Sircilla: సమాన పనికి సమాన వేతనం ఇవ్వాలి: సిరిసిల్ల జూనియర్ డాక్టర్లు!

Sircilla: సమాన పనికి సమాన వేతనం ఇవ్వాలంటూ రాజన్న సిరిసిల్ల జిల్లా కేంద్రంలోని ప్రభుత్వ ఆసుపత్రిలో జూనియర్ డాక్టర్లు ఆందోళనకు దిగారు. ప్రభుత్వం నిర్ణయించిన స్టైపెండ్‌కు, తమకు అందుతున్న మొత్తానికి మధ్య భారీ వ్యత్యాసం ఉందని నిరసన వ్యక్తం చేశారు. ఆసుపత్రిలోని 31 మంది జూనియర్ డాక్టర్లు ఓపీ విధులను బహిష్కరించి, ఆసుపత్రి ఎదుట ఫ్లకార్డులు ప్రదర్శిస్తూ తమ సమస్యలను ప్రభుత్వం దృష్టికి తీసుకెళ్లారు.

గత జూన్ నెల నుంచి ఇంటర్న్‌షిప్ విధులు నిర్వహిస్తున్న తమకు నెలకు కేవలం రూ.5 వేల స్టైపెండ్ మాత్రమే చెల్లిస్తున్నారని జూనియర్ డాక్టర్లు ఆవేదన వ్యక్తం చేశారు. ప్రభుత్వ ఆమోదిత స్టైపెండ్ రూ.29,792గా ఉండగా, తమకు మాత్రం రూ.5 వేలే అందుతున్నాయని తెలిపారు. రోజుకు సుమారు రూ.166తో కనీస అవసరాలు తీర్చుకోవడం కూడా కష్టంగా మారిందని వాపోయారు.

ఆసుపత్రిలో ఇతర ఎంబీబీఎస్ ఇంటర్న్‌లతో సమానంగా విధులు నిర్వహిస్తున్నప్పుడు స్టైపెండ్ విషయంలో తమకు ఎందుకు వ్యత్యాసం చూపుతున్నారని ప్రశ్నించారు. సమాన పనికి సమాన వేతనం అనే న్యాయసూత్రాన్ని ప్రస్తావిస్తూ, సుప్రీంకోర్టు ఆదేశాలకు అనుగుణంగా తమకు న్యాయం చేయాలని డిమాండ్ చేశారు.

ఎక్కువ స్టైపెండ్ కోరడం లేదని, ఇతర ఇంటర్న్‌లకు అందుతున్నట్లుగానే తమకూ సమాన స్టైపెండ్ చెల్లించాలని విజ్ఞప్తి చేశారు. తమ సమస్యపై రాష్ట్ర ప్రభుత్వం స్పష్టత ఇచ్చి, తక్షణమే పరిష్కరించాలని కోరారు.

ఎక్కువ వద్దు.. తక్కువ వద్దు.. సమాన స్టైపెండ్ కావాలి అంటూ జూనియర్ డాక్టర్లు తమ డిమాండ్‌ను స్పష్టం చేశారు.