Peddapalli: ప్రభుత్వ విప్ విజయరమణరావుకు రాష్ట్ర మంత్రి హోదా

పెద్దపల్లి: ప్రభుత్వ విప్, పెద్దపల్లి శాసనసభ్యులు చింతకుంట విజయరమణరావుకు రాష్ట్ర మంత్రి హోదా కల్పిస్తూ తెలంగాణ ప్రభుత్వం ఉత్తర్వులు జారీ చేసింది. ఈ మేరకు ప్రభుత్వం జి.ఓ.ఆర్‌.టి. (G.O.Rt) నెం.1064ను విడుదల చేసింది. విజయరమణరావుతో పాటు ప్రభుత్వ విప్‌లుగా బాధ్యతలు నిర్వహిస్తున్న యెన్నం శ్రీనివాస్ రెడ్డి (మహబూబ్‌నగర్), వేముల వీరేశం (నకిరేకల్)లకు కూడా ప్రభుత్వం రాష్ట్ర మంత్రి హోదాను కల్పించింది.

​ఆర్టికల్–18 ప్రకారం ప్రోటోకాల్:

ప్రభుత్వ ఉత్తర్వుల ప్రకారం, 'స్టేట్ వారెంట్ ఆఫ్ ప్రిసిడెన్స్'లోని ఆర్టికల్–18 ప్రకారం వీరికి రాష్ట్ర మంత్రి హోదాకు సంబంధించిన అధికారిక ప్రోటోకాల్‌లు, మర్యాదలు, సదుపాయాలు వర్తించనున్నాయి.

​శాసనసభలో ప్రభుత్వ కార్యక్రమాలను సమర్థవంతంగా నిర్వహించడంతో పాటు, ప్రజా సమస్యల పరిష్కారంలో, నియోజకవర్గాల అభివృద్ధిలో చురుగ్గా వ్యవహరిస్తున్నందుకు గుర్తింపుగానే ప్రభుత్వం ఈ హోదాను కల్పించిందని కాంగ్రెస్ పార్టీ నాయకులు, కార్యకర్తలు ఆనందం వ్యక్తం చేశారు. ఈ సందర్భంగా పెద్దపల్లి శాసనసభ్యులు విజయరమణరావుకు పలువురు నాయకులు, అభిమానులు శుభాకాంక్షలు తెలిపారు.