Sircilla: సిరిసిల్ల పోలీస్ గ్రీవెన్స్ డేలో 17 ఫిర్యాదులు స్వీకరించిన ఎస్పీ!

Sircilla: రాజన్న సిరిసిల్ల జిల్లా పోలీస్ కార్యాలయంలో సోమవారం నిర్వహించిన గ్రీవెన్స్ డే కార్యక్రమంలో జిల్లా ఎస్పీ మహేష్ బి. గితే ప్రజల నుంచి 17 ఫిర్యాదులు స్వీకరించారు. బాధితుల సమస్యలను చట్టపరిధిలో త్వరితగతిన పరిష్కరించి, వారికి న్యాయం జరిగేలా చర్యలు తీసుకోవాలని సంబంధిత పోలీస్ స్టేషన్ల అధికారులను ఆదేశించారు.

ప్రజల సమస్యలను నేరుగా తెలుసుకుని, వారికి సత్వర న్యాయం అందించడమే లక్ష్యంగా ప్రతి సోమవారం గ్రీవెన్స్ డే నిర్వహిస్తున్నట్లు ఎస్పీ తెలిపారు. ఈ కార్యక్రమానికి జిల్లాలోని వివిధ ప్రాంతాల నుంచి వచ్చిన బాధితుల ఫిర్యాదులను స్వీకరించి, ఆయా పోలీస్ స్టేషన్ల అధికారులతో ఫోన్‌లో మాట్లాడి సమస్యల పరిష్కారానికి ఆదేశాలు జారీ చేశారు.

ఈ సందర్భంగా ఎస్పీ మాట్లాడుతూ.. పోలీస్ సేవలను ప్రజలకు మరింత చేరువ చేయడంతో పాటు, ప్రజా సమస్యల పరిష్కారానికి ప్రాధాన్యత ఇస్తున్నట్లు తెలిపారు. పోలీస్ స్టేషన్లకు వచ్చే ఫిర్యాదుదారులతో అధికారులు, సిబ్బంది మర్యాదపూర్వకంగా వ్యవహరించాలని సూచించారు. ఫిర్యాదులను స్వీకరించి, అవసరమైన సందర్భాల్లో క్షేత్రస్థాయిలో విచారణ జరిపి చట్టప్రకారం బాధితులకు న్యాయం చేయాలని ఆదేశించారు.

గ్రీవెన్స్ డేలో స్వీకరించిన ఫిర్యాదులను ఆన్‌లైన్‌లో నమోదు చేసి, వాటి పరిష్కార పురోగతిని ఎప్పటికప్పుడు సమీక్షిస్తున్నట్లు ఎస్పీ పేర్కొన్నారు. ప్రజలు తమ సమస్యలను నేరుగా పోలీస్ అధికారుల దృష్టికి తీసుకువచ్చే ఈ కార్యక్రమం ద్వారా ఫిర్యాదులను సాధ్యమైనంత త్వరగా పరిష్కరించేందుకు చర్యలు తీసుకుంటున్నామని తెలిపారు. పోలీస్ శాఖపై ప్రజలకు మరింత నమ్మకం, భరోసా కల్పించేలా అధికారులు పనిచేయాలని ఎస్పీ సూచించారు.