Yellareddypeta: ఎల్లారెడ్డిపేటలో ఆర్ఎంపీ శ్రీనివాస్ గౌడ్‌పై కేసు నమోదు

Yellareddypeta: ఎలాంటి వైద్య అర్హతలు, ధ్రువపత్రాలు లేకుండా మందులు, ఇంజెక్షన్లు, రక్త పరీక్షలు చేస్తున్నాడంటూ గొల్లపల్లి గ్రామానికి చెందిన ఆర్ఎంపీ శ్రీనివాస్ గౌడ్‌పై ఎల్లారెడ్డిపేట పోలీసులు కేసు నమోదు చేశారు. ఈ మేరకు అందిన ఫిర్యాదుపై కేసు నమోదు చేసి దర్యాప్తు చేపట్టినట్లు ఎస్సై ఎన్. రమేష్ తెలిపారు.

పోలీసులు తెలిపిన వివరాల ప్రకారం.. గత నెలలో గొల్లపల్లి గ్రామానికి చెందిన 35 ఏళ్ల మహిళకు ఛాతిలో నొప్పి రావడంతో ఆర్ఎంపీ శ్రీనివాస్ వద్దకు వెళ్లినట్లు ఫిర్యాదులో పేర్కొన్నారు. అక్కడ ఆమెకు మందులు, ఇంజెక్షన్లు ఇచ్చినప్పటికీ పరిస్థితి మెరుగుపడకపోవడంతో సిరిసిల్లలోని ఆసుపత్రికి, అనంతరం కరీంనగర్‌లోని మురుగన్ ఆసుపత్రికి తరలించినట్లు తెలిపారు. అక్కడ చికిత్స పొందుతూ ఆమె మృతి చెందినట్లు ఫిర్యాదులో పేర్కొన్నారు.

తన కుమార్తె మరణానికి ఆర్ఎంపీ శ్రీనివాస్ కారణమయ్యాడని ఆరోపిస్తూ గొల్లపల్లి గ్రామానికి చెందిన చాతని రామ్‌రెడ్డి పోలీసులకు ఫిర్యాదు చేసినట్లు ఎస్సై తెలిపారు. ఫిర్యాదు ఆధారంగా కేసు నమోదు చేసి పూర్తి స్థాయిలో దర్యాప్తు చేస్తున్నట్లు వెల్లడించారు.

ఈ సందర్భంగా ఎస్సై ఎన్. రమేష్ మాట్లాడుతూ.. వైద్య అర్హతలు, ధ్రువపత్రాలు లేని వ్యక్తుల వద్ద ప్రజలు వైద్యం చేయించుకోవద్దని సూచించారు. అర్హత లేని వ్యక్తుల వద్ద మందులు, ఇంజెక్షన్లు, రక్త పరీక్షలు చేయించుకోవడం వల్ల ప్రాణాలకు ముప్పు వాటిల్లే అవకాశం ఉందన్నారు.

అనుమానాస్పదంగా వైద్యం చేస్తున్న వ్యక్తుల వివరాలను సంబంధిత వైద్య ఆరోగ్య శాఖ అధికారులకు లేదా పోలీసులకు సమాచారం అందించాలని కోరారు. ప్రజల ఆరోగ్యంతో చెలగాటమాడే వ్యక్తులపై చట్టపరమైన చర్యలు తీసుకునేందుకు ప్రజలు పోలీసులకు సహకరించాలని సూచించారు. అర్హత కలిగిన వైద్యులను మాత్రమే సంప్రదించి ఆరోగ్యాన్ని కాపాడుకోవాలని ఎస్సై తెలిపారు.