Karimnagar: భూగర్భ జలాల పెంపే లక్ష్యంగా 'జలసిరి' పనులు!

Karimnagar: ఎల్‌నినో నేపథ్యంలో భూగర్భ జలాలను పెంపొందించేందుకు గ్రామాల్లో జలసిరి కార్యక్రమం కింద విస్తృతంగా పనులు చేపట్టాలని జిల్లా కలెక్టర్ చిత్రా మిశ్రా అధికారులను ఆదేశించారు. భూగర్భ జల మట్టాలను పెంచేలా పకడ్బందీ ప్రణాళికతో ముందుకు సాగాలని సూచించారు.

ఐడీఓసీలోని కలెక్టర్ ఛాంబర్‌లో జిల్లాలో జలసిరి కార్యక్రమం కింద చేపట్టనున్న పనులపై జిల్లా స్థాయి అధికారులతో ఆమె సమీక్ష నిర్వహించారు. ఈ సందర్భంగా వివిధ శాఖల వారీగా చేపట్టాల్సిన పనులు, వాటి అమలుపై అధికారులకు దిశానిర్దేశం చేశారు.

ఫామ్ పాండ్ల నిర్మాణానికి ప్రోత్సాహం...

వ్యవసాయ శాఖ అధికారులు గ్రామాల్లో పెద్ద ఎత్తున ఫామ్ పాండ్లు నిర్మించేలా రైతులను ప్రోత్సహించాలని కలెక్టర్ సూచించారు. వర్షపు నీటిని నిల్వ చేసుకునే నిర్మాణాల ద్వారా భూగర్భ జలాల పెంపునకు కృషి చేయాలన్నారు. రైతులకు ఈ పనుల ప్రాధాన్యాన్ని వివరించి, గ్రామాల వారీగా కార్యాచరణ రూపొందించాలని పేర్కొన్నారు.

ఇంకుడు గుంతల నిర్మాణం వేగవంతం...

గ్రామాల్లో మ్యాజిక్ ఇంకుడు గుంతలు, కమ్యూనిటీ ఇంకుడు గుంతలను పెద్ద సంఖ్యలో నిర్మించేలా ప్రణాళిక సిద్ధం చేయాలని జిల్లా పంచాయతీ అధికారులను ఆదేశించారు. వర్షపు నీరు వృథాగా ప్రవహించకుండా భూమిలోకి ఇంకేలా అవసరమైన చర్యలు చేపట్టాలని సూచించారు.

బోర్‌వెల్ రీఛార్జ్‌పై ప్రత్యేక దృష్టి...

గ్రామీణ నీటి సరఫరా విభాగం (ఆర్‌డబ్ల్యూఎస్) అధికారులు బోర్‌వెల్ రీఛార్జ్ కార్యక్రమాన్ని విస్తృతంగా చేపట్టాలని కలెక్టర్ తెలిపారు. అదేవిధంగా ప్రభుత్వ కార్యాలయాల్లో రూఫ్‌టాప్ రెయిన్‌వాటర్ హార్వెస్టింగ్ వ్యవస్థలను ఏర్పాటు చేయాలని సూచించారు. వర్షపు నీటిని సమర్థంగా వినియోగించుకోవడం ద్వారా భూగర్భ జలాలను పెంపొందించేలా చర్యలు తీసుకోవాలన్నారు.

ఎల్‌నినో నేపథ్యంలో వర్షపాతం పరిస్థితులను దృష్టిలో ఉంచుకుని జల సంరక్షణ పనులకు ప్రాధాన్యం ఇవ్వాలని కలెక్టర్ స్పష్టం చేశారు. సంబంధిత శాఖల అధికారులు సమన్వయంతో గ్రామాల అవసరాలకు అనుగుణంగా పనులు చేపట్టి, భూగర్భ జలాల పెంపును లక్ష్యంగా పనిచేయాలని ఆదేశించారు. ఈ సమావేశంలో అదనపు కలెక్టర్ అశ్విని తానాజీ వాకడే, జిల్లా స్థాయి అధికారులు తదితరులు పాల్గొన్నారు.