Karimnagar: గణేష్ నిమజ్జనానికి ఎస్సారెస్పీ కాలువల్లో నీటిని విడుదల చేయాలి!
Karimnagar: గణేష్ నిమజ్జనానికి ఎస్సారెస్పీ కాలువల్లో నీటిని విడుదల చేయాలని కలెక్టర్, సీపీ, ఇరిగేషన్ అధికారులకు వినతిపత్రం సమర్పించిన మేయర్ కొలగాని శ్రీనివాస్.
Karimnagar: గణేష్ నిమజ్జనానికి ఎస్సారెస్పీ కాలువల్లో నీటిని విడుదల చేయాలి!
Karimnagar: కలెక్టర్, పోలీస్ కమిషనర్, ఇరిగేషన్ ఎస్ఈలను వ్యక్తిగతంగా కలిసి వినతిపత్రాలు అందజేసిన మేయర్ కొలగాని శ్రీనివాస్
గణేష్ నవరాత్రి ఉత్సవాలు, వినాయక నిమజ్జన కార్యక్రమాలను భక్తులకు ఎలాంటి ఇబ్బందులు కలగకుండా ప్రశాంతంగా, భక్తిశ్రద్ధలతో, సురక్షితంగా నిర్వహించేందుకు అన్ని శాఖలు సమన్వయంతో పకడ్బందీ ఏర్పాట్లు చేపట్టాలని కరీంనగర్ నగర మేయర్ కొలగాని శ్రీనివాస్ కోరారు.
ఈ మేరకు జిల్లా కలెక్టర్, పోలీస్ కమిషనర్, నీటిపారుదల శాఖ సూపరింటెండింగ్ ఇంజనీర్ (ఎస్ఈ)లను మేయర్ వ్యక్తిగతంగా కలిసి నిమజ్జన ఏర్పాట్లపై ప్రత్యేకంగా చర్చించారు. అనంతరం ఆయా అధికారులకు వినతిపత్రాలను అందజేశారు.
అలాగే జిల్లా ఇన్చార్జి మంత్రి తుమ్మల నాగేశ్వరరావు మరియు నీటిపారుదల శాఖ మంత్రి ఉత్తమ్ కుమార్ రెడ్డి లకు లేఖలు రాసి, గణేష్ నిమజ్జనానికి అనుకూలంగా ఎస్సారెస్పీ కాలువల్లో ముందస్తుగా నీటిని విడుదల చేయాలని మేయర్ విజ్ఞప్తి చేశారు.
చింతకుంట, కొత్తపల్లి నిమజ్జన కేంద్రాలకు ముందస్తుగా నీటి విడుదల చేయాలి...
కరీంనగర్ నగరంతో పాటు పరిసర ప్రాంతాలకు చెందిన గణేష్ విగ్రహాలను ప్రతి సంవత్సరం చింతకుంట, కొత్తపల్లి ప్రాంతాల్లోని ఎస్సారెస్పీ కాలువల్లో నిమజ్జనం చేయడం ఆనవాయితీగా వస్తోందని మేయర్ తెలిపారు.
ఈ ఏడాది కూడా వేలాది మంది భక్తులు నిమజ్జన కార్యక్రమానికి తరలివచ్చే అవకాశం ఉన్నందున, నిమజ్జన తేదీలను దృష్టిలో ఉంచుకొని కాలువల్లో ముందుగానే సరిపడా నీటిని విడుదల చేసి, అవసరమైన నీటిమట్టాన్ని నిరంతరం కొనసాగించాలని ఇరిగేషన్ ఎస్ఈని కోరారు.
కాలువల్లో నీరు లేకపోవడం లేదా నీటిమట్టం తక్కువగా ఉండటం వల్ల నిమజ్జనానికి ఆటంకం కలగడంతో పాటు భక్తులకు ఇబ్బందులు, ప్రమాదాలు సంభవించే అవకాశం ఉందని పేర్కొన్నారు. భక్తుల భద్రతను దృష్టిలో ఉంచుకొని ముందస్తు కార్యాచరణ రూపొందించాలని విజ్ఞప్తి చేశారు.
అన్ని శాఖల సమన్వయానికి కలెక్టర్ ప్రత్యేక ఆదేశాలు ఇవ్వాలి...
నిమజ్జన ఏర్పాట్లలో ఇరిగేషన్, పోలీస్, నగరపాలక సంస్థ, విద్యుత్, వైద్య–ఆరోగ్య, అగ్నిమాపక శాఖల మధ్య సమన్వయం అత్యంత కీలకమని మేయర్ పేర్కొన్నారు.
సంబంధిత శాఖల అధికారులతో ప్రత్యేక సమీక్ష నిర్వహించి, చింతకుంట, కొత్తపల్లి నిమజ్జన కేంద్రాల్లో అన్ని ఏర్పాట్లు సకాలంలో పూర్తయ్యేలా స్పష్టమైన ఆదేశాలు జారీ చేయాలని జిల్లా కలెక్టర్ను కోరారు.
నిమజ్జన ప్రాంతాల్లో ప్రధాన రహదారుల మరమ్మతులు, గుంతల పూడ్చివేత, గ్రావెల్ ఏర్పాటు, నిరంతర విద్యుత్ సరఫరా, ఫ్లడ్లైట్లు, తాగునీటి సౌకర్యం, పారిశుధ్య నిర్వహణ, వైద్య శిబిరాలు, అంబులెన్స్లు, క్రేన్లు, బారికేడింగ్, గజ ఈతగాళ్లు, లైఫ్ జాకెట్లు, సమాచార బోర్డులు తదితర సౌకర్యాలను ముందుగానే అందుబాటులో ఉంచాలని కోరారు.
పటిష్ఠ పోలీస్ బందోబస్తు.. ప్రత్యేక ట్రాఫిక్ ప్రణాళిక
గణేష్ విగ్రహాల ఊరేగింపు మార్గాలు, ప్రధాన కూడళ్లు, నిమజ్జన కేంద్రాల వద్ద పటిష్ఠమైన పోలీస్ బందోబస్తు ఏర్పాటు చేయాలని పోలీస్ కమిషనర్ను మేయర్ కోరారు.
భక్తుల రద్దీ కారణంగా ట్రాఫిక్కు అంతరాయం కలగకుండా ముందుగానే ప్రత్యేక ట్రాఫిక్ ప్రణాళిక రూపొందించి, అవసరమైన ప్రాంతాల్లో వాహనాల దారి మళ్లింపు చర్యలు చేపట్టాలని సూచించారు.
మహిళలు, చిన్నారుల భద్రతతో పాటు భక్తుల రద్దీ, వాహనాల క్రమబద్ధీకరణపై ప్రత్యేక దృష్టి సారించాలని కోరారు. నిమజ్జన కేంద్రాల్లో సీసీ కెమెరాలు, పోలీస్ కంట్రోల్ పాయింట్లు, మహిళా పోలీస్ సిబ్బంది, ట్రాఫిక్ వాలంటీర్లు, అత్యవసర సహాయక బృందాలను అందుబాటులో ఉంచాలని విజ్ఞప్తి చేశారు.
భక్తుల భద్రతే ప్రథమ ప్రాధాన్యత
గణేష్ నవరాత్రి ఉత్సవాలు కరీంనగర్ నగర ప్రజల భక్తి, సంస్కృతి, సామూహిక ఐక్యతకు ప్రతీకగా నిలుస్తాయని మేయర్ కొలగాని శ్రీనివాస్ అన్నారు. ఉత్సవాలు, నిమజ్జన కార్యక్రమాలు ఎలాంటి అవాంఛనీయ ఘటనలకు తావులేకుండా ప్రశాంతంగా, విజయవంతంగా జరిగేలా అధికారులు సమన్వయంతో పనిచేయాలని కోరారు.
గణేష్ మండపాల నిర్వాహకులు, భక్తులు, ప్రజాప్రతినిధులు, అధికారులు, పోలీస్ సిబ్బంది పరస్పరం సహకరించి నిమజ్జన కార్యక్రమాన్ని విజయవంతం చేయాలని మేయర్ విజ్ఞప్తి చేశారు.