Sircilla: చీర్లవంచలో డ్రై డే కార్యక్రమాన్ని పరిశీలించిన డీఎంహెచ్‌వో

సిరిసిల్ల: రాజన్న సిరిసిల్ల జిల్లా చీర్లవంచ గ్రామంలో నిర్వహించిన డ్రై డే కార్యక్రమాన్ని జిల్లా వైద్య ఆరోగ్య శాఖాధికారి (డీఎంహెచ్‌వో) డా. ఏంజెలా ఆల్ఫ్రెడ్ మంగళవారం పరిశీలించారు.

గ్రామంలోని నివాస ప్రాంతాలు, నీరు నిల్వ ఉండే ప్రదేశాలు, ఇంటి పరిసరాలను తనిఖీ చేసి దోమల నివారణ చర్యలను క్షేత్రస్థాయిలో సమీక్షించారు. డెంగ్యూ, మలేరియా, చికున్‌గున్యా వంటి దోమల ద్వారా వ్యాపించే వ్యాధులను నివారించేందుకు ప్రతి మంగళవారం, శుక్రవారం తప్పనిసరిగా డ్రై డే కార్యక్రమాలు నిర్వహించాలని క్షేత్రస్థాయి సిబ్బందికి సూచించారు.

ప్రజలు తమ ఇళ్ల పరిసరాలను పరిశుభ్రంగా ఉంచడంతో పాటు నీటి నిల్వ పాత్రలను వారానికి ఒకసారి పూర్తిగా ఖాళీ చేసి శుభ్రం చేయాలని, కొబ్బరి చిప్పలు, పాత టైర్లు, కూలర్లు, పూల కుండీలు వంటి వాటిలో నీరు నిల్వ ఉండకుండా జాగ్రత్తలు తీసుకోవాలని అవగాహన కల్పించారు. జ్వరం, తలనొప్పి, ఒళ్లునొప్పులు వంటి లక్షణాలు కనిపిస్తే వెంటనే సమీప ప్రభుత్వ ఆరోగ్య కేంద్రాన్ని సంప్రదించాలని సూచించారు.

గ్రామంలో పారిశుద్ధ్య నిర్వహణను మెరుగుపరచడంతో పాటు దోమల లార్వా నిర్మూలన కోసం నీరు నిల్వ ఉండే ప్రదేశాల్లో ఆయిల్ బాల్స్ వినియోగించాలని, దోమల నివారణ చర్యలను మరింత సమర్థవంతంగా అమలు చేయాలని సంబంధిత సిబ్బందికి డీఎంహెచ్‌వో ఆదేశాలు జారీ చేశారు.

డ్రై డే కార్యక్రమాలను విజయవంతం చేయడంలో గ్రామ ప్రజలు ఆరోగ్య శాఖకు సహకరించాలని ఆమె పిలుపునిచ్చారు. ఈ కార్యక్రమంలో ఆశా కార్యకర్తలు, ఏఎన్‌ఎంలు, ఆరోగ్య శాఖ సిబ్బంది పాల్గొన్నారు.