Sircilla: మున్సిపల్ వైస్ చైర్మన్ సందీప్ రాజీనామాకు కాంగ్రెస్ డిమాండ్!

సిరిసిల్ల: ఇందిరమ్మ ఇళ్ల పేరుతో డబ్బులు డిమాండ్ చేశారనే ఆరోపణల నేపథ్యంలో బీఆర్ఎస్‌కు చెందిన సిరిసిల్ల మున్సిపల్ వైస్ చైర్మన్ దార్ల సందీప్ వెంటనే తన పదవికి రాజీనామా చేయాలని కాంగ్రెస్ పార్టీ నేతలు డిమాండ్ చేశారు. రాజన్న సిరిసిల్ల జిల్లా కేంద్రంలో నిర్వహించిన విలేకరుల సమావేశంలో మున్సిపల్ ఫ్లోర్ లీడర్ ఆడెపు చంద్రకళ ఈ డిమాండ్ చేశారు.

సిరిసిల్లలో కాంగ్రెస్ పార్టీ ఆధ్వర్యంలో ఏర్పాటు చేసిన పాత్రికేయుల సమావేశంలో మున్సిపల్ ఫ్లోర్ లీడర్ ఆడెపు చంద్రకళ మాట్లాడుతూ, ఇందిరమ్మ ఇళ్లు ఇప్పిస్తానంటూ రూ.1 లక్ష డిమాండ్ చేశారనే ఆరోపణలు ఎదుర్కొంటున్న బీఆర్ఎస్ మున్సిపల్ వైస్ చైర్మన్ దార్ల సందీప్ తన పదవికి రాజీనామా చేయాలని డిమాండ్ చేశారు.

కాంగ్రెస్ ప్రభుత్వం పేదలకు అన్యాయం జరగనివ్వదని, ఎవరైనా ఇలాంటి ఘటనల్లో బాధితులుగా ఉంటే కాంగ్రెస్ నాయకుడు యెల్లే లక్ష్మీనారాయణను సంప్రదించాలని ఆమె సూచించారు.

అదే విధంగా, సిరిసిల్లలో ఇసుక కొరత అంశాన్ని ప్రస్తావిస్తూ, గత బీఆర్ఎస్ ప్రభుత్వ హయాంలో జరిగిన అక్రమ ఇసుక రవాణాపైనా ఆమె ఆరోపణలు చేశారు. ఈ విషయాలను ప్రజలు గమనిస్తున్నారని అన్నారు.

ఈ విలేకరుల సమావేశంలో జిల్లా మహిళా కాంగ్రెస్ అధ్యక్షురాలు కాముని వనిత, కూరపాటి శ్రీశైలం, ఏఎంసీ డైరెక్టర్ ఖాజా మొయినుద్దీన్, వెంగళ లింగం, లాయక్ సుల్తానా, రుద్ర శ్రీనివాస్, లింగంపల్లి గంగరాజు, కాంగ్రెస్ నాయకులు, కార్యకర్తలు పాల్గొన్నారు.