Proddatur: ప్రొద్దుటూరులో చెన్నకేశవ స్వామి దసరా ఉత్సవాలు

​ప్రొద్దుటూరు: కడప జిల్లా ప్రొద్దుటూరు పట్టణంలో ఆధ్యాత్మిక శోభ సంతరించుకుంది. ప్రసిద్ధ పుణ్యక్షేత్రమైన పాత మార్కెట్‌లోని శ్రీ మహాలక్ష్మి సమేత చెన్నకేశవ స్వామివారి ఆలయంలో 36వ వార్షిక విజయదశమి (దసరా) వేడుకలు నేటి నుంచి అత్యంత వైభవంగా ప్రారంభంకానున్నాయి.

ఇందుకు సంబంధించిన పూర్తి ఏర్పాట్లను ఉత్సవ కమిటీ ఘనంగా పూర్తి చేసింది. ప్రొద్దుటూరు పట్టణంలోని చారిత్రాత్మక పాత మార్కెట్ ప్రాంతంలో వెలసిన శ్రీ మహాలక్ష్మి సమేత చెన్నకేశవ స్వామివారి ఆలయంలో ప్రతి ఏటా నిర్వహించే దసరా మహోత్సవాలకు రంగం సిద్ధమైంది.

ఈ వేడుకలను పురస్కరించుకుని ఆలయ ఉత్సవ కమిటీ అధ్యక్షుడు అరవ చెన్నారెడ్డి, కోశాధికారి లేపూరు రామాంజనేయులు శనివారం ఏర్పాటు చేసిన విలేకరుల సమావేశంలో ఉత్సవ వివరాలను మీడియాకు వెల్లడించారు. ​

ఈ సందర్భంగా వారు మాట్లాడుతూ... ఈ ఏడాది 36వ వార్షిక విజయదశమి వేడుకలను అత్యంత వైభవంగా, నేత్రపర్వంగా నిర్వహించనున్నట్లు తెలిపారు. ఉత్సవాల్లో భాగంగా తొలిరోజు పాత బస్టాండ్‌లోని శ్రీ ఆంజనేయస్వామి దేవస్థానం నుండి పవిత్ర గంగాజల కలశాలను ఘనంగా ఊరేగింపుగా తీసుకువస్తారు.

అనంతరం వేద పండితుల మంత్రోచ్ఛారణల నడుమ అంకురార్పణ కార్యక్రమంతో ఈ పది రోజుల మహోత్సవాలు అధికారికంగా ప్రారంభమవుతాయి. పది రోజుల పాటు సాగే ఈ వేడుకల్లో భాగంగా అమ్మవారికి వివిధ రకాల విశేష అలంకరణలు, ప్రత్యేక పూజలు, హోమాలు నిర్వహించనున్నారు.

​సాంస్కృతిక మరియు ప్రత్యేక కార్యక్రమాలు: దసరా పర్వదినాన్ని పురస్కరించుకుని నిర్వహించే అమ్మవారి శమీ దర్శనం (జమ్మీ చెట్టు పూజ) మరియు గ్రామోత్సవం కార్యక్రమాలు అత్యంత రమణీయంగా ఉండనున్నాయి. భక్తులను ఆకట్టుకునేందుకు వివిధ ప్రాంతాల నుంచి ప్రత్యేకంగా తెప్పించిన బ్యాండ్ మేళాలు, తప్పట్లు, కేరళ మంగళ వాయిద్యాలు ఈ ఉత్సవాలకు మరింత శోభను చేకూర్చనున్నాయి.

ఉత్సవాలకు విచ్చేసే భక్తుల సౌకర్యార్థం ప్రతిరోజూ స్వామి, అమ్మవార్లను దర్శించుకునే భక్తులందరికీ మహా అన్నప్రసాద వితరణ కార్యక్రమం ఏర్పాటు చేసినట్లు కమిటీ సభ్యులు తెలిపారు.

పది రోజుల పాటు జరిగే ఈ వేడుకల్లో పట్టణ ప్రజలు, చుట్టుపక్కల గ్రామాల భక్తులు పెద్ద సంఖ్యలో పాల్గొని శ్రీ మహాలక్ష్మి సమేత చెన్నకేశవ స్వామివారి కృపకు పాత్రులు కావాలని, ఈ మహోత్సవాలను విజయవంతం చేయాలని ఉత్సవ కమిటీ పిలుపునిచ్చింది. ఈ సమావేశంలో ఉత్సవ కమిటీ మెంబెర్స్ తదితరులు పాల్గొన్నారు.