Sircilla: 710 మందికి ఇందిరమ్మ ఇండ్ల మంజూరు పత్రాల పంపిణీ

సిరిసిల్ల: అర్హులైన ప్రతి ఒక్కరికీ ఇందిరమ్మ ఇండ్లు మంజూరు చేసి, పేదల సొంత ఇంటి కలను సాకారం చేస్తామని ప్రభుత్వ విప్, వేములవాడ ఎమ్మెల్యే ఆది శ్రీనివాస్ తెలిపారు. ఇందిరమ్మ ఇండ్ల మంజూరు పత్రాలు పొందిన లబ్ధిదారులు ఇంటి నిర్మాణ పనులను వేగంగా పూర్తి చేసుకోవాలని సూచించారు.

సిరిసిల్ల మున్సిపల్ పరిధిలోని సాయి మణికంఠ ఫంక్షన్ హాల్‌లో గురువారం తెలంగాణ గృహ నిర్మాణ సంస్థ ఆధ్వర్యంలో ఇందిరమ్మ ఇండ్ల మంజూరు పత్రాల పంపిణీ కార్యక్రమం నిర్వహించారు. మొదటి విడతలో మంజూరైన ఇళ్లను నిర్ణీత సమయంలో పూర్తి చేసిన లబ్ధిదారుల స్థానంలో కొత్తగా ఎంపికైన 710 మందికి ఆది శ్రీనివాస్, జిల్లా కలెక్టర్ గరిమ అగ్రవాల్ మంజూరు పత్రాలు అందజేశారు.

ఈ సందర్భంగా ఆది శ్రీనివాస్ మాట్లాడుతూ.. సీఎం రేవంత్ రెడ్డి, గృహ నిర్మాణ శాఖ మంత్రి పొంగులేటి శ్రీనివాస్ రెడ్డి ఆదేశాల మేరకు అర్హులందరికీ ఇందిరమ్మ ఇండ్లు మంజూరు చేస్తున్నామని తెలిపారు. ఇళ్ల నిర్మాణంతో పేదల సొంత ఇంటి కల నెరవేరడంతో పాటు గ్రామాలు, మున్సిపాలిటీల్లో కూలీలు, వివిధ వృత్తుల వారికి ఉపాధి లభిస్తుందని పేర్కొన్నారు.

రాష్ట్రంలో సంక్షేమ, అభివృద్ధి కార్యక్రమాలు వేగంగా కొనసాగుతున్నాయని ఆది శ్రీనివాస్ తెలిపారు. 200 యూనిట్ల ఉచిత విద్యుత్, మహిళలకు ఉచిత ఆర్టీసీ ప్రయాణం, రైతులకు రూ.2 లక్షల వరకు రుణమాఫీ, నూతన రేషన్ కార్డులు, సన్న బియ్యం పంపిణీ వంటి కార్యక్రమాలను ప్రభుత్వం అమలు చేస్తోందని వివరించారు.

సొంత ఇల్లు ప్రతి ఒక్కరి కల అని జిల్లా కలెక్టర్ గరిమ అగ్రవాల్ అన్నారు. ఇందిరమ్మ ఇండ్ల మంజూరు పత్రాలు పొందిన లబ్ధిదారులు ప్రభుత్వం నిర్ణయించిన విస్తీర్ణంలో త్వరగా నిర్మాణ పనులు ప్రారంభించాలని సూచించారు. ప్రతి మండల కేంద్రంలోని మోడల్ హౌస్‌లను సందర్శించి, ప్రభుత్వం అందించే రూ.5 లక్షల ఆర్థిక సహాయంతో ఇళ్లను పూర్తి చేసుకోవాలని కోరారు.

రెండో విడతలో ప్రతి నియోజకవర్గానికి 2,000 ఇళ్ల చొప్పున మంజూరు చేసినట్లు కలెక్టర్ తెలిపారు. నాలుగు దశల్లో మొత్తం రూ.5 లక్షల ఆర్థిక సహాయం లబ్ధిదారుల బ్యాంకు ఖాతాల్లో జమ అవుతుందని చెప్పారు. ఇంటి నిర్మాణ దశలను అధికారులు ఫొటోలు తీసి నమోదు చేస్తారని వివరించారు.

కార్యక్రమంలో జిల్లా గ్రంథాలయ సంస్థ చైర్మన్ నాగుల సత్యనారాయణ గౌడ్, మున్సిపల్ చైర్మన్లు జిందం కళ, పుల్కం రాజు, మార్కెట్ కమిటీ చైర్మన్లు, హౌసింగ్ పీడీ వెంకట మాధవరావు, సిరిసిల్ల ఆర్డీఓ శ్రీధర్ బాబు, తహసీల్దార్ మహేష్, కౌన్సిలర్లు, సర్పంచులు, ఇందిరమ్మ కమిటీ సభ్యులు, అధికారులు తదితరులు పాల్గొన్నారు.