Kakinada: తునిలో ఘోర రోడ్డు ప్రమాదం: లారీని ఢీకొన్న ప్రైవేట్ బస్సు!

Kakinada: కాకినాడ జిల్లా తుని పట్టణ పరిధిలో ఘోర రోడ్డు ప్రమాదం జరిగింది. డి-మార్ట్ సమీపంలో జాతీయ రహదారిపై తెల్లవారుజామున సుమారు రెండున్నర గంటల ప్రాంతంలో ప్రైవేట్ ట్రావెల్స్ బస్సు అదుపుతప్పి లారీని వెనుక నుంచి వేగంగా ఢీకొట్టింది.

​ప్రమాదం జరిగిన సమయంలో బస్సులో సుమారు 40 మంది ప్రయాణికులు ఉన్నట్లు సమాచారం. ఈ దుర్ఘటనలో బస్సు ముందు భాగం తీవ్రంగా దెబ్బతింది. ఈ ఘటనలో ప్రయాణికుల్లో 13 మందికి తీవ్ర గాయాలయ్యాయి.

​సమాచారం అందుకున్న వెంటనే పోలీసులు మరియు స్థానికులు ఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను వెంటనే చికిత్స నిమిత్తం తుని ప్రభుత్వ ఏరియా ఆసుపత్రికి తరలించారు. ప్రస్తుతం క్షతగాత్రులకు వైద్యులు మెరుగైన వైద్యం అందిస్తున్నారు. ఈ ప్రమాదంపై పోలీసులు కేసు నమోదు చేసి దర్యాప్తు చేస్తున్నారు.