Karimnagar: భక్తిశ్రద్ధలతో వీరబ్రహ్మేంద్ర స్వామి జీవిత చరిత్ర ప్రదర్శన

Karimnagar: నగరంలోని 4వ డివిజన్ గోపాలపూర్ లో శ్రీ రామకృష్ణ భజన మండలి ఆధ్వర్యంలో శ్రీశ్రీశ్రీ మద్విరాట్ పోతులూరి వీరబ్రహ్మేంద్ర స్వామి వారి జీవిత చరిత్ర నాటక ప్రదర్శన కార్యక్రమం అత్యంత వైభవంగా నిర్వహించబడింది.

భక్తిశ్రద్ధలతో ఏర్పాటు చేసిన ఈ ప్రదర్శనకు ముఖ్య అతిథులుగా కరీంనగర్ నగరపాలక సంస్థ మేయర్ కొలగాని శ్రీనివాస్,రాష్ట్ర బీజేపీ అధికార ప్రతినిధి మరియు డిప్యూటీ మేయర్ యాదగిరి సునీల్ రావు హాజరయ్యారు. వారితో పాటు స్థానిక కార్పొరేటర్ భూపతి రవీందర్, మాజీ వైస్ ఎంపీపీ నారాయణ మరియు ఇతర ప్రముఖులు విచ్చేశారు.

ఈ సందర్భంగా యాదగిరి సునీల్ రావు మాట్లాడుతూ మన సంస్కృతి, సాంప్రదాయాలను కాపాడుకోవడంలో ఇలాంటి పౌరాణిక నాటకాలు మరియు ఆధ్యాత్మిక కార్యక్రమాలు ఎంతో దోహదపడతాయని కొనియాడారు. వీరబ్రహ్మేంద్ర స్వామి వారి బోధనలు, సమాజానికి ఆయన అందించిన సందేశం ఎప్పటికీ ఆదర్శప్రాయమని వారు పేర్కొన్నారు.

ఈ కార్యక్రమంలో కాలనీవాసులు, భక్తులు, పెద్ద సంఖ్యలో ప్రజలు పాల్గొని నాటక ప్రదర్శనను ఆసక్తిగా తిలకించారు. భజన మండలి సభ్యులు అతిథులను ఘనంగా సన్మానించారు.