Karimnagar: పోలీసుల నిజాయితీ రూ.2 లక్షల విలువైన ఫోన్లు బాధితుడికి అప్పగింత!

​కరీంనగర్: డ్యామ్ కట్టపై పెట్రోలింగ్ నిర్వహిస్తుండగా దొరికిన సుమారు రెండు లక్షల రూపాయల విలువైన రెండు ఖరీదైన మొబైల్ ఫోన్లను లేక్ పోలీసులు అత్యంత నిజాయితీతో, వేగంగా స్పందించి బాధితుడికి అప్పగించారు.

లేక్ పోలీస్ స్టేషన్‌కు చెందిన హెడ్ కానిస్టేబుల్ (HC-455) శ్రీనివాస్, హోంగార్డ్ (Hg-272) శ్రీనివాస్ కలిసి డ్యామ్ కట్ట మీద నిరంతరంలాగే పెట్రోలింగ్ నిర్వహిస్తున్నారు. ఈ క్రమంలో వారికి కట్టపై పడిపోయి ఉన్న రెండు ఖరీదైన మొబైల్ ఫోన్లు (iPhone 16 Pro, Samsung Z Fold 6) లభించాయి.

వీటి మార్కెట్ విలువ సుమారు రెండు లక్షల రూపాయల వరకు ఉంటుంది.​వెంటనే స్పందించిన సిబ్బంది సాంకేతికత మరియు స్థానిక సమాచారం సహాయంతో సదరు ఫోన్ల యజమాని వివరాలను సేకరించారు. ఆ ఫోన్లు కరీంనగర్‌కు చెందిన షేక్ సలీముద్దీన్ కుమారుడైన షేక్ సఫియుద్దీన్ (38) కి చెందినవిగా గుర్తించారు.

వెంటనే బాధితుడిని పిలిపించి, లేక్ పోలీస్ సిబ్బంది సమక్షంలో ఆ ఫోన్లను అతనికి సురక్షితంగా అప్పగించారు. ​పోగొట్టుకున్న అత్యంత విలువైన ఫోన్లను తిరిగి అందించినందుకు బాధితుడు షేక్ సఫియుద్దీన్ పోలీసుల నిజాయితీకి మరియు త్వరితగతిన స్పందించిన తీరుకు కృతజ్ఞతలు తెలిపారు.

​ప్రజలకు విజ్ఞప్తి: "డ్యామ్ మరియు పర్యాటక ప్రాంతాలకు వచ్చే ప్రజలు తమ విలువైన వస్తువులు, నగదు మరియు మొబైల్ ఫోన్ల పట్ల అప్రమత్తంగా ఉండాలి. ఏమాత్రం అజాగ్రత్తగా ఉన్నా దొంగతనాలకు లేదా వస్తువులు పోగొట్టుకునే అవకాశం ఉంది కాబట్టి ప్రజలు జాగ్రత్తలు వహించాలి. ​సకాలంలో స్పందించి నిజాయితీ చాటుకున్న హెడ్ కానిస్టేబుల్ శ్రీనివాస్, హోంగార్డ్ శ్రీనివాస్‌లను సీపీ గౌష్ ఆలం మరియు స్థానికులు అభినందించారు.