలించాలని, నిబంధనలు అతిక్రమిస్తే వాహనాలను సీజ్ చేయడంతో పాటు కేసులు నమోదు చేస్తామని తేలిపారు . ఈ కార్యక్రమంలో డిప్యూటీ తహశీల్దార్ నాగస్వరూప్, భూ సర్వే డిప్యూటీ తహశీల్దార్ ఆదిలక్ష్మి తదితరులు పాల్గొన్నారు.