Sircilla: గ్రామీణ ప్రజల్లో ఆరోగ్య: 17వ పోలీస్ బెటాలియన్ 10K రన్!

Sircilla: గ్రామీణ ప్రజల్లో ఆరోగ్యంపై అవగాహన కల్పించడంతో పాటు.. ఆరోగ్యకరమైన సమాజ నిర్మాణంలో ప్రతి ఒక్కరూ భాగస్వాములు కావాలనే సందేశంతో 17వ పోలీస్ బెటాలియన్ సిబ్బంది 10K రన్ నిర్వహించారు.

17వ పోలీస్ బెటాలియన్ కమాండెంట్ శ్రీ పి.జె.పి.సి. ఛటర్జీ ఆదేశాల మేరకు నిర్వహించిన ఈ కార్యక్రమంలో పోలీస్ సిబ్బంది బృందంగా రహదారులపై పరుగులు తీశారు. గ్రామీణ ప్రాంతాల మీదుగా సాగిన ఈ 10K రన్ స్థానిక ప్రజలను, యువతను, విద్యార్థులను విశేషంగా ఆకట్టుకుంది.

పోలీసులను సాధారణంగా విధుల్లో మాత్రమే చూసే గ్రామీణ ప్రజలకు.. పోలీస్ సిబ్బంది ఆరోగ్యం, ఫిట్‌నెస్‌కు ఇస్తున్న ప్రాధాన్యతను ఈ కార్యక్రమం ద్వారా తెలియజేశారు.

రోజువారీ జీవితంలో నడక, పరుగు వంటి సాధారణ వ్యాయామాలను అలవాటుగా చేసుకోవడం ద్వారా ఆరోగ్యాన్ని కాపాడుకోవచ్చని ప్రజలకు అవగాహన కల్పించారు. శారీరక దృఢత్వం కోసం ఖరీదైన పరికరాలు అవసరం లేదని.. ప్రతిరోజూ కొంత సమయం వ్యాయామానికి కేటాయిస్తే ఆరోగ్యంగా ఉండవచ్చని సూచించారు.

ముఖ్యంగా యువత మొబైల్ ఫోన్లు, ఇతర వ్యసనాలకు దూరంగా ఉంటూ క్రీడలు, వ్యాయామం, శారీరక శ్రమకు ప్రాధాన్యత ఇవ్వాలని పిలుపునిచ్చారు. కుటుంబ సభ్యులు సైతం రోజువారీ జీవితంలో కొంత సమయాన్ని ఆరోగ్య పరిరక్షణకు కేటాయించాలని సూచించారు.

ప్రజల మధ్య నిర్వహించిన ఈ 10K రన్.. పోలీసులకు, గ్రామీణ ప్రజలకు మధ్య మరింత అనుబంధాన్ని పెంచే కార్యక్రమంగా నిలిచింది. పోలీసుల క్రమశిక్షణ, ఫిట్‌నెస్‌తో పాటు ప్రజాసేవా స్ఫూర్తిని చాటేలా రన్ ఉత్సాహంగా సాగింది.

“మన ఆరోగ్యం మన చేతుల్లోనే ఉంది.. ప్రతిరోజూ కొంత సమయం వ్యాయామానికి కేటాయిద్దాం.. ఆరోగ్యంగా జీవిద్దాం” అనే సందేశాన్ని 17వ పోలీస్ బెటాలియన్ సిబ్బంది ఈ కార్యక్రమం ద్వారా ప్రజలకు అందించారు.