Sircilla: సీఎం ప్రకటనపై నాయి బ్రాహ్మణుల ఆగ్రహం!

Sircilla: ముదిరాజులను బీసీ-ఏ గ్రూపులో చేర్చేందుకు మంత్రివర్గ ఉపసంఘాన్ని ఏర్పాటు చేసినట్లు ముఖ్యమంత్రి రేవంత్ రెడ్డి ప్రకటించడాన్ని రాజన్న సిరిసిల్ల జిల్లా నాయి బ్రాహ్మణ సేవా సంఘం తీవ్రంగా ఖండించింది. బీసీ-డీ గ్రూపులో ఉన్న ముదిరాజులను బీసీ-ఏలోకి మార్చవద్దని డిమాండ్ చేసింది. ఈ నిర్ణయం తమ సామాజిక ఉనికికి ప్రమాదకరమని సంఘం నాయకులు ఆందోళన వ్యక్తం చేశారు.

తెలంగాణ ముఖ్యమంత్రి ఎనుముల రేవంత్ రెడ్డి ఇటీవల హైదరాబాద్‌లోని రవీంద్రభారతిలో నిర్వహించిన పండుగ సాయన్న జయంతి వేడుకల్లో ముదిరాజులను బీసీ-ఏ గ్రూపులో చేర్చే అంశంపై మంత్రివర్గ ఉపసంఘాన్ని ఏర్పాటు చేసినట్లు ప్రకటించారు. ఈ ప్రకటనను నిరసిస్తూ రాజన్న సిరిసిల్ల జిల్లా నాయి బ్రాహ్మణ సేవా సంఘం ఆధ్వర్యంలో నాయకులు ఆందోళన చేపట్టారు.

ముందుగా అంబేద్కర్ విగ్రహానికి పూలమాలలు వేసి నివాళులర్పించారు. అనంతరం అక్కడి నుంచి బైక్ ర్యాలీగా కలెక్టరేట్‌కు చేరుకుని జిల్లా కలెక్టర్‌కు వినతిపత్రం అందజేశారు.

ఈ సందర్భంగా సంఘం నాయకులు మాట్లాడుతూ.. డాక్టర్ బి.ఆర్. అంబేద్కర్ రచించిన భారత రాజ్యాంగంలోని ఆర్టికల్ 15, 16 ప్రకారం వెనుకబడిన తరగతులను గుర్తించే విధానాన్ని రూపొందించారని పేర్కొన్నారు. అదే విధానం ఆధారంగా నాయి బ్రాహ్మణులను బీసీ-ఏ గ్రూపులో చేర్చారని గుర్తుచేశారు.

ముదిరాజులను బీసీ-ఏలో చేర్చే అంశంపై ప్రభుత్వం పునరాలోచించాలని, బీసీ-డీ గ్రూపులో ఉన్న వారిని బీసీ-ఏలో చేర్చవద్దని ముఖ్యమంత్రి, మంత్రివర్గానికి విజ్ఞప్తి చేశారు. ముదిరాజులు తమకు శత్రువులు కాదని, అయితే తమ సామాజిక ఉనికిని కాపాడుకోవడం కోసం ఈ నిర్ణయాన్ని వ్యతిరేకిస్తున్నామని స్పష్టం చేశారు.

ప్రభుత్వం తమ విజ్ఞప్తిని పట్టించుకోకుండా ముదిరాజులను బీసీ-ఏలో చేర్చితే రాష్ట్రవ్యాప్తంగా ఉద్యమాన్ని మరింత ఉధృతం చేస్తామని నాయి బ్రాహ్మణ సేవా సంఘం నాయకులు హెచ్చరించారు.

ఈ కార్యక్రమంలో నాయి బ్రాహ్మణ సేవా సంఘం జిల్లా అధ్యక్షుడు చింతకుంట వెంకటేశం, గౌరవ అధ్యక్షుడు అవధూత రాములు, మాజీ అధ్యక్షుడు చింతకుంట శ్రీనివాస్, పయ్యావుల ఆనందం, చింతకుంట సత్తయ్య, మల్లేశం, గంగారాం తదితరులు పాల్గొన్నారు.