Karimnagar: హత్య కేసులో సంచలన తీర్పు.. నిందితుడికి జీవిత ఖైదు!

Karimnagar: కరీంనగర్-1 టౌన్ పోలీస్ స్టేషన్ పరిధిలో నమోదైన హత్య కేసులో నిందితుడు పైడిపాల వెంకటేశ్వర్లు @ వెంకటేష్‌కు గౌరవ ప్రిన్సిపల్ డిస్ట్రిక్ట్ అండ్ సెషన్స్ జడ్జి కోర్టు జీవిత ఖైదు శిక్ష విధించింది. నిందితుడిపై రూ.1,000 జరిమానా కూడా విధిస్తూ కోర్టు తీర్పు వెలువరించింది.

కేసు వివరాల ప్రకారం.. 29-06-2023న కరీంనగర్‌లోని క్రిస్టల్ ప్లాజా అపార్ట్‌మెంట్‌లోని ఫ్లాట్ నం.203లో గుండా సరితను నిందితుడు హత్య చేశాడు. మృతురాలితో నిందితుడికి సన్నిహిత సంబంధం ఉండగా, ఆమె వాట్సాప్ సంభాషణలు మరియు డబ్బు వ్యవహారాలపై అనుమానంతో వివాదం తలెత్తింది.

ఈ క్రమంలో నిందితుడు సరితను పట్టుకుని గోడకు తల, ముఖం బలంగా కొట్టడంతో పాటు చున్నీతో గొంతు బిగించి, గొంతుపై కాలు పెట్టి హత్య చేసినట్లు దర్యాప్తులో తేలింది. అనంతరం మృతురాలి మొబైల్ ఫోన్, బ్యాంక్ కార్డులు, పత్రాలు, చెక్‌బుక్‌లను తీసుకుని, ఆమె బ్యాంకు ఖాతా నుంచి రూ.90,000 తన ఖాతాకు బదిలీ చేసుకున్నాడు. మృతురాలి ఫోన్ నుంచే వాట్సాప్ సందేశాలు పంపి ఆమె సజీవంగా ఉన్నట్లు నమ్మించే ప్రయత్నం చేశాడు.

పోలీసులు నిందితుడిని 03-07-2023న అరెస్టు చేసి, రక్తపు మరకలున్న దుస్తులతో పాటు ఇతర కీలక వస్తువులను స్వాధీనం చేసుకున్నారు. ఫోరెన్సిక్, వేలిముద్రల ఆధారాలతో పాటు పోలీసుల సమర్థవంతమైన దర్యాప్తు ద్వారా నిందితుడిపై నేరం రుజువైంది. దీంతో గౌరవ న్యాయస్థానం నిందితుడికి జీవిత ఖైదు, రూ.1,000 జరిమానా విధించింది.

2026 సంవత్సరంలో కరీంనగర్ పోలీస్ కమిషనరేట్ పరిధిలో ఇది 22వ కన్విక్షన్ కావడం విశేషం.

ఏసీపీ సీసీఆర్బి శ్రీనివాస్ జి పర్యవేక్షణలో, కేసు దర్యాప్తు అధికారి ఎం. రవి కుమార్, అప్పటి కరీంనగర్-1 టౌన్ ఇన్‌స్పెక్టర్, SHO కె. రామ్ చందర్ రావు, పబ్లిక్ ప్రాసిక్యూటర్ ఎం. ప్రతాప్, కోర్టు డ్యూటీ అధికారులు ఎస్.డి. సర్వర్ అలీ, ఎం. సతయ్య తదితరులు కేసు దర్యాప్తు, న్యాయపరమైన ప్రక్రియలో కీలకంగా వ్యవహరించినందుకు సీపీ గౌష్ ఆలం ప్రత్యేకంగా అభినందించారు.