Annamayya: 7వ రోజుకు చేరుకున్న వీఆర్ఏల సహాయ నిరాకరణ సమ్మె!

Annamayya: తమ న్యాయమైన డిమాండ్లను ప్రభుత్వం తక్షణమే పరిష్కరించాలని కోరుతూ గ్రామీణ రెవెన్యూ సహాయకులు (వీఆర్ఏలు) చేపట్టిన సహాయ నిరాకరణ సమ్మె ఏడో రోజుకు చేరుకుంది. రాష్ట్రవ్యాప్తంగా కొనసాగుతున్న ఆందోళనలో భాగంగా పోరుమామిళ్ల మండలానికి చెందిన వీఆర్ఏలు తమ నిరసనను ఉధృతం చేశారు.

సోమవారం పోరుమామిళ్ల ఎమ్మార్వోకు వీఆర్ఏలు సమ్మె నోటీసులు అందజేశారు. అనంతరం మంగళవారం ఎమ్మార్వో కార్యాలయం ఎదుట పెద్ద సంఖ్యలో వీఆర్ఏలు ఆందోళన చేపట్టి తమ సమస్యలను ప్రభుత్వం దృష్టికి తీసుకెళ్లారు. ఈ సందర్భంగా ‘ఎన్నాళ్లు ఈ వెట్టి చాకిరి?’, ‘సమాన పనికి సమాన వేతనం కల్పించాలి’ అంటూ నినాదాలు చేస్తూ తమ డిమాండ్లను పరిష్కరించాలని కోరారు.

ప్రధాన డిమాండ్లు ఇవే..

ఇతర రాష్ట్రాల్లో అమలవుతున్న విధంగా తమకు కూడా సమాన పనికి సమాన వేతనం ఇవ్వాలని వీఆర్ఏలు డిమాండ్ చేస్తున్నారు. తమ సేవలకు తగిన గుర్తింపు కల్పించడంతో పాటు ఉద్యోగ భద్రత కల్పించాలని కోరుతున్నారు. అర్హత, సీనియారిటీ ఆధారంగా వీఆర్ఏలకు వీఆర్‌ఓలుగా పదోన్నతి కల్పించాలని వారు డిమాండ్ చేశారు.

గ్రామస్థాయిలో రెవెన్యూ శాఖకు సంబంధించిన అనేక పనుల్లో కీలకంగా సేవలందిస్తున్నప్పటికీ తమకు సరైన వేతనాలు, ఉద్యోగ భద్రత లేకపోవడంతో తీవ్ర ఇబ్బందులు ఎదుర్కొంటున్నామని వీఆర్ఏలు ఆవేదన వ్యక్తం చేశారు. ఎన్నో ఏళ్లుగా విధులు నిర్వహిస్తున్న తమ సమస్యలపై ప్రభుత్వం సానుకూలంగా స్పందించి తగిన నిర్ణయం తీసుకోవాలని కోరారు.

సమస్యలు పరిష్కరించే వరకు ఆందోళన

తమ న్యాయమైన డిమాండ్లను పరిష్కరించకుండా కాలయాపన చేస్తే ఆందోళనను మరింత ఉధృతం చేస్తామని వీఆర్ఏలు హెచ్చరించారు. సమస్యలకు శాశ్వత పరిష్కారం చూపే వరకు సహాయ నిరాకరణ సమ్మెను కొనసాగిస్తామని, ఎట్టి పరిస్థితుల్లోనూ వెనకడుగు వేసేది లేదని స్పష్టం చేశారు.

ప్రభుత్వం వెంటనే స్పందించి వీఆర్ఏల సమస్యలను పరిష్కరించి, వారి ఆందోళనకు ముగింపు పలకాలని వారు కోరారు. దీంతో పోరుమామిళ్లలో వీఆర్ఏల ఆందోళన స్థానికంగా చర్చనీయాంశంగా మారింది.