Chitrada: చిత్రాడ ఇండియన్ బ్యాంకులో ఘనంగా కస్టమర్స్ డే వేడుకలు!

Chitrada: పిఠాపురం మండలం చిత్రాడ గ్రామంలోని ఇండియన్ బ్యాంకు బ్రాంచ్‌లో గురువారం కస్టమర్స్ డే వేడుకలను ఘనంగా నిర్వహించారు. ఈ సందర్భంగా బ్రాంచ్ మేనేజర్ గంగాధర్ రావు, అసిస్టెంట్ బ్రాంచ్ మేనేజర్ కిషోర్ ఖాతాదారులతో సమావేశమై బ్యాంకు అందిస్తున్న వివిధ సేవలు, ప్రొడక్ట్స్‌తో పాటు ప్రభుత్వ భద్రతా, సంక్షేమ పథకాలపై అవగాహన కల్పించారు.

ప్రత్యేకంగా PMJDY, PMJJBY, PMSBY, APY తదితర పథకాల గురించి ఖాతాదారులకు వివరించారు. అలాగే ఇన్సూరెన్స్ పథకాలు, వాటి ప్రయోజనాలపై ఖాతాదారులు అడిగిన సందేహాలను నివృత్తి చేసి, అవసరమైన సమాచారాన్ని అందించారు.

కస్టమర్ సర్వీసులను మరింత మెరుగుపరిచేందుకు ఖాతాదారుల నుంచి సలహాలు, సూచనలు స్వీకరించారు. ఈ సందర్భంగా పలువురు ఖాతాదారులు బ్యాంకుతో తమకు ఉన్న అనుభవాలను, బ్యాంకు సిబ్బంది అందిస్తున్న సేవలపై తమ అభిప్రాయాలను పంచుకున్నారు.

బ్యాంకు సిబ్బంది సానుకూలంగా స్పందిస్తూ ఖాతాదారులకు మరింత మెరుగైన సేవలు అందించేందుకు కృషి చేస్తామని తెలిపారు. కస్టమర్స్ డే సందర్భంగా నిర్వహించిన కార్యక్రమంపై చిత్రాడ గ్రామ ఖాతాదారులు సంతోషం వ్యక్తం చేశారు. తమ సమస్యలు, సందేహాలను నేరుగా బ్యాంకు అధికారులతో పంచుకునే అవకాశం కల్పించడం పట్ల ఆనందం వ్యక్తం చేశారు.

ఈ కార్యక్రమంలో బ్రాంచ్ మేనేజర్ గంగాధర్ రావు, అసిస్టెంట్ బ్రాంచ్ మేనేజర్ కిషోర్‌తో పాటు బ్రాంచ్ సిబ్బంది, పలువురు ఖాతాదారులు పాల్గొన్నారు.