Porumamilla: ఇంగ్లీష్ ఉపాధ్యాయుడు విజయ భాస్కర్‌కు జిల్లా ఉత్తమ అవార్డు

పోరుమామిళ్ల: జెడ్పీ హైస్కూల్‌లో మొదటి ఇంగ్లీష్ ఉపాధ్యాయుడిగా 31 సంవత్సరాలుగా విశిష్ట సేవలందిస్తున్న ఇండ్ల విజయ భాస్కర్ కడప జిల్లా ఉత్తమ ఉపాధ్యాయ అవార్డుకు ఎంపిక కావడం పట్ల విద్యార్థులు, తల్లిదండ్రులు, ఉపాధ్యాయులు హర్షం వ్యక్తం చేస్తున్నారు.

విద్యార్థుల్లో ఇంగ్లీష్ మాధ్యమంపై ఆసక్తిని పెంపొందించడంతో పాటు, వారిలో సామాజిక స్పృహను కల్పించడంలో ఇండ్ల విజయ భాస్కర్ విశేష కృషి చేశారు. పాఠశాల పరిశుభ్రతపై ప్రత్యేక శ్రద్ధ వహిస్తూ, విద్యార్థుల పట్ల ఆప్యాయతతో వ్యవహరిస్తూ వారి విద్యాభివృద్ధికి నిరంతరం కృషి చేశారు.

ఇంగ్లీష్ మాధ్యమంలో అత్యుత్తమ ప్రతిభ కనబరిచిన విద్యార్థులను ప్రోత్సహించేందుకు ప్రతి సంవత్సరం రూ.1,016 చొప్పున మూడు బహుమతులు అందిస్తూ విద్యార్థుల్లో చదువుపై ఆసక్తిని, పోటీతత్వాన్ని పెంపొందించారు.

అలాగే గత 17 సంవత్సరాలుగా తాను పనిచేసిన ప్రతి పాఠశాలలో పదో తరగతి విద్యార్థులు 100 శాతం ఉత్తీర్ణత సాధించేలా ప్రత్యేక శ్రద్ధ తీసుకుని, విద్యార్థులను తీర్చిదిద్దడంలో ప్రధాన పాత్ర పోషించారు. బలహీన విద్యార్థులపై ప్రత్యేక దృష్టి సారించి వారికి అవసరమైన మార్గదర్శకత్వం అందిస్తూ ఉత్తమ ఫలితాలు సాధించేలా కృషి చేశారు.

తల్లిదండ్రులతో మమేకమై విద్యార్థుల చదువు, ప్రవర్తన, భవిష్యత్తుపై అవగాహన కల్పిస్తూ అనేక కార్యక్రమాలు చేపట్టారు. విద్యార్థుల ప్రతిభను గుర్తించి వారికి సరైన మార్గదర్శకత్వం అందిస్తూ, ఎంతోమంది విద్యార్థుల భవిష్యత్తుకు బంగారు బాటలు వేసిన ఉపాధ్యాయుడిగా ఇండ్ల విజయ భాస్కర్ గుర్తింపు పొందారు.

ఇండ్ల విజయ భాస్కర్ మాట్లాడుతూ, కడప జిల్లా ఉత్తమ ఉపాధ్యాయ అవార్డుకు ఎంపిక కావడం తనకు ఎంతో సంతోషంగా ఉందని తెలిపారు. ఈ అవార్డు తనపై మరింత బాధ్యతను పెంచిందని, ఇకపై కూడా విద్యార్థుల అభ్యున్నతి కోసం మరింత అంకితభావంతో పనిచేస్తానని పేర్కొన్నారు. తన సేవలను గుర్తించి కడప జిల్లా ఉత్తమ ఉపాధ్యాయ అవార్డుకు ఎంపిక చేసిన ప్రతి ఒక్కరికీ కృతజ్ఞతలు తెలిపారు.