Sircilla: కాశీ తండాకు నిలిచిన రాకపోకలు మత్తడి దూకిన రాయిని చెరువు!

Sircilla: రాయిని చెరువు మత్తడి దూకడంతో కాశీ తండాకు నిలిచిన రాకపోకలు.. వంతెన పనులు పూర్తి చేయాలని గ్రామస్తుల డిమాండ్

రాజన్న సిరిసిల్ల జిల్లా వీర్నపల్లి మండలం మద్దిమల్ల గ్రామపంచాయతీ పరిధిలోని కాశీ తండాకు రాకపోకలు పూర్తిగా నిలిచిపోయాయి. రాయిని చెరువు మత్తడి దూకడంతో గ్రామానికి వెళ్లే మార్గం నీటమునిగిపోవడంతో తండా వాసులు తీవ్ర ఇబ్బందులు ఎదుర్కొంటున్నారు.

వర్షాల కారణంగా చెరువులో నీటి ప్రవాహం పెరగడంతో రాయిని చెరువు మత్తడి మీదుగా భారీగా నీరు ప్రవహిస్తోంది. దీంతో కాశీ తండాకు వెళ్లే రహదారి పూర్తిగా తెగిపోవడంతో గ్రామస్తులు బయటకు వెళ్లలేని పరిస్థితి ఏర్పడింది. అత్యవసర పరిస్థితుల్లో కూడా రాకపోకలు నిలిచిపోవడంతో విద్యార్థులు, ఉద్యోగులు, రైతులు, రోగులు తీవ్ర ఇబ్బందులు పడుతున్నట్లు గ్రామస్తులు తెలిపారు.

కాశీ తండాకు వంతెన నిర్మాణ పనులు ప్రారంభించినప్పటికీ వాటిని మధ్యలోనే నిలిపివేయడం వల్లే ఈ పరిస్థితి తలెత్తిందని గ్రామస్తులు ఆరోపించారు. నిధులు మంజూరైనప్పటికీ పనులు పూర్తి చేయకుండా నిర్లక్ష్యం చేశారని వారు విమర్శించారు.

ప్రతి వర్షాకాలంలో ఇదే సమస్య పునరావృతమవుతోందని, అధికారులు, ప్రజాప్రతినిధులు స్పందించి వంతెన నిర్మాణ పనులను వెంటనే పూర్తి చేయాలని గ్రామస్తులు డిమాండ్ చేశారు. వంతెన నిర్మాణం పూర్తయితే తండా ప్రజలకు శాశ్వతంగా రాకపోకల సమస్య తొలగిపోతుందని పేర్కొన్నారు.