Justice For Keerthana : ప్రేమోన్మాదికి బుద్ధి చెప్పిన పోలీసులు.. కీర్తన గొంతుకోసిన నిందితుడికి బుల్లెట్ దెబ్బ

Justice For Keerthana : కడప జిల్లా ఖాజీపేటలో చోటుచేసుకున్న ఇంటర్ విద్యార్థిని కీర్తన హత్యోదంతం రాష్ట్రవ్యాప్తంగా సంచలనం సృష్టించింది. ప్రేమ పేరుతో ఉన్మాదిగా మారిన యువకుడు ఒక నిండు ప్రాణాన్ని బలితీసుకోగా, అతడిని పట్టుకునే క్రమంలో పోలీసులు జరిపిన కాల్పులు ఈ కేసులో కీలక మలుపుగా మారాయి. బసాపురం చెక్‌పోస్ట్ వద్ద సినిమా సీన్లను తలపించేలా జరిగిన ఈ ఎన్‌కౌంటర్ ఉదంతం ఇప్పుడు హాట్ టాపిక్‌గా మారింది. వివరాల్లోకి వెళితే.. కడప జిల్లా ఖాజీపేట మండలానికి చెందిన ఇంటర్ విద్యార్థిని కీర్తన, నిందితుడు ఈవుల వెంకటేష్ ఒకే గ్రామానికి చెందినవారు. వెంకటేష్ డిగ్రీ చదువుతుండగా, కొంతకాలంగా కీర్తనను ప్రేమ పేరుతో వేధిస్తున్నాడు. తన ప్రేమను అంగీకరించడం లేదన్న కోపంతో శనివారం మధ్యాహ్నం కీర్తన ఇంట్లో ఒంటరిగా ఉన్న సమయం చూసి లోపలికి చొరబడ్డాడు. కీర్తన ప్రతిఘటించినా వినకుండా, వెంట తెచ్చుకున్న కత్తితో ఆమె గొంతు కోసి పరారయ్యాడు. తీవ్ర రక్తస్రావంతో కొట్టుమిట్టాడుతున్న బాలికను తల్లిదండ్రులు ఆస్పత్రికి తరలించేలోపే ప్రాణాలు కోల్పోవడం గ్రామంలో పెను విషాదాన్ని నింపింది.

సినిమా ఫక్కీలో పోలీసుల కాల్పులు

హత్య జరిగిన వెంటనే నిందితుడు వెంకటేష్ బైక్‌పై పరారయ్యాడు. కడప ఎస్పీ ఆదేశాలతో రంగంలోకి దిగిన పోలీసులు జిల్లావ్యాప్తంగా అలెర్ట్ ప్రకటించారు. బసాపురం చెక్‌పోస్ట్ వద్ద పోలీసులు తనిఖీలు నిర్వహిస్తుండగా, వెంకటేష్ అనుమానాస్పదంగా కనిపించాడు. పోలీసులు అతడిని చుట్టుముట్టగా, వెంకటేష్ లొంగిపోవడానికి బదులుగా వెంట తెచ్చుకున్న కత్తితో పోలీసులపైనే దాడికి దిగి తప్పించుకోవడానికి యత్నించాడు. ఈ క్రమంలో ఆత్మరక్షణ కోసం పోలీసులు నిందితుడి కాలిని లక్ష్యంగా చేసుకుని కాల్పులు జరిపారు. బుల్లెట్ గాయం కావడంతో వెంకటేష్ అక్కడికక్కడే కుప్పకూలిపోయాడు.

రిమ్స్‌లో భారీ బందోబస్తు

గాయపడిన నిందితుడిని పోలీసులు వెంటనే అదుపులోకి తీసుకుని చికిత్స నిమిత్తం కడప రిమ్స్ ఆస్పత్రికి తరలించారు. ప్రస్తుతం అతడికి అత్యవసర విభాగంలో చికిత్స అందుతోంది. నిందితుడిపై గ్రామస్తులు లేదా ఇతరులు దాడి చేసే అవకాశం ఉన్నందున, ఆస్పత్రి ఆవరణలో భారీ పోలీస్ బందోబస్తు ఏర్పాటు చేశారు. వెంకటేష్ ఆరోగ్యం నిలకడగా ఉన్నట్లు సమాచారం. చికిత్స అనంతరం అతడిని కోర్టులో హాజరుపరిచి రిమాండ్‌కు తరలించనున్నారు.

గ్రామంలో ఉద్రిక్తత

కీర్తన హత్యతో ఖాజీపేట గ్రామం శోకసముద్రంలో మునిగిపోయింది. చదువుల్లో చురుగ్గా ఉంటూ, ఎంతో భవిష్యత్తు ఉన్న కీర్తనను ఉన్మాది వెంకటేష్ బలితీసుకోవడాన్ని గ్రామస్తులు జీర్ణించుకోలేకపోతున్నారు. మరోవైపు నిందితుడిపై కాల్పులు జరిగాయన్న వార్తతో గ్రామంలో ఎటుచూసినా పోలీసులే కనిపిస్తున్నారు. ఎటువంటి అవాంఛనీయ సంఘటనలు జరగకుండా శాంతిభద్రతల దృష్ట్యా అదనపు బలగాలను మోహరించారు. నిందితుడికి త్వరగా విచారణ జరిపి ఉరిశిక్ష పడేలా చూడాలని కీర్తన తల్లిదండ్రులు కన్నీరుమున్నీరుగా విలపిస్తూ డిమాండ్ చేస్తున్నారు.